މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ފުވައްމުލައް ކަލެކްޝަން ސެންޓަރ ފަޅާލައި އެތަނުގެ ތިޖޫރީގައި ހުރި ފައިސާތަކެއް ވަގަށްނަގައިފިއެވެ.
ޕީއެސްއެމް ނިއުސްއަށް މަޢުލުމާތު ދެއްވަމުން ފުލުހުންބުނީ އެފަދަ މައްސަލައެށް ރިޕޯޓްކޮށްފައިވާކަމަށާ ރިޕޯޓްކޮށްފައިވަނީ މިއަދު ހެނދުނު ހަތްގަޑި ސާޅީސް ފަހެއް ހައިއިރުކަމަށެވެ. ފުވައްމުލައް ކަލެކްޝަން ސެންޓަރ ފަޅާލާފައިވަނީ އެތަނުގެ ކުޑަދޮރެއް ހަލާކުކޮށްލައިގެން ކަމަށްވެސް ފުލުހުން ބުނެއެވެ.
ފުލުހުން ބުނީ ފުވައްމުލަކު ކުރީގެ ފުނާޑު ކައުންސިލް ހުރި ޢިމާރާތުގައި ހިންގާ މީރާގެ ފުވައްމުލައް ކަލެކްޝަން ސެންޓަރގެ ތިޖޫރީ ފަޅާލައި ފައިސާތަކެއް ވަގަށް ނަގާފައިވާ ކަމަށެވެ. ނަމަވެސް ޓެކްސްގެ ގޮތުގައި ލިބިފައިވާ އެއްވެސް ފައިސާއެއް ގެއްލިފައިނުވާކަމަށާއި ފަޅާލި ތިޖޫރީގައި ހުންނާނީ ތަނުގައި ޕެޓީ ކޭޝްގެ ގޮތުގައި ބޭނުންކުރަމުންދާ މަދު އަދަދެއްގެ ފައިސާކަމަށް މީރާއިން ބުނެއެވެ.
މިމައްސަލައާ ގުޅިގެން އެއްވެސް މީހަކު ހައްޔަރުކޮށްފައި ނުވާކަމަށް ފުލުހުން މައުލޫމާތު ދީފައިވެއެވެ. މިމައްސަލަ ފުލުހުން ދަނީ އިތުރަށް ބަލައި ތަހުގީގުކުރަމުންނެވެ.