ދިވެހިންގެ މިނިވަންކަމަށާއި އިސްލާމީ ޝަޚްޞަށް ގެއްލުމެއް ވެދާނެ ކަމަކަށް ފުރުޞަތު ނުދިނުމަށް ހޭލާ ތިބެންޖެހޭ - ރައީސުލްޖުމްހޫރިއްޔާ
އެއްވެސް ޙާލެއްގައި ދިވެހިންގެ މިނިވަންކަމަށް ނުވަތަ އިސްލާމީ ޝަޚްޞަށް އެއްވެސް ގެއްލުމެއް ވެދާނޭ ކަމަކަށް ފުރުޞަތު ނުދިނުމަށް ހޭލާ ތިބެން ޖެހޭ ކަމަށާއި، މިކަންކަން ރައްކާތެރިކުރުމުގައި އަންނަ ގޮންޖެހުންތަކަށް ވަރަށް ސާބިތުކަމާއިއެކު ކުރިމަތިލާންޖެހޭ ކަމުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ދިވެހިރާއްޖޭގެ 53 ވަނަ މިނިވަންދުވަހުގެ މުނާޞަބަތާ ގުޅިގެން މިރޭ ބޭއްވެވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ޖުމްހޫރީ މައިދާނުގައި ކުރިއަށްދިޔަ މިޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ދުނިޔޭގެ މައިދާނުގައި މިހާރު ރާއްޖެ ކުރަމުންމިދާ ދަތުރަށް ބަލާއިރު، ރާއްޖެއާ ބައްދަލުކުރާނީ ޢަރަބި އިސްލާމީ ފިކުރުތަކާއި، ހުޅަނގުގެ މިނިވަން ފިކުރުތަކާއި، ދުނިޔޭގެ ބާރުވެރިކަމަމާއި ސަރަޙައްދީ ބާރުވެރިކަމަށް ބިނާވެގެން ޤާއިމުކޮށްފައިވާ އަދި ޤާއިމުކުރަމުންދާ ފިކުރުތައް ފަދަ އެކި ފިކުރުކަން ދިވެހިން ދަންނަންޖެހޭނެ ކަމަށެވެ. ހަމައެޔާއެކު، ރާއްޖެއާ ކުރިމަތިކުރުވާ ނިންމުންތަކާއި ސިޔާސަތުތަކަކީ، އެ ނިންމުންތައް ނިންމާ ޤައުމަކަށް ނުވަތަ ބަޔަކަށް އެންމެ އެކަށޭނަ އަދި އެންމެ ބޭނުންތެރި ނިންމުންތަކަށް ވާނޭކަމާއި، މަދު ފަހަރަކުނޫނީ މިފަދަ ކަންކަމަކީ ހާމަޔަށް ފެންނަން ހުންނާނޭ ކަންކަން ނޫންކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. އެހެންކަމުން ރާއްޖެއިން މިފަދަ ކަންކަމުގައި ޢަމަލުކުރެވޭނީ ރާއްޖެއަށް އެންމެ ފައިދާ ހުރިގޮތަށްކަން ރައީސުލްޖުމްހޫރިއްޔާ ފާހަގަކުރެއްވިއެވެ.
ރައީސުލްޖުމްހޫރިއްޔާ ވިދާޅުވީ ރާއްޖޭގެ މިއަދުގެ ޚާރިޖީ ގުޅުންތަކަކީ، ދުނިޔޭގެ ތަރައްޤީއާއި ތަމައްދުނުގައި ދިވެހިންގެ ފައިތިލަ ސާބިތުކޮށް، ދުނިޔޭގެ މައިދާނުގައި ހަމައިސްކޮޅަށް ދެމިލުމަށް ޤާއިމުކުރެވޭ ގުޅުންތަކެއް ކަމަށާއި، މިއީ ދިވެހިންނަކީ ބަޔަކު ފުރުޞަތު ދިނީމާ ބަސްބުނާ ބަޔަކަށްވުމުގެ ބަދަލުގައި، އަމިއްލަ ހައިސިއްޔަތުން ދިވެހިންގެ ބަސް، އެހެންމީހުންވެސް ހޯދާނޭ ބަޔަކަށްވުމަށް ކުރެވޭ ދަތުރެއް ކަމަށެވެ.
