ގދ. އަތޮޅު ރިސޯޓެއްގެ ކައިރިއަށް އެންހިފުމަށްޓަކައި ވައިފުޅި އަޅައިގެން ފީނަން ފޭބި 3 މީހުންގެ ތެރެއިން އެންމެ ހާލުބޮޑުވި މީހާ މަރުވެއްޖެއެވެ.
ގދ. ގައި އޮންނަ "އައުޓްރިގާ ކޮނަންޓާ މޯލްޑިވްސް ރިސޯރޓް" ކައިރިޔަށް ވައިފުޅި އަޅައިގެން ފީނަން ފޭބި ތިން މީހުންގެ ތެރެއިން މަރުވަފެއިވަނީ އުމުރުން 37 އަހަރުގެ އަމީތު ސަޢީދުއެވެ. އަދި ސީރިއަސް ހާލަތެއްގައި އޮތް އުމުރުން 24 އަހަރުގެ މީހާ މިހާރު މާލެ ގެނެސް އައިޖީއެމްއެޗްގައި ފަރުވާދެމުންދާކަމަށް އެމްއެންޑީއެފުން ބުނެއެވެ.
"ހުޝިޔާރު" ނަމަކަށް ކިޔާ ދޯންޏަކުން، އެންހިފުމަށްޓަކައި ވައިފުޅި އަޅައިގެން ފީނަން ފޭބި 3 މީހެއްގެ ހާލު ދެރަވިކަމުގެ މަޢުލޫމާތު އެމްއެންޑީއެފް ސަދަން އޭރިއާ އަށް އަންގާފައިވަނީ، ގދ.ތިނަދޫ ޕޮލިސް ސްޓޭޝަނުން ފަތިހު 5:14 ހާއިރުކަމަށް އެމްއެންޑީއެފުން ބުނެއެވެ. މިކަމުގެ ރިޕޯރޓް ލިބުމާއި އެކު ގދ. ތިނަދޫ ސީ އެމްބިއުލާންސް، މި ދޯނި އޮތް ސަރަހަށްދަށް ގޮސް ހާލު ދެރަ ތިން މީހުން އަރުވައިގެން މިއަދު ހެނދުނު 6:05 ހާއިރު ގދ. ތިނަދޫ އަށް ގެންގޮސް، ތިނަދޫ ހޮސްޕިޓަލުގައި ފަރުވާދޭން ފަށާފައިވާކަމަށްވެސް އެމްއެންޑިއެފުން ބުނެއެވެ.
ފީނަން ފޭބި ތިން މީހުންނަކީވެސް ދިވެހިންކަމަށް އެމްއެންޑީއެފުން މަޢުލޫމާތުދެއެވެ. މި މީހުންގެ ތެރޭގައި ހިމެނެނީ 37 އަހަރާއި 24 އަހަރާއި 31 އަހަރުގެ މީހެކެވެ. މީގެ ތެރެއިން އުމުރުން 24 އަހަރުގެ ޒުވާނާ ހާލު ދެރަވެގެން އިތުރުފަރުވާޔަށް މާލެ ގެނެސްފައިވާއިރު، 31 އަހަރުގެ މީހާގެ ހާލު ރަނގަޅު ވަމުން އަންނަ ކަމަށް އެމްއެންޑީއެފުން ބުނެއެވެ.
އެންހިފުމަށް 4 މީހަކު ފުޅި އަޅައިގެން ފީނުމަށް ފޭބިކަމުގެ މަޢުލޫމާތު ލިބޭއިރު، މިމީހުން 44 މީޓަރަށް ވައި ފުޅި އަޅައިގެން 35 މިނިޓުވަންދެން ފީނާފައިވާކަމުގެ މަޢުލޫމާތު ލިބިފައިވާކަމަށްވެސް އެމްއެންޑީއެފުން ބުނެއެވެ.