އިޖުތިމާޢީ ދާއިރާއިން ގިނަ ޚިދުމަތްތަކެއް ކުރައްވާފައިވާ ޚިދުމަތްތެރިއެއްކަމަށްވާ ޝަމީމާ ކަނބުލޭގެފާނު އަވަހާރަވެއްޖެއެވެ.
ޝަމީމާ އަކީ އެމްއެމްއޭގެ ކުރީގެ ގަވަރނަރ އާޒިމާ އާދަމާއި މަޝްހޫރު އެނައުންސަރ އާމިލާ އާދަމާއި އަދި މަޝްހޫރު ޑައިރެކްޓާރ އަޝްހަރު ވަހީދުގެ މަންމައެވެ.
ޝަމީމާއަކީ، ވަރަށްކުރިއްސުރެ ސްކޫލް ކުދިންގެ ބެޖް ހައްދަވަމުގައި މާލޭގައި މަޝްހޫރު ބޭކަނބަލެކެވެ. އަދި މި މަސައްކަތް އެހެން މީހުންނަށް ދަސްކޮށްދެއްވުމަށްޓަކައި 1986 ވަނަ އަހަރުން ފެށިގެން ފަހާފޮށިން މާޖަހަން ދަސްކޮށްދެއްވަން ފަށްޓަވާފައި، މިމަސައްކަތް ފުޅާކުރައްވައި "ސަރަނގު ޖަރީ"ގެ ނަމުގައި ކްލާހެއް ރަޖިސްޓަރީ ކުރައްވައި ހިންގަވާފައިވެއެވެ.
އަގަށާއި ހިލޭސާބަހަށް މި މަސައްކަތް ދަސްކޮށްދެއްވުމުގައި އޭނާއަކީ މަޝްހުރު ބޭކަނބަލެކެވެ. ފެހުމާއި ޖަރީގެ މަސައްކަތުގެ ރޮނގުން 1993 ވަނަ އަހަރު ޝަމީމާއަށްވަނީ ހިތްވަރުދިނުމުގެ އިނާމު ލިބިވަޑައިގެންފައިވެއެވެ. އަދި 2007 ވަނަ އަހަރު އޭނާއަށްވަނީ ޢާއްމު ޚިދުމަތުގެ ހިތްވަރު ދިނުމުގެ އިނާމު ލިބިވަޑައިގެންފައެވެ. މީގެ އިތުރުން އިޖުތިމާޢީ ޚިދުމަތުގެ ދާއިރާއިން ޖަމާޢަތަށް ފައިދާހުރި މަސައްކަތްތައް ކުރުމުގެ ރޮނގުން މިއަހަރު އޭނާއަށްވަނީ ޝަރަފުވެރިކަމުގެ ޤައުމީ އިނާމު ލިބިވަޑައިގެންފައެވެ.