ދިވެހިރާއްޖޭގެ 7 ވަނަ ރައީސުލްޖުމްހޫރިއްޔާ، އިބްރާހިމް މުހައްމަދު ޞާލިހު މަޤާމުގެ ހުވާ ކުރައްވައިފިއެވެ.
ގަލޮޅު ދަނޑުގައި ބޭއްވި ކުލަގަދަ ރަސްމިއްޔާތެއްގައި އިބްރާހިމް މުހައްމަދު ސާލިހަށް ރައީސުލްޖުމްހޫރިއްޔާގެ މަޤާމުގެ ހުވާ ލައިދެއްވީ، ދިވެހިރާއްޖޭގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީއެވެ. ނާއިބު ރައީސްގެ މަޤާމާ ހަވާލުވެވަޑައިގަތް ފައިސަލް ނަސީމަށްވެސް މަޤާމުގެ ހުވާ ލައިދެއްވީ ދިވެހިރާއްޖޭގެ އުއްތަމަ ފަނޑިޔާރެވެ.
އިބްރާހިމް މުހައްމަދު ސާލިހު ރައީސުލްޖުމްހޫރިއްޔާގެ މަޤާމުގެ ހުވާ ކުރެއްވުމުން، ދިވެހިރާއްޖޭގެ ޤައުމީ ދިފާޢީ ބާރުން 21 ބަޑީގެ ސަލާމެއް އެރުވިއެވެ. މަޤާމުގެ ހުވާކުރެއްވުމަށްފަހު ރައީސް އިބްރާހިމް މުހައްމަދު ސާލިހުއާއި ނާއިބު ރައީސް ފައިސަލް ނަސީމް މަޤާމުގެ އިޤުރާރުގައި ސޮއިކުރެއްވިއެވެ.
ރައީސުލްޖުމްހޫރިއްޔާގެ މަޤާމާ ހަވާލުވެވަޑައިގަތުމަށްފަހު ޤައުމާ މުޚާތަބްކުރައްވާ ދެއްކެވި ވާހަކަފުޅުގައި ފުރަތަމަ ސަތޭކަ ދުވަސްތެރޭގައި އެމަނިކުފާނު ހާސިލުކުރަން ބޭނުންފުޅުވާ ކަންކަން ހާމަކުރެއްވިއެވެ. މީގެ އިތުރުން އެމަނިކުފާނުގެ ސަރުކާރުގެ ސިޔާސަތުތަކާއި އިޤްޞާދީގޮތުންނާއި އުމްރާނީގޮތުން ރާއްޖެ ތަރައްޤީކުރައްވަން ބޭނުންފުޅުވާ ތަސައްވުރު ހާމަކޮށްދެއްވިއެވެ.
ރައީސް އިބްރާހިމް މުހައްމަދު ސާލިހުގެ ހުވާކުރެއްވުމުގެ ރަސްމިއްޔާތުގައި ދައުލަތުގެ އިސްވެރިން ހިމެނޭ ގޮތަށް ގިނަ އަދަދެއްގެ ބަޔަކު ބައިވެރިވިއިރު އެބޭފުޅުންގެ ތެރޭގައި ކުރީގެ ރައީސް މައުމޫން، ކުރީގެ ރައީސް ނަޝީދު އަދި ކުރީގެ ރައީސް ވަހީދުވެސް ހިމެނިވަޑައިގަންނަވައެވެ. މީގެ އިތުރުން އިންޑިއާގެ ބޮޑުވަޒީރު ނަރެންދުރަ މޯދީއާއި ސްރީލަންކާގެ ކުރީގެ ރައީސް ޗަންދްރިކާ ކުމާރަތުންގާ އަދި ބައެއް ޤައުމުތަކުގެ އިސްވެރިންގެ މަންދޫބުންވެސް މިރަސްމިއްޔާތުގައި ބައިވެރިވެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މަޤާމުގެ ހުވާ މިއަދު ކުރެއްވިއިރު، މިދިޔަމަހުގެ 23 ވަނަ ދުވަހު ބޭއްވި ރިޔާސީ އިންތިޚާބު، ކުރީގެ ރައީސް ޔާމީންއާ ވާދަކޮށް، ރައީސް އިބްރާހިމް މުހައްމަދު ޞާލިހު ކާމިޔާބުކުރެއްވީ 58 ޕަސަންޓުގެ ބޮޑު އަޣްލަބިއްޔަތަކުންނެވެ.