ރައްޔިތުން މަޖިލީހުގައި ކުރަންހުރި މަސައްކަތްތައް ގިނަކަމުން، އެ މަސައްކަތްތައް ނިންމާފައި ނޫނީ ޗުއްޓީއަށް ނުދާން މަޖިލީހުން ނިންމައިފިއެވެ.
ރައްޔިތުން މަޖިލީހުގައި މިހާރު ކުރިއަށްދަނީ މަޖިލީހުގެ އެންމެ ފަހު ދައުރެވެ. މަޖިލީހުގެ ޤަވާއިދަށް މިހާރު ގެނެސްފައިވާ އިޞްލާހުގައިވާ ގޮތުން ތިން ވަނަ ދައުރުގެ ޖަލްސާތައް ކުރިއަށް ދާނީ އޮގަސްޓް 27 އިން ފެށިގެން ނޮވެމްބަރު މަހުގެ ނިޔަލަށެވެ.
ރައްޔިތން މަޖިލީހުގެ ރައީސް ޤާސިމް އިބްރާޙީމް ވިދާޅުވީ މަޖިލީހުގެ އެންމެ ފަހު ދައުރުގެ މަސައްކަތްތައް ކުރިއަށްދާއިރު އާ ސަރުކާރުން މުހިއްމު މަސައްކަތްތަކެއް މަޖިލީހަށް ހުށަހަޅާފައިވާ ކަމަށެވެ. މަޖިލީހުގެ ތިންވަނަ ދައުރު ދިގު ދަންމަން ނިންމީ ކޯލިޝަންގެ ލީޑަރުންނާއި މަޝްވަރާ ކުރުމަށްފަހު ކަމަށްވެސް އެމަނިކުފާނު ވިދާޅުވިއެވެ.
ތިންވަނަ ދައުރު އަންނަ މަހުގެ ފަސްވަނަ ދުވަހާއި ހަމައަށް ދިގު ދަންމާލަން، ރިޔާސަތުން ވޯޓަށް އެހުމުން އެ ނިންމުން ފާސްވީ 71 މެމްބަރުންގެ ތެރެއިން 70 މެމްބަރުންގެ އަޣުލަބިއްޔަތަކުންނެވެ.
ރައްޔިތުންގެ މަޖިލީހުގެ ތިންވަނަ ދައުރު ދިގު ދަންމާލަން ނިންމިއިރު ސަރުކާރުގެ ފަރާތުން މިހާރުވެސް ވަނީ މުހިއްމު މަސައްކަތްތަކެއް މަޖިލީހަށް ހުށަހަޅާފައެވެ.