ހުޅުމާލެއަކީ ޒުވާނުންނަށް ހިތްފަސޭހަކަމާއި، ހިތްގައިމުކަމާއި އަދި އެމީހުންނަށް ފުދުންތެރިކަމާއި، ކުޅިވަރުގެ ވަސީލަތްތަކާއި އަދި އެނޫންވެސް ސިޓީއެއްގައި ހުންނަންޖެހޭ މުނިސިޕަލް ހުރިހާ ފެސިލިޓީތަކެއް އެކުލެވިގެންވާ، ޒުވާނުންގެ އުންމީދުތައް ފުރިހަމަކޮށްދޭނެ ޝަހަރަކަށް ވެގެންދާނެކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ހުޅުމާލޭގެ ދެވަނަ ފިޔަވަހި ހިއްކުމުގެ މަޝްރޫޢު އިފްތިތާހު ކުރުމަށްޓަކައި ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.ރޭ ރާޅުގަނޑު ސަރަޙައްދުގައި އޮތް މިރަސްމިއްޔާތުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، މިއަހަރަކީ މިނިވަންކަމުގެ 50 އަހަރު ފާހަގަކުރާ އަހަރުކަމަށް ވުމާއެކު، މިނިވަންކަމުގެ ރާޙަތު އެންމެ ބޮޑަށް ލިބެންޖެހޭ ބަޔަކީ އަދި އޭގެ އެންމެބޮޑު ޝަރަފަކާއި، އޭގެ އެންމެބޮޑު ހިތްހަމަޖެހުމެއް ހޯދަންޖެހޭ ބަޔަކީ ދިވެހި ޒުވާނުންކަމުގައި ފާހަގަކުރެއްވިއެވެ. މިގޮތުން، މިއަހަރަކީ ސަރުކާރުން ޒުވާނުންގެ އަހަރެއްގެ ގޮތުގައި ޚާއްޞަކޮށްފައިވާ އަހަރެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ. މިރޮނގުން ރައީސުލްޖުމްހޫރިއްޔާގެ ވާހަކަފުޅު ކުރިއަށް ގެންދަވަމުން، މަސްތުވާތަކެތީގެ ވަބާއިން ޒުވާނުން ސަލާމަތްކުރުމަށްޓަކައި މިއަހަރު ދިވެހި ދަޢުލަތުގެ ބަޖެޓްގައި އިސްކަމެއް ދެއްވުމަށް ހަމަޖެހިފައިވާނެ ކަމުގައި ވިދާޅުވިއެވެ. އަދި، ހުޅުމާލޭ ދެވަނަ ފިޔަވަހީގެ މަޝްރޫޢުގެ އެންމެ ކުރީކޮޅު، މާލެ ފިޔަވައި ރާއްޖޭގައި ހެދޭ އެންމެ ބޮޑު ރީހެބިލިޓޭޝަން ސެންޓަރު ހުޅުމާލޭގައި ޤާއިމްކުރުމަށް ހަމަޖެހިފައިވާކަމުގައި ރައީސުލްޖުމްހޫރިއްޔާ ވިދާޅުވިއެވެ.ރައީސުލްޖުމްހޫރިއްޔާގެ ވާހަކަފުޅުގައި، ސަރުކާރުން ހުޅުމާލެ ބިނާކުރަނީ ވަކި ކުލައެއްގައި ތިބި، ނުވަތަ ހަމައެކަނި މާލޭގައި ދިރިއުޅޭ ދިވެހި ރައްޔިތުންނަށް ނޫންކަމުގައި ބަޔާންކުރައްވަމުން، ސަރުކާރުން ހުޅުމާލެ ތަރައްޤީކުރަނީ ހުރިހާ ދިވެހި ރައްޔިތުންނަށް ކަމުގައި ވިދާޅުވިއެވެ. މިރޮނގުން އެމަނިކުފާނުގެ ވާހަކަފުޅު ކުރިއަށް ގެންދަވަމުން، ކުދި ރަށްރަށުގައި ތިއްބެވި ހުރިހާ ޒުވާނުންނަށް ހުޅުމާލެއަށް ހިޖުރަކުރުމަށް ތައްޔާރުވެ ތިބުމަށް އެމަނިކުފާނު އިލްތިމާސްކުރެއްވިއެވެ." އަޅުގަނޑުމެން މި ދަޢުވަތު އަރުވަނީ، މި ޝަހަރު އުފެދިގެން ދިޔައީމަ، މި ރަށްރަށުން ޒުވާނުން ވަޑައިގަންނަވާށޭ. އަޅުގަނޑުމެން ފަސޭހަގޮތްތަކެއް ހަމަޖައްސައިދޭނަމޭ. ޒުވާނުން މިކޮޅަށް ހިޖުރަކުރުމާއެކީ އިރާދަކުރެއްވިއްޔާ، ޒުވާނުންނަށް އެކަށީގެންވާ ވަޒީފާތަކެއްވެސް ހުޅުމާލެއާއި މާލޭގެ ސަރަޙައްދުން އުފައްދައިދޭނަން" ރައީސުލްޖުމްހޫރިއްޔާ ވިދާޅުވިއެވެ.ރައީސުލްޖުމްހޫރިއްޔާގެ ވާހަކަފުޅުގައި، ހުޅުމާލޭ ދެވަނަ ފިޔަވަހީގެ މަޝްރޫޢު ނިމިގެންދާއިރު، ހުޅުމާލޭގައި މިހާރު ދިރިއުޅޭ ސާޅީސްހާސް މީހުންގެ އާބާދީއާއެކު، ވިހިހާހާ ގާތްކުރާ އާބާދީއެއް ދިރިއުޅޭނެކަމުގައި ވިދާޅުވިއެވެ. މިގޮތުން، ހުޅުމާލޭގައި ދިރިއުޅޭ ރައްޔިތުންނަށް ދަތުރުފަތުރުގެ ލުއިފަސޭހަކަން ހޯދައިދިނުމުގެ ގޮތުން، މިއަހަރުގެ ތެރޭގައި ޗައިނާ ސަރުކާރުގެ އެހީގައި މާލެއާއި-ހުޅުމާލެއާއި ދޭތެރޭ އެޅުމަށް ހަމަޖެހިފައިވާ ބްރިޖުގެ މަސައްކަތް ފެށިގެންދާނެކަމުގައި އެމަނިކުފާނު ފާހަގަކުރެއްވިއެވެ. މީގެއިތުރަށް، އެމް.ޓީ.ސީ.ސީ ފެރީގެ ޚިދުމަތްތައް ހަރުދަނާކުރުމަށްޓަކައި، ފެރީ އިތުރުކުރުމުގެ މަސައްކަތްތަކެއް މިހާރު އެކުންފުނިން ވަނީ ފަށާފައިކަމުގައި ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.