ޑަބްލިއު އެޗްއޯ ދެކުނު އިރުމަތީ އޭޝިޔާގެ "ލެޕްރަސީ ނެޝަނަލް ޕްރޮގްރާމް މެނޭޖަރުން" ގެ ބައްދަލުވުމުގައި ރާއްޖެއިން ބައިވެރިވެއްޖެއެވެ.
މި ޞަރަޙައްދުގެ އެގާރަ ޤައުމަކުން ބައިވެރިވި މި ބައްދަލުވުމުގައި މައިގަނޑު ގޮތެއްގައި މަޝްވަރާ ކޮށްފައިވަނީ ލެޕްރަސީ ނައްތާލުމަށް ހުރި ގޮންޖެހުންތަކާ އެގޮންޖެހުންތަކުން އަރައިގަތުމައް ކުރެވިދާނެ ކަންތައްތަކާބެހޭ ގޮތުންނެވެ. އަދި ލެޕްރަސީ ނައްތާލުމަށް މެމްބަރު ޤައުމުތަކުން މިހާތަނަށް ހޯދާފައިވާ ކާމިޔާބީތައް ދެނެގަނެ، މި ބަލިން ރައްކާތެރިވުމަށް ކުރެވިދާނެ ކަންތައްތައް ދެނެގަތުމާބެހޭ ގޮތުންވެސް ބައްދަލުވުމުގައި ވަނީ މަޝްވަރާ ކޮށްފައެވެ.
އެގޮތުން ދުނިޔޭގެ ޞިއްޙަތު ޖަމްޢިއްޔާއިން އެންމެފަހުން ޢާއްމުކުރި ގައިޑްލައިނުގަވާ ކަންތައްތަކާއި ލެޕްރަސީ ނައްތާލުމަށް ޒަމާނާއެކު އުފައްދަމުންދާ އާ އީޖާދުތަކާއި މިބައްޔަށް ދެވޭ ބޭސްތައް ރައްކާތެރިކަމާއެކު ހިލޭ ފޯރުކޮށްދިނުމާއި، ލެޕްރަސީ ކޮންޓްރޯލް ކުރުމަށް ދެކުނު އިރުމަތީގެ އޭޝިޔާގެ ޤައުމުތަކުން ކުރިޔަށްގެންދާ ސަވައިލެންސް ޕްރޮގުރާމާއި ، އޭގެ ސަބަބުން އަންނަ ބަދަލުތައް ދެނެގަތުމާއި ގުޅެ ގޮތުން މަޝްވަރާ ކުރިއެވެ. ރާއްޖޭގެ ފަރާތުން ބައިވެރިވި ޓީމުން ވަނީ ރާއްޖެ ފަދަ ލެޕްރަސީ ބަލި ނައްތާލެވިފައިވާ ޤައުމުތަކުން މިބަލި އިތުރަށް ނުޖެހޭނެ ފަދަ ގޮތްތައް ދެނެގަނެ، ބަލިން ރައްކާތެރިވުމަށް ކުރެވިދާނެ ކަންތައްތަކާގުޅޭ ގޮތުން ބައްދަލުވުމުގައި ޚިޔާލު ބަދަލުކޮށްފައެވެ.
މިމަހުގެ 24 އިން 25 އަށް ސްރީލަންކާގެ ކޮލޮމްބޯގަ ބޭއްވި މިބައްދަލުވުމުގައި ދުނިޔޭގެ ޞިއްޙަތު ޖަމްޢިއްޔާގެ ކަމާ ބެހޭ މާހިރުންނާއި ، ތަޖުރިބާކާރުންނާއި، ލެޕްރަސީއާއި ދެކޮޅަށް މި ޞަރަޙައްދުގައި މަސައްކަތް ކުރާ ޕްރޮގްރާމްތަކުގެ މަންދޫބުން ބައިވެރިވިއެވެ.
2020 ގައި ދުނިޔެއިން ލެޕްރަސީ ނައްތާލުމަށް ދުނިޔޭގެ ޞިއްޙަތު ޖަމްޢިއްޔާއިން އަމާޒު ހިފާފައިވާއިރު ރާއްޖެއިން ވަނީ 1997 ވަނަ އަހަރު މި ބަލި އެއްކޮށް ނައްތާލާފައެވެ.
އެހެންނަމަވެސް އެކި ސަބަބުތަކާއި ހެދި މަދުންނަމަވެސް މިބަލި ރާއްޖެއިން އަދިވެސް ފެންނަމުންދާކަމަށް އެޗްޕީއޭއިން ބުނެއެވެ.