ކުރީގެ ރައީސް މުހައްމަދު ނަޝީދްގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާ އެމަނިކުފާނު އިންކާރްކުރައްވައިފިއެވެ.ކްރިމިނަލްކޯޓްގެ އިސްގާޒީ އަބްދުﷲ މުހައްމަދު އެކަހެރިކޮށް ބަންދުކުރި މައްސަލާގައި ދައުލަތުން ނަޝީދްއާއި ދެކޮޅަށް އުފުލާފައިވާ ދައުވާގެ ދެވަނަ އަޑުއެހުމުގައި އަމިއްލަފުޅަށް ވާހަކަދައްކަވަމުން ނަޝީދް ވިދާޅުވީ ވެރިކަމުގައި ހުންނެވި އިރު އެއްވެސް މީހަކަށް އަނިޔާއެއް ދިނުމަށް އަމުރުކުރައްވާފއި ނުވާނޭކަމަށެވެ. އަދި އެއްވެސް މީހަކު ހައްޔަރުކުރުމަށް އަމުރުކޮށްފައި ނުވާނޭކަމަށްވެސް ނަޝީދް ވިދާޅުވިއެވެ.މިރޭ ބޭއްވި އަޑުއެހުން ނިންމާލީ މައްސަލައާއި ގުޅިގެން ހުށައެޅިފައިވާ ލިޔެކިޔުންތައް ދިރާސާކުރުމަށް އިތުރު ވަގުތު އަދި ބޭނުންވާކަމަށް ނަޝީދްގެ ގާނޫނީ ޓީމުން ބުނުމުން އެކަމަށް ތިން ދުވަހުގެ ފުރުސަތު އެރުވުމަށްފަހުގައެވެ.ކްރިމިނަލްކޯޓްގެ އިސްގާޒީ އަބްދުﷲ މުހައްމަދު އެކަހެރިކޮށް ބަންދުކުރި މައްސަލާގައި ނަޝީދްގެ ވެރިކަމުގައި ޑީފެންސް މިނިސްޓާރ ކަން ކުރެއްވި ތޮލަހަތު އިބްރާހިމްގެ މައްޗަށް ދައުލަތުން ދައުވާ ކުރާ ދައުވާގެ ދެވަނަ އަޑުއެހުންވެސް މިރޭ ބާއްވާފައިވެއެވެ. އެ މައްސަލައިގެ އަޑުއެހުންވެސް ނިންމާލާފައިވަނީ ޖަވާބްދާރީވުމަށް ތިންދުވަހުގެ ފުރުސަތެއް ދިނުމަށްފަހުގައެވެ. މި ދއުވާއަށް ތޮލްހަތު ވަނީ އިންކާރްކުރައްވާފައެވެ.