ޤައުމާއި ރައްޔިތުންނަކީ ވަކި ނުކުރެވޭނޭ އެއްޗަކަށް ވީފަދައިން، މިނިވަންކަމާއި ދައުލަތަކީވެސް ވަކިނުކުރެވޭނޭ އެއް މަފްހޫމްކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ ޤައުމުގެ މިނިވަންކަމުގައި ހުރި ވަރުގަދަކަން ބިނާވެފައި އޮންނަނީ ދައުލަތުގައި ހުރި ފަންވަރެއްގެ މައްޗަށް ކަމަށެވެ. މިމޭރުމުން ވާހަކަފުޅު ދައްކަވަމުން ރައީސުލްޖުމްހޫރިއްޔާ އިތުރަށް ވިދާޅުވީ ދައުލަތް ބާރުވެރިކޮށް، ދައުލަތުގެ މުއައްސަސާތައް ވަރުގަދަ ކުރުމަކީ، ޤައުމުގެ މިނިވަންކަން ރައްކާތެރިކޮށް، ޤައުމީ ސަލާމަތްކަން ކަށަވަރުކުރުމުގެ އެންމެ މުހިންމު އަސާސް ކަމަށެވެ.
މިރޭ ރައީސުލްޖުމްހޫރިއްޔާ ދެއްކެވި ވާހަކަފުޅުގައި އެމަނިކުފާނުގެ ރިޔާސީ ދައުރުގައި ދިވެހިރާއްޖޭގެ ތަރައްޤީއަށް ކުރެވިފައިވާ އަދި ކުރެވެމުންދާ ބޮޑެތި މަޝްރޫޢުތަކަށް އަލިއަޅުއްވާލައްވައި ރާއްޖެ ތަރައްޤީ ކުރުމުގެ ރޮނގުން މިހާތަނަށް ހޯދިފައިވާ ކާމިޔާބީތަކުގެ މައްޗަށް ބައްލަވައިލެއްވިއެވެ. އެގޮތުން ރައީސުލްޖުމްހޫރިއްޔާގެ ވާހަކަފުޅުގައި މި ސަރުކާރު އައުމުގެ ކުރީގެ 5 އަހަރުދުވަހުގެ ތަރައްޤީގެ މަޝްރޫޢުތަކަށް ހޭދަކޮށްފައިވަނީ 8.3 ބިލިއަން ރުފިޔާކަން ބަޔާން ކުރައްވަމުން މިސަރުކާރުގެ ވޭތުވެދިޔަ 4 އަހަރުދުވަހުގެ ތެރޭގައި 87.6 ބިލިއަން ރުފިޔާ ޚަރަދުކުރެވިފައިވަނީ އެއަރޕޯޓުގެ މައްސަލައިގައި ބޭރުގެ ކުންފުންޏަކަށް 5.8 ބިލިއަން ރުފިޔާ ދެއްކުމަށްފަހުގައިކަން ފާހަގަކުރައްވާފައިވެއެވެ.
މިހުރިހާ ކާމިޔާބީތަކަކާއެކު ވެސް ބޯހިޔާވަހި ކަމުގެ މައްސަލައަކީ އަދި ޙައްލެއް ނުހޯދި އޮތް މައްސަލައެއްކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ މިމައްސަލައަށް ހައްލެއް ހޯދުމަށް ގިނަމަސައްކަތަކެއް ކުރެވި، ހުޅުމާލޭ، ހިޔާ މަޝްރޫޢާއެކު މިހާރު ވިލިމާލެ 2 ތަރައްޤީ ކުރުމަށް އެކުލަވާލެވިފައިވާ ޕްލޭނަކީ ބޯހިޔާވަހިކަމުގެ މައްސަލައަށް ލިބިގެންދާނެ ފުރިހަމަ ހައްލެއް ކަމަށެވެ.