ޙާފިޒު އަޙްމަދު ސްކޫލުގައި ހަފުތާއާކަށް ދެމިގެންދާ ގޮތަށް ޓީޗަރުންގެ ދުވަސް ފާހަގަ ކުރަން ފަށައިފިއެވެ.
ޓީޗަރުންގެ ދުވަހުގެ ޙަރަކާތްތައް ފެށީ މިއަދު ހެނދުނު 8:30 ގައި އެސްކޫލުގައި ބޭއްވި ޚާއްސަ އެސެމްބްލީ އަކުންނެވެ. މި އެސެމްބްލީގައި އެސްކޫލުގެ ދަރިވަރުންނާއި ޓީޗަރުންގެ ތަފާތު ހުނަރު ދައްކުވައިދޭ ތަމްސީލުތަކާއި، މަދަހަ ކިޔުމާއި، ރައިވަރު ކިއުމުގެ އައިޓަމް ތައްވެސް ކުރިއަށް ދިޔައެވެ.
ޙާފިޒު އަޙްމަދު ސްކޫލުގައި ޓީޗަރުންގެ ދުވަސް ހަފުތާއަކަށް ދެމިގެންދާ ގޮތަށް ފާހަނގަކުރާނެ ކަމަށް ޓީޗަރުންނާއި ބެލެނިވެރިންގެ ގުޅުމުން މަޢުލޫމާތު ދެއްވިއެވެ. މި ހަފުތާގެ ޙަރާކާތްތަކުގެ ތެރެއިން މިއަދު ބޭއްވި ޚާއްޞަ އެސެމްބްލީގެ އިތުރުން މިއަދު ހަވީރު 04:00 އިން ފެށިގެން މުދައްރިސުންނާއި ބެލެނިވެރިންގެ ކުޅިވަރު ހަވީރެވެސް ބާއްވާ ގޮތަށް ވަނީ ހަމަޖެހިފައެވެ.
އަދި މިރޭ ވަރަށް ޚާއްސަ ބާބެކިއު މުބާރާތެއް ބެލެނިވެރިންނާއި ޓީޗަރުންގެ މެދުގައި އޮންނާނެކަމަށާއި އަދި މިހަފުތާގައި ބެލެނިވެރިންނާއި ކުދިންގެ ފަރާތުން ތަފާތު އެކި އެކި ސަޕްރައިޒިން އިވެންޓްތަކެއް ކުރިއަށް ދާނެކަމުގެ މައުލޫމާތުވެސް އެފަރާތުން ދެއްވިއެވެ.
"ދެން ކުރިއަށް ހުރި ޓީޗަރުންގެ ދުވަހާއި ގުޅިގެން ކުރިއަށް ހުރި ޕްރޮގްރާމް ތަކުގެ ތެރޭގައި އޮންނާނެ އަންހެން ކަނބަލުނަށްޓަކައި ޚާއްސަކޮއްގެން ބާއްވާ އަންހެނުގެ ދުޅަހެޔޮ ސިއްޚަތަކަށް މަގުފަހިވާ ކަންތައްތަކެއް ކުރުމުގެ ގޮތުން ބާއްވާ ކަސްރަތު ޕްރޮގުރާމެއް. ހަމަ އެއާއި އެކު ބެލެނިވެރިންގެ ގުޅުމުގެ ފަރާތުން މުދައްރިސުންގެ ޝަރަފުގައި ބާއްވާ ޚާއްސަ ޑިނާ އެއްވެސް އޮންނާނެ މިހަފްތާގައި އިތުރު ސަޕްރައިޒިން އިވެންޓްތައް މުދައްރިސުންގެ ޝަރަފްގައި ކުރިއަށްދާނެ" ޓީޗަރުންނާއި ބެލެނިވެރިންގެ ގުޅުމުގެ ޓީޗަރ އާމިނަތު މޫސާ ވިދާޅުވިއެވެ.
ޙާފިޒު އަޙްމަދު ސްކޫލުގައި ކޮންމެ އަހަރަކުވެސް ޓީޗަރުންގެ ދުވަސް ވަރަށް ކުލަގަދަކޮށް ފާހަގަކުރެއެވެ. މިކަމުގައި ބެލެނިވެރިންގެ އެއްބާރުލުން ވަރަށް ބޮޑަށް ލިބިގެންދާނެކަމަށް މަޢުލޫމާތު ލިބެއެވެ.