އަންނަ އަހަރުގެ މާޗް މަހު ބޭއްވުމަށް ހަމަޖެހިފައިވާ ރައްޔިތުން މަޖިލީހުގެ އިންތިޚާބުގައި އަދާލަތު ޕާޓީން 13 ދާއިރާއަކަށް ވާދަކުރާނެ ކަމަށް އެޕާޓީން މިއަދު ބުނެފިއެވެ.
އަދާލަތު ޕާޓީން ބުނެފައިވަނީ ކޯލިޝަންގެ ތެރޭގައި ހިމެނޭ ސިޔާސީ ޕާޓީތަކުގެ ތެރޭގައި ހިމެނޭ އެމްޑީޕީއާ ޖުމްހޫރީ ޕާޓީ އަދި ކުރީގެ ރައީސް އަލްއުސްތާޒް މަޢުމޫން ޢަބްދުލްޤައްޔޫމާއި އެކު އަދާލަތު ޕާޓީގެ ފަރާތުން އެއްބަސްވެ ސޮއިކޮށްފައިވާ އެއްބަސްވުމާއި އެއްގޮތަށް އަންނަ މާޗް މަހު ބޭއްވުމަށް ހަމަޖެހިފައިވާ މަޖިލިސް އިންތިޚާބުގައި އެޕާޓީގެ ފަރާތުން 13 ދާއިރާއަކަށް ވާދަކުރާނެ ކަމަށެވެ.
އަދާލަތު ޕާޓީން ވާދަކުރާ 13 ދާއިރާވެސް ވަނީ ޢާއްމުކޮށްފައެވެ. އެގޮތުން އެޕާޓީން މަޖިލިސް އިންތިޚާބުގައި ވާދަކުރާ ދާއިރާތަކަކީ ކެލާ ދާއިރާ، ވައިކަރަދޫ ދާއިރާ، ކުޅުދުއްފުށީ އުތުރު ދާއިރާ، މަކުނުދޫ ދާއިރާ، އިނގުރައިދޫ ދާއިރާ، މަހިބަދޫ ދާއިރާ، މުލަކު ދާއިރާ، ނިލަންދޫ ދާއިރާ، ގަމު ދާއިރާ، ފުވައްމުލަކު ދެކުނު ދާއިރާ، ފޭދޫ ދާއިރާ، އަދި މާފަންނު ދެކުނު ދާއިރާއެވެ.
އަންނަ އަހަރު ބާއްވާ މަޖިލިސް އިންތިޚާބުގައި އަދާލަތުން ވާދަކުރަން ނިންމާ ދާއިރާތައް އިޢުލާންކުރިއިރު ކޯލިޝަންގެ މައިޕާޓީ އެމްޑީޕީން ވަނީ އަންނަ މަޖިލިސް އިންތިޚާބުގައި މުޅި މަޖިލީހަށް ކުރިމަތިލުމަށް އެޕާޓީގެ ޤައުމީ މަޖިލީހުން ރޭ ފާސްކޮށްފައެވެ. ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދުގެ މި ހުށަހެޅުން ރޭ ބޭއްވި އެމްޑީޕީގެ ޤައުމީ މަޖިލީހުން ފާސްވިއިރު މަޖިލިސް އިންތިޚާބުގައި ކޯލިޝަން ޕާޓީތަކަށް މަޖިލިސް ގޮނޑިތައް ބަހާނެ ގޮތުގެ އެއްބަސްވުމެއް ވެސް ސޯޝަލް މީޑިއާގައި މިހާރު ވަނީ ލީކްވެފައެވެ.
އެމްޑީޕީގެ ޗެއަރޕާސަން ޙަސަން ލަތީފާއި ރައީސް އިބްރާޙީމް މުޙައްމަދު ޞާލިޙު ސޮއިކުރައްވާފައިވާ އެ އެއްބަސްވުމުގައިވާ ގޮތުގައި ގުޅިފައިވާ ސަރުކާރެއްގައި އިއްތިހާދުގެ ބައިވެރިން ޙިއްސާވާ ހަމައަކީ އެމްޑީޕީއަށް 40 ޕަސަންޓު، ޖުމްހޫރީ ޕާޓީއަށް 25 ޕަސަންޓު، އަދާލަތު ޕާޓީއަށް 15 ޕަސަންޓު އަދި ރައީސް މައުމޫން އަބްދުލް ގައްޔޫމްއަށް 20 ޕަސަންޓެވެ.
މި އެއްބަސްވުމުގައިވާ ގޮތަށް ބަލާއިރު އަދާލަތު ޕާޓީއަށް ލިބޭނީ 13 ދާއިރާއެވެ. އެހެންކަމުން ބޮޑަށް ބެލެވެނީ އަދާލަތު ޕާޓީން 13 ދާއިރާއަށް ވާދަކުރަން ނިންމީ މި އެއްބަސްވުމަށް ބެލުމަށްފަހުއެވެ. ނަމަވެސް އެމްޑީޕީގެ ޗެއަރޕާސަން ޙަސަން ލަތީފް ވިދާޅުވީ ރައްޔިތުން މަޖިލީސް އިންތިހާބުގައި ދާއިރާތައް ބަހާނެ ގޮތަކާ މެދު ކޯލިޝަންގެ މެދުގައި އެއްބަސްވުމެއް ނޯންނާނެ ކަމަށެވެ.