އެމް.އެމް.ޕީ.އާރު.ސީގެ މައްސަލައިގެ އެއްވެސް މަޢުލޫމާތެއް ފޮރުވައި ސިއްރުކޮށްފައިނުވާނެކަމަށް ބުނެ، އެ ކޮމިޝަންގެ މައްޗަށް ކުކުރެވޭ ތުހުމަތުތައް އެންޓި-ކޮރަޕްޝަން ކޮމިޝަން، އޭސީސީން ދޮގުކުރައްވައިފިއެވެ.
އޭސީސީން ވަނީ، އެކޮމިޝަނުން މިމަހުގެ 14 ވަނަ ދުވަހު ޢާންމުކުރި އެމް.އެމް.ޕީ.އާރު.ސީގެ ޚިޔާނާތާގުޅޭ ތަޙްޤީޤް ރިޕޯޓާ ގުޅޭގޮތުން އެކި ފަރާތްތަކުން ޙަޤީޤަތާ ޚިލާފު ވާހަކަތައް ދައްކަމުންގެންދާކަމަށް ވިދާޅުވެ، އެކަމުގެ ޙަޤީޤަތް ސާފުކޮށްދިނުމަށް ހަތް ޞަފްހާގެ ބަޔާނެއް ނެރުއްވާފައެވެ.
އޭސީސީން ނެރެނު ބަޔާނުގައި އެންޓި-ކޮރަޕްޝަން ޤާނޫނުގައި މައްސަލައެއް ބެލުމަށްފަހު ޢަމަލުކުރަންވީގޮތް ބަޔާންކޮށްފައިވާކަމަށާއި، އެ ކޮމިޝަނުން ބަލާ މައްސަލަތަކާ ގުޅޭގޮތުން އާންމުކުރަންޖެހޭ މަޢުލޫމާތުގެ ތެރޭގައި ކޮމިޝަނުން ބަލާ މައްސަލައެއްގެ ތަޙުޤީޤު ރިޕޯޓް އާންމުކުރުމަށް ކޮމިޝަނަށް ލާޒިމްކޮށްފައިނުވާކަން ބަޔާންކޮށްފައިވެއެވެ. އަދި އެ ކޮމިޝަނުން ތަޙުޤީޤުކުރާ މައްސަލައިގެ ތަޙުޤީޤު ރިޕޯޓު އާންމުކުރުމަކީ ކޮމިޝަނުން ޢަމަލުކުރާ އާންމު އުޞޫލުކަމަށް ނުވާއިރު، ޤާނޫނުން ލާޒިމްކޮށްފައިވާ މިންވަރަށް އެމް.އެމް.ޕީ.އާރު.ސީގެ ކޮރަޕްޝަނާ ގުޅުންހުރި މައްސަލައިގެ މަޢުލޫމާތު ދައުލަތުގެ ކަމާގުޅުންހުރި ހުރިހާ އިދާރާތަކާ 2017 ވަނަ އަހަރުގެ އޮކްޓޫބަރު މަހުތެރޭގައި ހިއްސާކޮށްފައިވާނެކަމަށްވެސް ބުނެފައިވެއެވެ. އަދި އެމް.އެމް.ޕީ.އާރު.ސީގެ މައްސަލައިގެ އެއްވެސް މަޢުލޫމާތެއް ކޮމިޝަނުން ފޮރުވައި ސިއްރުކޮށްފައިނުވާނެކަމަށްވެސް ބުނެފައިވެއެވެ.
އޭސީސީގެ ބަޔާނުގައި ބުނެފައިވަނީ، އެމް.އެމް.ޕީ.އާރު.ސީގެ ކޮރަޕްޝަނުގެ މައްސަލައަކީ ޤައުމުގެ އެންމެ މަތީ މަސްލަހަތާ ގުޅިފައިވާ މައްސަލައެއްކަމުން، އެ މައްސަލާގައި ދައުލަތަށް ބޮޑެތި ގެއްލުންތަކެއް ވެފައިވާތީއާއި، އެ ކޮމިޝަނުން ތަޙުޤީޤުކުރި މައްސަލައިގެ ތަފުސީލީ ރިޕޯޓު އާންމުކުރުމަށް ގިނަ ރައްޔިތުންތަކެއް އެދެމުންދާތީ އެމް.އެމް.ޕީ.އާރު.ސީގެ މައްސަލައިގެ ތަޙުޤީޤު ރިޕޯޓް އާންމުކުރުމާމެދު ކޮމިޝަނުގެ މެމްބަރުންގެ މެދުގައި މަޝްވަރާކުރުމަށްފަހު، އެންމެ މަސްލަހަތު ހުރިގޮތަކީ ރިޕޯޓު އާންމުކުރުންކަމަށް ނިންމައި 14 ފެބުރުވަރީ 2019 ގައި ކޮމިޝަނުން އާންމުކޮށްފައިވާ ތަޙުޤީޤު ރިޕޯޓަކީ، 13 ޖުލައި 2017 ގައި ތަހްޤީޤް ނިންމައި ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވާ ރިޕޯޓު ކަމަށެވެ. އަދި، އެ ރިޕޯޓަށް އެއްވެސް އުނިއިތުރެއް ގެނެސްފައިނުވާނެކަމަށްވެސް އޭސީސީން ވަނީ ވިދާޅުވެފައެވެ.
