ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޖުޑީޝަލް ސަރވިސް ކޮމިޝަނުގެ މެމްބަރުކަމަށް އައްޔަންކުރެއްވި އަލްއުސްތާޛު މަސްތޫރު ޙުސްނީ އެ ކޮމިޝަންގެ ނާއިބު ރައީސްކަމަށް ހަމަޖައްސައިފިއެވެ.
ޖޭއެސްސީން ބުނީ މަސްތޫރު ކޮމިޝަންގެ ނާއިބު ރައީސަކަށް އައްޔަންކުރީ އިއްޔެ ބޭއްވި ކޮމިޝަންގެ ބައްދަލުވުމުގައި ބައިވެރިވެޑައިގެންނެވި މެމްބަރުންގެ އިއްތިފާޤުންކަމަށެވެ. ޖުޑީޝަލް ސަރވިސް ކޮމިޝަންގެ މެންބަރުކަމަށް އަލްއުސްތާޛު މަސްތޫރު ޙުސްނީ ޢައްޔަން ކުރެއްވީ މިމަހުގެ ބާރަވަނަދުވަހުއެވެ.
ޖޭއެސްސީގެ މެމްބަރުގެ ގޮތުގައި މިހާރު ތިއްބަވަނީ ރައްޔިތުން މަޖިލީހުގެ ރައީސް ޤާސިމް އިބްރާހިމް، ސުޕްރީމްކޯޓްގެ ފަނޑިޔާރު އަލްއުސްތާޛު ޢަބްދުﷲ އަރީފް، ހައިކޯޓްގެ ފަނޑިޔާރު އަލްއުސްތާޛު އަބްދުލް ރައޫފް އިބްރާހިމް، ދަށުކޯޓްތަކުން އަލްއުސްތާޛު މުޙައްމަދު ޢީސާ ފުޅު، ރައްޔިތުންގެ މަޖިލީހުން އަހުމަދު ފާރިސް މައުމޫން، އާއްމުންގެ ތެރެއިން އަލްއުސްތާޛު އަބްދުލް ޙަންނާން އަހުމަދު، ސިވިލް ސާރވިސް ކޮމިޝަންގެ ރައީސް ޑރ. ޢަލީ ޝަމީމް، ދައުލަތުގެ ބަންޑާރަ ނާއިބު އިބްރާހީމް ރިއްފަތު، ވަކީލުންގެ ތެރެއިން ލާތީފާ ގާސިމްއެވެ.