ވަކި ބޭފުޅަކު ވެރިކަމަށް ކުރިމަތިލުމަކީ އެމްޑީޕީގެ ފަނާކުރަނިވި ފިކުރު ބަދަލުވާނެ ކަމެއްނޫން- މިނިސްޓަރ އަޒްލީން

އެމް.ޑީ.ޕީގެ ފިކުރަކީ ފަނާކުރަނިވި ފިކުރެއްކަމަށާއި، އެޕާޓީން ވެރިކަމަށް އަންނަން މަސައްކަތް ކުރާ ބޭފުޅަކު ބަދަލުވުމަކުން އެ ޕާޓީގެ ފިކުރު ބަދަލެއް ނުވާނެކަމަށް ހޯމް މިނިސްޓަރ އަޒްލީން އަޙްމަދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ޕީ.އެސް.އެމް ނިއުސް އިން ގެނެސްދޭ "ތަރައްޤީ އާ ޒަމާނަކަށް" ޕްރޮގްރާމުގައި ވާހަކަފުޅު ދައްކަފުޅުވަމުންނެވެ.

ހޯމް މިނިސްޓަރ އަޒްލީން އަޙްމަދު ވިދާޅުވީ، އިދިކޮޅު މައި ޕާޓީގެ ގޮތުގައި މިއަދު ހަރަކާތްތެރިވާ އެމް.ޑީ.ޕީގެ މުޅި ފިކުރާ ވިސްނުން ބައްޓަންކޮށްފައިވަނީ ޤައުމު ފަނާ ކުރުމަށްކަމަށާއި، އެކަން މާޒީން ހެކިދޭނެ ކަމަށެވެ. އެގޮތުން ރާއްޖޭގައި ޒަމާންވީ ދިގު ތާރީޚީ ވެރިކަމެއް ބަދަލުކުރުމަށް 2008 ވަނަ އަހަރު ރައްޔިތުން ނިކުތީ ފޮނި އުއްމީދުތަކަކާއެކު ކަމަށާއި، އެހެންނަމަވެސް ރައްޔިތުންނަށް ހެޔޮ ވެރިކަމެއް ކޮށްދޭނެކަމަށް ބުނެ އެމް.ޑީ.ޕީން ވެރިކަމަށް އައުމާއެކު، ދެން ޤައުމުގައި ހިނގާދިޔަ ކަންކަން އެއީ އޮޅުވާލެވެން ނެތް ހަޤީޤަތެއްކަމަށް މިނިސްޓަރ ވިދާޅުވިއެވެ.

މިނިސްޓަރ އަޒްލީން ވިދާޅުވީ، އެމް.ޑީ.ޕީގެ ފިކުރަކީ ޤައުމު ފަނާކުރުމުގެ ފިކުރު ކަމަށާއި، އެޕާޓީގެ ފަރާތުން ވެރިކަމަށް އަންނަން މަސައްކަތް ކުރާ ބޭފުޅަކު ބަދަލުވުމަކުން، އެ ޕާޓީގެ ފިކުރު ބަދަލެއް ނުވާނެކަމަށެވެ.

"2008 ވަނަ އަހަރު ރާއްޖޭގައި ޒަމާންވީ ދިގު ތާރީޚީ ވެރިކަމެއް ބަދަލުކުރުމަށް ރައްޔިތުން އެދިވަޑައިގެންނެވި. ޝައްކެއްވެސް ނެތް. އެކަން އަޅުގަނޑުމެން އެންމެން ދުށީމު. އެހެންނަމަވެސް އެ ބަދަލަކީ، ދެންފެނިގެންދިޔަ ބަދަލުތަކަށް އުއްމީދުކޮށްގެން ރައްޔިތުން ގެންނެވި ބަދަލެއް ނޫނޭ. އެހެންވީމަ އެޕާޓީން ފިކުރެއް ހިފައިގެން އަންނަ އެއްވެސް މީހަކަށް، އެނޫން ފިކުރަކަށް ތަބާވުމުގެ ފުރުޞަތެއް ނޯންނާނެ. އެފިކުރު ހިފައިގެން ނިކުންނަށް މީހަކަށް އިތުރު ޗޮއިސެއް ނޯންނާނެ އެ ފިކުރު ވިއްކުން ފިޔަވާ. އިތުރު ފިކުރެއް ނާންނާނެ. އެހެންވީމަ އެފިކުރުގެ ތެރޭގައި ހުރި ކަންތައްތައް މޮޑެވިގެން، މަސްހުނިވެގެން އަނެއްކާ މުޅިން ރީ-ޝޭޕް ކުރެވިގެންދާ ތަނެއް ނޫންތޯ ފެނިގެން މިދަނީ" ހޯމް މިނިސްޓަރ ވިދާޅުވިއެވެ.

