ޓެކްސް ދެއްކުމަށް ޝަރުތު ހަމަނުވާ ވަރަށް ގިނަ ފަރާތްތައް ދައުލަތުގެ ޓެކްސް އިދާރާގެ ދަފްތަރުގައި ހިމެނޭކަމަށް މީރާއިން ހާމަކޮށްފިއެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މޯލްޑިވްސް އިންލަންޑް ރެވެނިއު އޮތޯރިޓީ، މީރާގެ އެސިސްޓެންޓް ކޮމިޝަނަރ ޖެނެރަލް، ރެވެނިއު ސަރވިސް، އަހްމަދު ޝަރީފް ވިދާޅުވީ، ޓެކްސް ދައްކާ ފަރާތްތަކުގެ ގޮތުގައި މީރާގައި 35،000 އަށް ވުރެ ގިނަ ފަރާތުން ރަޖިސްޓްރީކޮށްފައިވާކަމަށެވެ. ނަމަވެސް ވިޔަފާރިނުކުރާ ފަރާތްތަކާއި، އެ ފަރާތަކަށް ލިބޭ އާމްދަނީއަށް ބަލާއިރު، ޓެކްސް ނެގުމާބެހޭ އިދާރީ ޤާނޫނުގެ ދަށުން، ރަޖިސްޓަރީ ކުރުން ލާޒިމުނުވާ ގިނަ އަދަދެއްގެ ފަރާތްތަކެއް މީރާގެ ދަފްތަރުގައި ހިމެނޭކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ވިޔަފާރި ހުއްޓާލުމަށްފަހު، މީރާގެ ޓެކްސް ރަޖިސްޓްރީން އުނިކުރުމަށް ހުށަނޭޅުމުގެ ސަބަބުން އަހަރީގޮތުން މީރާއަށް ހުށަހަޅަންޖެހޭ ބަޔާންތައް ހުށަނޭޅުމުން ޖޫރިމަނާގެ ގޮތުގައި ގިނަ އަދަދެއްގެ ފައިސާ ދައްކަންޖެހުންވެސް އެކަށީގެންވާކަމަށެވެ.
މީރާގައި ރަޖިސްޓަރީކޮށްފައިވާ ފަރާތްތަކުގެ ތެރޭގައި މިހާރު ރަޖިސްޓަރީކުރުން ލާޒިމުނުވާ ފަރާތްތަކުން ޓެކުހާ ގުޅިގެން އަދާކުރަންޖެހޭ އިލްތިޒާމުތައް އަދާކުރަން ޖެހުމުގެ ސަބަބުން އެކިއެކި ދަތިތައް ކުރިމަތިވަމުން ދާކަމުގެ ޝަކުވާ ލިބެމުންދާކަން އެއޮތޯރިޓީން މީގެކުރިންވެސް ވަނީ ފާހަގަކޮށްފައެވެ.
މީރާއިން ވަނީ ޓެކުހުގެ ޤާނޫނުތަކުގެ ދަށުން ރަޖިސްޓަރީކުރުމަށް ޝަރުތު ހަމަނުވާ ފަރާތްތަކުން، ރަޖިސްޓަރީން އުނިކުރުމަށް އެއޮތޯރިޓީއަށް ހުށަހެޅުމަށް އިލްތިމާސްކޮށްފައެވެ.