އޭސީސީގެ ބަޔާނުގައި ވަނީ، އެ ކޮމިޝަނުން އާންމުކުރި ތަޙުޤީޤު ރިޕޯޓަކީ، އެމް.އެމް.ޕީ.އާރު.ސީ އިން ދޫކޮށްފައިވާ ރަށްތަކާ ގުޅުންހުރި މައްސަލައަކަށްވެފައި، އެ މައްސަލާގައި އެ ކޮމިޝަނުގެ ތަޙުޤީޤުގައި ސުވާލުކޮށްފައިވާނީ މައްސަލާގައި ތުހުމަތުކުރެވުނު ފަރާތްތަކާއި، ހެކިބަސް ދީފައިވާ ފަރާތްތަކުގެ އިތުރުން ރަށްތަކާ ގުޅުންހުރި ފަރާތްތަކާކަމަށެވެ. އަދި، މި މައްސަލާގައި ހިމެނޭ ފައިސާގެ މުޢާމަލާތްތަކުގައި އިސްކޮށް އުޅުނު ފަރާތްތައް ތަޙުޤީޤަށް ހާޒިރުކުރުމަށް ކުރެވުނު މަސައްކަތުން އެފަރާތްތައް ރާއްޖެ ދޫކޮށް ގޮސްފައިވުމުގެ ސަބަބުން އެ ފަރާތްތައް އޭސީސީއަށް ހާޒިރުކުރެވިފައިނުވާތީއާއި، މޯލްޑިވްސް ޕޮލިސް ސަރވިސްއިން އެފަރާތްތަކުގެ މައްޗަށް ރެޑް ނޯޓިސް ނެރެފައިވީނަމަވެސް، މިހާތަނަށް އެފަރާތްތައް ރާއްޖެއަށް ގެނެވިފައެއްނުވާކަންވެސް މި ބަޔާނުގައި ފާހަގަކޮށްފައިވެއެވެ.
މި މައްސަލައިގެ ތަޙުޤީޤުގައި އެ ކޮމިޝަނުގެ ސީނިއަރ އިންވެސްޓިގޭޓަރުން ހިމެނޭގޮތަށް އެކި މަރުޙަލާތަކުގައި ޖުމުލަ 36 މުވައްޒަފުން ބައިވެރިވެފައިވާ ކަމަށާ، މައްސަލާގައި ތަޙުޤީޤު ޓީމުން ހޯދާފައިވާ މަޢުލޫމާތެއް ނުވަތަ ހޯދާފައިވާ ހެއްކަކަށް ކޮމިޝަނުގެ މެމްބަރުން އެއްވެސް އުނިއިތުރެއް ގެނެސްފައިނުވާނެކަމަށް އޭސީސީގެ ބަޔާނުގައިވެއެވެ. އެގޮތުން، އެމް.އެމް.ޕީ.އާރު.ސީގެ މައްސަލައިގެ ތަޙުޤީޤުގައި ބައިވެރިވި ކޮމިޝަނުގެ އެއްވެސް މުވައްޒަފެއްގެ ނަޒާހަތްތެރިކަމާމެދު ސުވާލުއުފެދޭނެ އެއްވެސް ކަމެއް ކޮށްފައިނުވާކަން ޔަޤީންކޮށްފައިވާކަމަށްވެސް އޭސީސީން ނެރުނު ބަޔާނުގައިވެއެވެ.
އެމްއެމްޕީއާރުސީގެ ކޮރަޕްޝަންގެ މައްސަލަ ތަޙްޤީޤްކޮށް އޭސީސީން ނެރުނު ސަތޭކަ އެތައް ޞަފްޙާއެއްގެ ތަޙްޤީޤި ރިޕޯޓް ފުރިހަމަ ނުވާކަމަށާއި، ބައެއް މަޢުލޫމާތުތައް ޢާންމު ނުކުރާކަމަށް ބުނެ ގިނަ ތުހުމަތުތަކެއް އޭސީސީއަށް ވަނީ އަމާޒުވެފައެވެ.