މިދިޔަ ސީޒަންގައި މާޒިޔާ ސްޕޯޓްސް އެންޑް ރެކްރިއޭޝަނަށް ކުޅުނު ހަތަރު ކުޅުންތެރިއަކު މި ސީޒަންގައި އެ ކްލަބުން ނުފެންނާނެކަމަށް މާޒިޔާއިން ބުނެފިއެވެ.
މާޒިޔާއިން ބުނީ ހަތަރު ކުޅުންތެރިންކަމަށްވާ ޤާސިމް ސައްމާމު އާއި ޔަސްފާދް ހަބީބް އަދި އަހުމަދު އިމާޒް ގެ އިތުރުން އިސްމާއިލް އީސަ މި ސީޒަންގައި އެކުލަބުން ނުފެންނާނެކަމަށެވެ.
މި ފެށޭ ސީޒަނަށް ކްލަބްތަކުން ކުޅުންތެރިން ހޯދަމުން އަންނައިރު، އިސްމާއިލް އީސަ (މެސީ) ވަނީ މިއަހަރުގެ ސީޒަނުގައި ޗެންޕިއަން ޓީސީ ސްޕޯޓްސް ކްލަބަށް ނިންމާފައި. އަދި ޔަސްފާދު ހަބީބުއާއި އަހުމަދު އިމާޒް ހޯދުމަށް އެންމެ ބޮޑަށް މަސައްކަތްކުރަނީ މި އަހަރު އަލަށް ފުރަތަމަ ޑިވިޝަނަށް ޕްރޮމޯޓްވި ދަ ގްރާންޑޭ ސްޕޯޓްސް ކްލަބުންނެވެ. ސައްމާމް ހޯދުމަށް ގްރީން ސްޓްރީޓާއި ޓީސީން އަންނަނީ މަސައްކަތްކުރަމުންނެވެ.
މިއަހަރުގެ ސީޒަނަށް ތައްޔާރުވުމުގެ ގޮތުން މާޒިޔާއިންވެސް އަންނަނީ ކުޅުންތެރިންނާއި ވާހަކަދައްކަމުންނެވެ. އެގޮތުން ޓީސީ ސްޕޯޓްސް ކްލަބުގައި މިދިޔަ ސީޒަނުގައި މޮޅު ކުޅުމެއް ދެއްކި އިބްރާހީމް މަހުދީ އާއި އިބްރާހިމް ވަހީދު ހަސަން އާއި މާޒިޔާއިން މަސައްކަތްކުރަމުންދާކަމަށް މައުލޫމާތު ލިބެއެވެ. އަދި މިދިޔަ ސީޒަނުގައި ނިއުރޭޑިއަންޓް ސްޕޯޓްސް ކްލަބުގައި މޮޅު ކުޅުމެއް ދެއްކި ހަމްޒާ މުހައްމަދުގެ ސޮއި ހޯދުމަށްވެސް މާޒިޔާއިން އަންނަނީ މަސައްކަތް ކުރަމުންނެވެ.
މާޒިޔާގެ ޖެނެރަލް ސެކެޓްރީ އަބްދުލްވައްހާބް ބުނީ މި ސީޒަނަށް ކުޅުންތެރިން ހޯދުމަށްޓަކައި، މިވަގުތު ހުސްކޮށްތިބި ކުޅުންތެރިންނާއި ވާހަކަދައްކަމުން އަންނަ ކަމަށެވެ. އެގޮތުން ނިއުގެ ހަމްޒާ މުހައްމަދު އާއި ޓީސީ އަށް ލީގު ޗެމްޕިއަންކަން ހޯދައިދިނުމުގައި މުހިއްމު ދައުރެއް އަދާކުރި އިބްރާހިމް މަހުދީ އަދި އިބްރާހިމް ވަހީދު އާއިވެސް ވާހަކަ ދައްކަމުން އަންނަކަމަށް އެ ކްލަބުން ވަނީ މައުލޫމާތުދީފައެވެ. އަދި ވަރަށް އަވަހަށް މާޒިޔާއާއި ކުޅުންތެރިން ގުޅި އެކަން އިއުލާންކުރާނެކަމަށް އެކުލަބުން ބުންޏެވެ.