ހޯމް މިނިސްޓަރ އަޒްލީން ވިދާޅުވީ، ރައްޔިތުންގެ މެދުގައި ނާމާންކަމާއި ބިރުވެރިކަން ފެތުރިފައި އޮއްވާ ރައީސް ޔާމީން ވެރިކަމަށް ވަޑައިގެން، ރާއްޖެ އަމާން އޮމާން ތަނަކަށް ހައްދަވައިދެއްވާފައިވާކަމަށެވެ. އަދި އެކަމުގެ ނަތީޖާއެއްގެ ގޮތުން މިއިން ޒަމާނަކު ރާއްޖެ ނުދެކޭފަދަ ތަރައްޤީއާއި ކުރިއެރުން މިހާރު ފެންނަމުންދާކަމަށާއި، އަލުން އަނބުރާ އެމް.ޑީ.ޕީގެ ފިކުރު އިއާދަކުރެވިއްޖެނަމަ ދިވެހި ރައްޔިތުން އުއްމީދު ނުކުރާހާ ބޮޑެތި ގެއްލުންތަކެއް މި ޤައުމަށް ލިބިގެންދާނެކަމަށެވެ.

"ޝައްކެއްވެސް ނެތްގޮތުގައި މި 4 އަހަރުގެ ތެރޭގައިވެސް ދިވެހިރައްޔިތުން ވަރަށް ބޮޑެތި ތަކުލީފުތަކެއް އުފުލައިފި. އިއްޒަތްތެރި ރައީސުލްޖުމްހޫރިއްޔާ އަވަހާރަކޮށްލުމަށްޓަކާ އެތައް ފަހަރެއްގެ މަތިން މަސައްކަތް ކުރުމުގެ އިތުރުން ޤައުމު އިނދަޖައްސާލުމަށްޓަކާ އެކި ގޮތްގޮތުން ބަޣާވާތްތަކެއް ކުރެވިއްޖެ. މިހުރިހާ ހާލަތެއްގައިވެސް ކެތްތެރިކަމާއި ސާބިތުކަމާއެކު ޤައުމު ދޫކުރައްވާ ވަޑައިނުގަތް ހުންވައިގެން މިފަދަ ބޮޑެތި ޤުރުބާނީތައް ވެވަޑައިގެން، ރައްޔިތުންނަށް ގެންނެވި ތަރައްޤީ ހިފަހައްޓަން އެބަޖެހޭ. މިކަމަށް ނުވިސްނާ، މިދެންނެވި ފިކުރު އަޅުގަނޑުމެން ރިޕްލޭސް ކުރަންވެއްޖެނަމަ، ޝައްކެތްވެސް ނެތް ދެން އަޅުގަނޑުމެންނަށް އުއްމީދު ނުކުރާވަރުގެ ބޮޑެތި ގެއްލުންތަކެއް ލިބިގެންދާނެ" ހޯމް މިނިސްޓަރ ވިދާޅުވިއެވެ.

ދިވެހިރާއްޖެއަކީ ސައްތައިން ސައްތަ މުސްލިމް ޤައުމަކަށްވެފައި، އެކަމާ ހަސަދަވެރިވާ ބަޔަކު ތިބިކަން ފާހަގަކުރައްވާ، ހޯމް މިނިސްޓަރ އަޒްލީން އަޙްމަދު ވިދާޅުވީ، ޤައުމުގެ އަދުއްވުންގެ އަމާޒަކީ މުސްލިމު ޢަރަބި ޤައުމުތަކަށް އައިސްފައިވާ ލޮޅުންގަނޑު ރާއްޖަށްވެސް ގެނައުން ކަމަށެވެ. އަދި މިއީ މިއަދު ދިވެހި ރައްޔިތުން ވިސްނާލަންޖެހޭ ކަމެއް ކަމަށާއި، ޤައުމަށް ގެއްލުންދެނިވި އެއްވެސް ފިކުރަކަށް ދިވެހި ފަސްގަނޑުން ޖާގަދެވިގެން ނުވާނެކަމަށްވެސް ހޯމް މިނިސްޓަރ ވިދާޅުވިއެވެ.