އަންނަ ރައްޔިތުން މަޖިލީހުގެ އިންތިޚާބުގައި ވޯޓް ދިނުމުގެ ޙައްޤު ލިބިފައިވާ މީހުންގެ ރަޖިސްޓަރީއަށް ހުށައެޅި ޝަކުވާތައް އިސްލާހުކުރުމަށްފަހު އަލުން ލިސްޓް އާއްމުކޮށްފިއެވެ.
އިލެކްޝަންސް ކޮމިޝަނުން ބުނީ ވޯޓާސް ލިސްޓަށް ހުށައެޅި ޝަކުވާތައް ބެލުމަށްފަހު އަލުން ގެނެވުނު ބަދަލުތަކާއި އެކު އާއްމުކުރި ލިސްޓަށް ޝަކުވާ ހުށައެޚުމުގެ ފުރުސަތު މިހާރު ހުޅުވާލާފައިވާކަމަށެވެ. އަދި އާ ލިސްޓަށް ޝަކުވާ ހުށައެޅުމުގެ ފުރުސަތު މިމަހުގެ 26ވަނަ ދުވަހުގެ ނިޔަލަށް ހުޅުވާލާފައިވާކަމަށްވެސް އީސީން ބުނެއެވެ.
އީސީން ބުނީ ޝަކުވާ ބަލައިގަތުމަށް ހަމަޖެހިފައިވަނީ މާލެ ފިޔަވައި މީހުން ދިރިއުޅޭ އެހެން ހުރިހާ ރަށަކުން އެރަށެއްގެ ކައުންސިލް އިދާރާއިންނާއި އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނެވެ. މާލޭގައި ނަމަ ޝަކުވާތައް ބަލައިގަންނާނީ އިލެކްޝަންސް ކޮމިޝަނުންގެ މައި އޮފީހުންކަމަށްވެސް އެ ކޮމިޝަނުން ބުނެއެވެ. އަދި ޝަކުވާ ފޯމް ކޮމިޝަންގެ ވެބްސައިޓުންނާއި ކައުންސިލް އިދާރާތަކުން ލިބެން ހުންނާނެކަމަށްވެސް އީސީން ބުނެއެވެ.
އަންނަ އޭޕްރިލް މަހުގެ 6 ވަނަދުވަހު ބާއްވާ ރައްޔިތުން މަޖިލީހުގެ އިންތިޚާބުގައި ވޯޓްލުމުހެ ޙައްޤު ލިބިގެންވާ މީހުންގެ ލިސްޓް އިލެކްޝަންސް ކޮމިޝަނުން ފުރަތަމ އާއްމުކުރީ މިދިޔަ މަހުގެ 29 ވަނަދުވަހުއެވެ. އެ ލިސްޓަށް ޝަކުވާ ހުށައެޅުމަށް ހުޅުވާލި ފުރުސަތުގައި 1256 ޝަކުވާއެއް ހުށައަޅާފައިވެއެވެ. ލިސްޓަށް މައިގަޑު ގޮތެއްގައި ހިމެނެނީ ދާއިރާއާއި، އެޑްރެސް ބަދަލުވުމާއި، މަރުވެފައިވާ މީހުން ލިސްޓްގައި ހިމެނޭ މައްސަލަތައްކަމަށް އިސީން ބުނެއެވެ.
ކުރިއަށްއޮތް ރައްޔިތުން މަޖިލީހުގެ އިންތިޚާބުގައި 264،589 މީހުންނަށް ވޯޓުދިނުމުގެ ޙައްޤުލިބިފައިވެއެވެ. އަދި މުޅިން އަލަށް 2336 މީހުން މިއިންތިޚާބުގައި ވޯޓުލާނެކަމަށް އެ ކޮމިޝަނުން ބުނެއެވެ. މިފަހަރުގެ އިންތިޚާބުގައި ރަށްވެހިވެފައިވާ ތަން ނޫން އެހެންތަނެއްގައި ވޯޓުލުމަށް ރަޖިސްޓްރީ ކުރަން ޖެހޭނީ ރިޔާސީ އިންތިޚާބުގެ ވޯޓުލީތަން ނޫން އެހެންތަނަކަށް ވޯޓުލާން ބޭނުންވާ ފަރާތްތަކުން އެކަނިކަމަށް އިލެކްޝަންސް ކޮމިޝަނުން ވަނީ ބުނެއެވެ.