ގއ. ހަގެވިލާ ކައިރީ އޮންނަ ފަރަށް ބޯޓެއް އެރައިފިއެވެ.
މި ޙާދިސާގެ ރިޕޯޓު ރޭ އެގާރަގަޑި ތިރީސްހާއިރު އެމްއެންޑީއެފުގެ ކޯސްޓް ގާޑަށް ލިބުމާގުޅިގެން އެމްއެންޑީއެފް ސައުތް އޭރިއާގެ ކޯސްޓް ގާޑުން ޙަރަކާތްތެރިވަމުންދާކަމަށް މޯލްޑިވްސް ނެޝަނަލް ޑިފެންސްފޯރސް އެމްއެންޑީއެފުން ބުނެއެވެ.
އެމްއެންޑީއެފުން ބުނީ ބޯޓުގައި މީހުން ތިބިކަމުގެ ނިޝާނެއް ފެންނަން ނެތްނަމަވެސް ބޯޓުގައި ބަޔަކު ތިބިތޯއާއި، މިބޯޓަކީ ރާއްޖޭގެ ކުންފުންޏަކަށް ނިސްބަތްވާ ބޯޓެއްތޯ ކަށަވަރުކުރުމުގެ މަސައްކަތް ކުރަމުން އަންނަ އެމްއެންޑީއެފުން ބުނެއެވެ.
މީގެ އިތުރުން ގދ އަތޮޅުން ފުރައިގެން މާލެ ދަތުރު ކުރި "އާއިލާ" ނަމަކަށް ކިޔާ ބޯޓެއް މ. ރާބަނދިހުރާ ކައިރިއޮތް ގިރިއަކަށް އެރުމާ ގުޅިގެންވެސް އެމްއެންޑީއެފުންވަނީ އެހީތެރިކަން ފޯރުކޮށްދީފައިވާކަމަށް އެމްއެންޑީއެފުން ބުނެއެވެ.
މިދުވަސްވަރު ރާއްޖޭގެ ހުރިހާ ހިސާބަކަށްކުރަމުންދާ ވިއްސާރައިގައި ކަނޑުތައް ގަދަވުމުގެ ސަބަބުން ދިމާވެދާނެ ނުރައްކާތެރި ޙާދިސާތައް މަދުކުރުމަށް ކޮންމެހެން ކުރަން ޖެހޭ ދަތުރުތައް ފިޔަވާ އެހެނިހެން ދަތުރުތައް ނުކުރުމަށް އެމްއެންޑީއެފުންވަނީ އިލްތިމާސްކޮށްފައެވެ.