ސަރުކާރު ހިއްސާވާ ކުންފުނިތަކަށް ސިޔާސީ ބޭފުޅުންގެ ނާޖާއިޒު ނުފޫޒު ވަރަށް ބޮޑަށް ފޯރާފައިވާކަމަށް ވެރިކަން ބަދަލުވުމުގެ މަރުހަލާގެ ކަންކަން ކުރިއަށްގެންދާ ޓްރާންސިޝަން ކޮމެޓީން ބުނެފިއެވެ.
ޓްރާންސިޝަން ކޮމެޓީގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެކޮމިޓީގެ މެމްބަރު އިލްޔާސް ލަބީބު ވިދާޅުވީ، ކުންފުނިތަކާ ހަވާލުކޮށްފައިވާ މަސްޢޫލިއްޔަތުގެ ބޭރުން، ޤާނޫނާ ޚިލާފަށް ސިޔާސީ ބޭނުމަށް ކުންފުނިތައް ބޭނުންކޮށްފައިވާކަމަށެވެ. އަދި ކުންފުނިތަކުގެ ވެރިންގެ ގޮތުގައި ސުޕަރ ސީ.އީ.އޯއިންގެ ނަމުގައި ބޭފުޅުން އައްޔަނުކޮށްފައިވާކަންވެސް އިލްޔާސް ލަބީބް ފާހަގަކުރެއްވިއެވެ.
ޓްރާންސިޝަން ކޮމެޓީން ބުނީ ހުރިހާ ކުންފުނިތަކުގައިވެސް ދަރަނި ބޮޑުކަމަށާއި ޕްރޮކިއުމަންޓް މަރުހަލާތައް ހެދިފައިވީނަމަވެސް އެމަރުހަލާތަކަށް ބެލުމެއް ނެތި ކޮރަޕްޝަނަށް މަގުފަހިވާގޮތަށް ކަންކަން ހިންގާފައިވާކަން ޓްރާންސިޝަން ކޮމެޓީން ފާހަގަކުރިއެވެ.
މީގެއިތުރުން ކުންފުނިތަކަށް ބޯޑުތަކަށް މެމްބަރުން އައްޔަންކޮށްފައިވަނީވެސް އެއްވެސް ފައިދާއެއް ކުރާގޮތަށް ނޫންކަމަށާއި މިކަންކަން އައު ސަރުކާރުން ރަނގަޅުކުރާނެކަމަށް އިލްޔާސް ލަބީބް ވިދާޅުވިއެވެ.
ޓްރާންސިޝަން ކޮމެޓީގެ ފަރާތުން ބޭއްވި ޕްރެސް ކޮންފަރެންސްގައި އެމް.ޕީ.އެލް، އެމް.ޓީ.ސީ.ސީ، ގްރޭޓާރ މާލެ އިންޑަސްޓްރިއަލް ޒޯން، އެޗް.ޑީ.ސީ އަދި އައްޑޫ އިންވެސްޓްމަންޓް ކުންފުންޏާއި ގުޅޭގޮތުން ހޯދި ހޯދުންތައް މީޑިއާތަކާ ހިއްސާކުރެއްވިއެވެ.