އިންޑިއާއަށް ކުރައްވާ ރަސްމީ ދަތުރުފުޅުގައި ދެ ޤައުމުގެ ދެމެދުގައި މުހިންމު އެއްބަސްވުންތަކެއްގައި ސޮއިކުރައްވާނެކަމަށް ރައީސުލްޖުމްހުރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އިންޑިއާގެ ބޮޑުވަޒީރު ނަރެންދުރަ މޯދީގެ ދައުވަތަކަށް އެ ޤައުމަށް ކުރައްވާ ރަސްމީ ދަތުރުފުޅުގައި ފުރާވަޑާއިގަތުމުގެ ކުރިން ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ޞާލިޙް ވިދާޅުވީ، މި ދަތުރުފުޅުގައި އިންޑިއާގެ ބޮޑު ވަޒީރާއި، އެޤައުމުގެ ރައީސްގެ އިތުރުން އިސްވެރިންނާއި ބައްދަލުކުރައްވާ މަޝްވާރާކުރައްވާނެކަމަށެވެ. އެގޮތުން އިންޑިއާއަށް ދަތުރުކުރާ ދިވެހިންނަށް ދިމާވެފައިވާ ވިސާގެ މައްސަލަތަކަށް ލުޔެއް ހޯއްދަވާދެއްވުމަށް ވިސާއާއި ގުޅޭ އެއްބަސްވުމެއްގައި ސޮއިކުރައްވާނެކަމަށްވެސް ރައީސް ވިދާޅުވިއެވެ. އަދި މި އެއްބަސްވުމުގެ ސަބަބުން ބޭސްފަރުވާއަށް އިންޑިއާއަށް ދާ ދިވެހިންނަށާއި ޑިޕެންޑެންޓް ވިސާ ބޭނުންވާ ފަރާތްތަކަށް ބޮޑު ލުއިތަކެއް ލިބިގެންދާނެކަން ރައީސް ފާހާގަކުރެއްވިއެވެ.
"ދެ ޤައުމުގެ ދެމެދުގައި އެއްބާރުލުން ޤާއިމުކުރަން ހަމަޖެހިފައިވާ ކަންކަމާ ގުޅޭ ގޮތުން، ދެޤައުމުން އެއްބަސްވުންތަކުގައި ސޮއިކުރުމަށް ވަނީ ހަމަޖެހިފައި. އޭގެ ތެރެއިން ވެސް އެންމެ މުހިންމު އެއްބަސްވުމަކީ، ވިސާގެ ލުއިފަސޭހަތަކާ ބެހޭ ގޮތުން ސޮއިކުރާ އެއްބަސްވުން،" ރައީސް ވިދާޅުވިއެވެ.
ރައީސް އިބްރާހީމް މުހައްމަދު ސާލިހް ވިދާޅުވީ އެމަނިކުފާނު މިއަދު އިންޑިއާއަށް ފައްޓަވާ ދަތުރުފުޅުގައި އެ ޤައުމުގެ ވިޔަފާރިވެރިންނާއި ބައްދަލުކުރައްވާ ރާއްޖޭގައި އިންވެސްޓްމަންޓް ކުރަން ހުރި ފުރުސަތުތަކާބެހޭ މައުލޫމާތުތައް ދެއްވާނެކަމަށެވެ. އަދި މީގެއިތުރުން ރާއްޖޭގެ ބަޖެޓަށް ބޭނުންވާ އެހީތެރިކަން ހޯދުމާ ގުޅޭގޮތުން އިންޑިއާ ސަރުކާރާއެކު މަޝްވަރާކުރައްވާނެކަމަށްވެސް ރައީސް ވިދާޅުވިއެވެ.
"ރާއްޖޭގެ ތަރައްޤީއަށް އިންޑިޔާއިން ވެދޭ އެހީތެރިކަން، އަޅުގަނޑުމެން އަބަދުވެސް ޝުކުރުވެރިކަމާ އެކު ބަލައިގަންނަން. އަދި ކުރިމަގުގައި ވެސް ރާއްޖެއަށް ބޭނުންވާ ހުރިހާ ދާއިރާތަކުން، އިންޑިޔާގެ އެހީތެރިކަން ލިބެމުންދާނެ ކަމަށް، އަޅުގަނޑު އުންމީދުކުރަން،" ރައީސް ޞާލިޙު ވިދާޅުވިއެވެ.
ވެރިކަމާއި ހަވާލުވެޑައިގަތުމަށްފަހު ރާއްޖެއިން ބޭރަށް ކުރައްވާ ފުރަތަމަ ރަސްމީ ދަތުރުފުޅުގައި އެންމެ ބޮޑު އިސްކަމެއް ދެއްވާނެ އެއްކަމަކީ އިންޑިއާގައި ދިރިއުޅެމުންދާ ދިވެހިންނާ ބައްދަލުކުރެއްވުންކަންވެސް ރައީސް ވަނީ ފާހަގަކުރައްވާފައެވެ. އެގޮތުން އިންޑިއާގައި ދިރިއުޅޭ ދިވެހި އާއިލާތަކާއި ބައްދަލުކުރައްވާ ދިވެހިންނަށް ދިމާވެފައިވާ ދަތިތައް އޮޅުން ފިލުއްވާ އެކަންކަމުގައި ވެދެވެންހުރި އެހީތެރިކަން ފޯރުކޮށް ދެއްވާނެކަމަށްވެސް ރައީސް އިބްރާހީމް މުހައްމަދު ޞާލިޙް ވިދާޅުވިއެވެ.
"މިދަތުރުގައި ކުރުމަށް ހަމަޖެހިފައިވާ އެންމެ މުހިންމު އަނެއް ކަމަކީ، ދައުލަތުގެ ބަޖެޓަށް ބޭނުންވާ ފައިސާ ހޯދުމަށްޓަކައި އިންޑިޔާ ސަރުކާރާއެކު ވާހަކަދެއްކުން. އަދި އަޅުގަނޑުމެންގެ އިންފްރާސްޓްރަކްޗަރ ބިނާކުރުމަށް ބޭނުންވާ އިންވެސްޓްމެންޓްތައް ހޯދުމާ ގުޅޭ ގޮތުން ވެސް އިންޑިޔާގެ ވެރިންނާއެކު މަޝްވަރާ ކުރުމަށް ވަނީ ހަމަޖެހިފައި" ރައީސް ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިންޑީއާއަށް ކުރައްވާ ދަތުރުފުޅުގައި ފޮރިން މިނިސްޓަރ ޢަބްދުﷲ ޝާހިދާއި ފިނޭންސް މިނިސްޓަރ އިބްރާހީމް އަމީރާއި މިނިސްޓަރ އޮފް ޓްރާންސްޕޯޓް އެންޑް ސިވިލްއޭވިއޭޝަން އާއިޝަތު ނަހުލާގެ އިތުރުން އިކޮނޮމިކް މިނިސްޓަރ އަލްއުސްތާޛު ފައްޔާޟް އިސްމާޢީލާއި ރައްޔިތުންގެ މަޖިލީހުގެ ބައެއް މެމްބަރުންވެސް ބައިވެރިވެޑާއިގަންނަވައެވެ.