އިންތިޚާބީ ރައީސް އިބްރާހީމް މުޙައްމަދު ޞާލިޙް ހުވާ ކުރައްވާ ދުވަހަކީ ނޮވެމްބަރު މަހުގެ 17ވަނަ ދުވަސް ކަމަށް ރައްޔިތުންގެ މަޖިލީހުގެ ވަގުތީ ކޮމިޓީން ފާސްކޮށްފިއެވެ.
މިއަދު ބެއްވި ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ފުރަތަމަ ޖަލްސާގައިވަނީ
އިންތިޚާބީ ރައީސް އިބްރާހީމް މުޙައްމަދު ޞާލިޙް ހުވާކުރައްވާ ޖަލްސާ ބާއްވާނެ ދުވަހެއް ކަނޑައެޅުމާމެދު މެންބަރުންގެ މެދުގައި ބަހުސްކޮށްފައެވެ. ބަހުސަށްފަހު މަޖިލިސް ނިންމާލީ 7 މެންބަރުންގެ ވަގުތީ ކޮމެޓީއަކުން ހުވާކުރާނެ ދުވަސް ކަނޑައެޅުމަށެވެ.
ހެންވޭރު އުތުރު ދާއިރާގެ މެންބަރު އަބްދުﷲ ޝާހިދާއި، އައްޑޫ މީދޫ ދާއިރާގެ މެންބަރު ރޮޒެއިނާ އާދަމްއާއި، ކެލާ ދާއިރާގެ މެންބަރު އަލީ އާރިފްގެ އިތުރުން، މަތިވެރި ދާއިރާގެ މެންބަރު ހުސެއިން މުހައްމަދާއި، ކަނޑިތީމު ދާއިރާގެ މެންބަރު މުހައްމަދު ހުސެއިންއާ، ކުވަދޫ ދާއިރާގެ މެންބަރު އަހުމަދު އާމިރުގެ އިތުރުން، ވިލުފުށީ ދާއިރާގެ މެންބަރު ރިޔާޒް ރަޝީދު ހިމެނިވަދައިގަތް މިކޮމެތީގެ އަޣްލަބިއްޔަތުން ނިންމާފައިވަނި 23 ސެޕްޓެމްބަރު ގައި ބޭއްވި ރިޔާސީ އިންތިޚާބު ކާމިޔާބުކުރެއްވި އިބްރާހީމް މުޙައްމަދު ސާލިޙް ރައީސުލްޖުމްހޫރިއްޔާކަމުގެ ހުވާކުރައްވާނީ އަންނަ ނޮވެންބަރު މަހުގެ 17 ވަނަ ދުވަހުކަމަށެވެ.
މިކޮމެޓީގައި ހިމެނިވަޑައިގަންނަވާ ކެލާދާއިރާގެ މެންބަރު ޢަލީ އާރިފް ވިދާޅުވީ، ކޮމެޓީ ބައްދަލުވުމުގައި އެއްވެސް މެންބަރަކު މިނިންމެވުމާ ދެކޮޅުހައްދަވާފައި ނުވާކަމަށެވެ. މިއަދު ބެއްވި ރައްޔިތުންގެ މަޖިލީހުގެ ޖަލްސާގައި ސަރުކާރަށް ތާއީދުކުރާ މެންބަރުންނާއި، އިދިކޮޅު ކޯލިޝަނުގެ މެންބަރުންގެ މެދުގައިވަނީ މިމައްސަލައިގަ ހޫނު ބަހުސެއް ކުރިއަށް ގެންގޮސްފައެވެ. އަދި ސަރުކާރަށް ތާޢީދުކުރައްވާ މެންބަރުން ވަނީ ޤާނޫނު އަސާސީގައި ރައީސުލްޖުމްހޫރިއްޔާ ކަން ކުރައްވާ ބޭފުޅަކު ފަސް އަހަރުގެ ދައުރެއް ފުރިހަމަ ކުރަން ޖެހޭކަން ފާހަގަކުރައްވާފައެވެ.
އެހެންކަމުން މިހާރުގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްޤައްޔޫމް ވެރިކަމުގެ ހުވާކުރެއްވީ 2013 ނޮވެންބަރު 17 ގައި ކަމުން އެމަނިކުފާނުގެ ފަސް އަހަރުގެ ދައުރު ހަމަވާނީ އަންނަ ނޮވެންބަރު 17އަށް ކަމަށެވެ.