އޮމާން އެއަރގެ ޝެޑިއުލް ދަތުރުތައް މެދުކެނޑުމަކަށްފަހު އަލުން ރާއްޖެއަށް ފަށައިފިއެވެ.
އޮމާން އެއަރގެ ޝެޑިއުލް ދަތުރުތައް އޮމާންގެ މަސްކަޓްއާއި ރައްޖެއާއި ދެމެދު ފަށާފައިވާއިރު، ހަފްތާއަކު 4 ދުވަހު ދަތުރުތައް އޮންނާނެކަމަށް އޮމާން އެއަރއިން ބުނެއެވެ. މެދުކެނޑުމަކަށްފަހު އަލުން ދަތުރުތައް ފަށާފައިވާއިރު ރައްޖެއާއި މަސްކަޓާ ދެމެދު ދަތުރުކުރަން ބޭނުންކުރަނީ ސަތޭކަ ފަސްދޮޅަސް ދެ ފަސިންޖަރުންގެ ޖާގައިގެ "ބޮއިން 737 މެކްސް 8" މަރުކާގެ ބޯޓެއްކަމަށް އޮމާން އެއަރއިން ބުނެއެވެ.
މި ބޯޓުގައި ބިޒްނަސް ކްލާހުގެ ބާރަ ޖާގަ ހިމެނޭއިރު އިކޮނޮމީ ކްލާހުގެ ސަތޭކަ ފަންސާސް ޖާގަ ހިމެނެއެވެ. އޮމާންއިން ރާއްޖެއަށް ކުރާ ދަތުރުތައް ކުރުމަށް ހަމަޖެހިފައިވަނީ އޮމާންގެ މަސްކަޓުން ކޮލަމްބޯއަށެވެ. އަދި ކޮލަމްބޯއިން މާލެއަށެވެ.
އޮމާން އެއަރގެ ދަތުރުތައް ފެށުމާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އޮމާން އެއަރގެ ޗީފް ކޮމަރޝަލް އޮފިސަރ ޕޯލް ސްޓާރސް ވިދާޅުވީ އޮމާން އެއަރގެ ދަތުރުތައް އަލުން ފަށާއިރު ޚާއްސަ ޕެކޭޖްތަކެއްވެސް ތަޢާރަފްކުރުމަށް ހަމަޖެހިފައިވާކަމަށެވެ.
އޮމާން އެއާއިން މަސައްކަތްކުރަމުންދަނީ 2022 ވަނަ އަހަރާ ހަމައަށް އެ އެއާލައިނުން ދަތުރުކުރާ މަންޒިލްތައް ފަސްދޮޅަހަށް އިތުރުކުރުމަށް މަސައްކަތްކުރަމުންނެވެ. އެގޮތުން އެ އަމާޒަށް ވާސިލުވުމަށް ރާއްޖެއަކީ މުހިއްމު މަންޒިލެއްގެ ގޮތުގައި އޮމާން އެއާރއިން ފާހަގަކުރެއެވެ.
2009 ވަނަ އަހަރުން ފެށިގެން އޮމާނުން ރާއްޖެއަށް ކުރަމުން އައި ދަތުރުތައް 2016 ވަނަ އަހަރު ހުއްޓާލަންޖެހުނީ އެކަށީގެންވާ ޑިމާންޑް ނެތުމުންކަމަށް އޮމާން އެއަރއިން ބުނެއެވެ.