ދިރާގުގެ ޚިދުމަތްތަކުގެ ފެންވަރު ރަނގަޅުކުރުމަށްޓަކައި ބައެއް ޚިދުމަތްތައް މެދުކަނޑާލުމަށް ނިންމައިފިއެވެ.
ދިރާގުން ދެމުން އަންނަ ބައެއް ޚިދުމަތްތައް މެދުކަނޑާލުމަށް ހަމަޖެހިފައިވަނީ، ބުރާސްފަތި ދުވަހުން ފެށިގެން އަންނަ ހަފުތާގެ އާދިއްތަ ދުވަހުގެ ނިޔަލަށެވެ.
ދިރާގުން ބުނީ ބިޒްނަސް ސަޕޯޓް ސިސްޓަމް އަޕްގްރޭޑް ކުރުމުގެ މަސައްކަތް ކުރުމަށް ބިލްތަކަށް ފައިސާ ދެއްކުމުގެ ޚިދުމަތާއި، ކަސްޓަމަރ ސަރވިސް ސެންޓަރގެ ޚިދުމަތާއި، ދިރާގު ޕާޓްނަރ ޝޮޕްތަކުގެ ޚިދުމަތާއި، ދިރާގު ވެބްސައިޓްގައިވާ 'މައި އެކައުންޓް' ދަށުން ލިބޭ ޚިދުމަތްތަކާއި، ދިރާގު މޯބައިލް އެޕާއި، މަމެން މޯބައިލް އެޕްގައިވާ ބިލްޑް އަދި ޓޭކްބެކް ފީޗަރ އާއި ދިރާގުޕޭގެ އިތުރުން ދިރާގު ސެލްފް ކެއާ ޗެނަލްސް ގެ ޚިދުމަތް މެދުކެނޑޭނެ ކަމަށެވެ.
އެ މުއްދަތުގައި ބިލްތަކަށް ފައިސާ ދެއްކުމުގެ ޚިދުމަތް މެދުކަނޑާލުމަށް ހަމަޖެހިފައިވުމުން ބިލް ނުދައްކައިގެން އެއްވެސް ފަރާތެއްގެ ފޯނުގެ ޙިދުމަތް ކަނޑާނުލާނެ ކަމަށް ދިރާގުން ހާމަކުރެއެވެ.
މި މުއްދަތުގެ ތެރޭގައި ދިރާގްގެ ބައެއް ޚިދުމަތްތަކުގެ މެދު ކަނޑުނު ނަމަވެސް ކަސްޓަމަރުންނަށް އެއްވެސް މެދުކެނޑުމެއްނެތި ޑޭޓާ، އެސްއެމްއެސް އަދި ވޮއިސް ކޯލް ކުރެވޭނެއެވެ.
އަދި މީގެ އިތުރުން ފެބްރުއަރީ މަހުގެ 1 ވަނަ ދުވަހު ދިރާގުގެ ރީލޯޑާއި ރީޗާޖް ކުރުމުގެ ޚިދުމަތް ވެސް މެދުކެނޑޭނެ ކަމަށް ދިރާގުން ބުނެއެވެ.