ސިނަމާލެ ބްރިޖުގައި ކައިވެނި ކުރަން ބޭނުންވާ ފަރާތްތަކަށް އެ ފުރުޞަތު ސަރުކާރުން ހުޅުވާލައިފިއެވެ.
ހައުސިން މިނިސްޓަރ ޑރ. މުޙައްމަދު މުޢިއްޒު މިއަދު ކުރެއްވި ޓުވީޓެއްގައި ވިދާޅުވީ ބްރިޖު މަތީގައި އަލަތު ކައިވެނި ކުރަން ބޭނުންވާ ފަރާޓްތަކަށް އެ ފުރުޞަތު ދިނުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ވަޢުދެއް ކަމަށެވެ. އެހެންކަމުން އެ ފުރުޞަތު އަންނަ އާދީއްތަ ދުވަހު ހުޅުވާލާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ މުޢިއްޒު ވިދާޅުވީ ބްރިޖު މަތީގައި ކައިވެނި ކުރަން ބޭނުންވާ ފަރާތްތަކަށް ދޫކުރާ ފޯމް ހައުސިންގ މިނިސްޓްރީގެ ކައުންޓަރުން ލިބޭނެ ކަމަށެވެ. އަދި މި މަހުގެ 13ވަނަ ދުވަހާއި ހަމައަށް ފޯމް ބަލައިގަތުން އޮންނާނެ ކަމަށްވެސް އެމަނިކުފާނު ވިދާޅުވިއެވެ.
މާލެއާއި ހުޅުލެއާއި ދެމެދު އަޅާ މި ބްރިޖަކީ ޖުމްލަ 200 މިލިއަން ޑޮލަރު ޚަރަދުކޮށްގެން އަޅާ ބްރިޖެކެވެ. އޭގެ ތެރެއިން 100 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ ގޮތުގައި ހަދިޔާކޮށްފައިވާ ފައިސާއެވެ. އަދި 70 މިލިއަން ޑޮލަރު ދޭން ނިންމާފައިވަނީ ލޯނު އެހީގެ ގޮތުގައެވެ. ބްރިޖު މަޝްރޫޢަށް ދިވެހި ސަރުކާރުން 30 މިލިއަން ޑޮލަރު ޚަރަދުކުރާނެއެވެ.