ޕްރޮސިކިއުޓަރ ޖެނެރަލްގެ އޮފީހާއި، ތުރުކީގެ ޖެނެރަލް ޕްރޮސިކިއުޝަން އޮފީސް އޮފް ދި ސްޕްރީމް ކޯޓް އޮފް އެޕީލްއާއި ދެމެދު އެއްބަސްވުމެއްގައި ސޮއިކޮށްފިއެވެ.
ތުރުކީގެ އަންކާރާގައި ހުންނަ ޖެނެރަލް ޕްރޮސިކިއުޝަން އޮފީސް އޮފް ދަ ސުޕްރީމް ކޯޓު އޮފް އެޕީލްގައި ބޭއްވި ރަސްމިއްޔާތެއްގަ ރާއްޖޭގެ ފަރާތުން އެއްބަސްވުމުގައި ސޮއިކުރެއްވީ ޕްރޮސެކިއުޓަރ ޖެނެރަލް ޢާއިޝަތު ބިޝާމްއެވެ. ތުރުކީގެ ފަރާތުން ސޮއިކުރެއްވީ ތުރުކީގެ ޕްރޮސިކިއުޓަރ ޖެނެރަލް މެހްމެތު އަކާސާއެވެ.
މިއެއްބަސްވުމުގެ ދަށުން ޓެރަރިޒަމާއި، ކޮރަޕްޝަންގެ ކުށްތަކާއި، ބައިނަލްއަޤްވާމީ ޖިނާއީ ކުށްތަކާއި، އިންސާނީ ވަގުފާރިއާއި، މަސްތުވާތަކެތީގެ ވިޔަފާރިއާއި، އިކޮނޮމިކް ކްރައިމްސް އަދި ކޮމްޕިއުޓަރ ކްރައިމްސްގެ ދާއިރާއިން އެއްބާރުލުން ދިނޭނެއެވެ. އަދި މީގެ އިތުރުން، ދެ ޕްރޮސިކިއުޝަން ސަރވިސްގެ މުވައްޒަފުން މެދުގައި މަޢުލޫމާތު ބަދަލުކުރުމާއި، ތަމްރީން ދިނުންވެސް ހިމެނޭކަމަށް ޕީޖީ އޮފީހުން ބުނެއެވެ.
ތުރުކީގެ ޖެނެރަލް ޕްރޮސިކިއުޝަން އޮފީހާއި ރާއްޖޭގެ ޕްރޮސިކިއުޓަރ ޖެނެރަލްގެ އޮފީހާއި ދެމެދު އެއްބަސްވުމުގެ މި ރަސްމިއްޔާތުގައި ތުރުކީގެ ޕްރޮސިކިއުޓަރ ޖެނެރަލް މެހްމެތު އަކާސާ އާއި ރާއްޖޭގެ ޕްރޮސިކިއުޓަރ ޖެނެރަލް ޢާއިޝަތު ބިޝާމްވަނީ ދެޤައުމުގެ ޖިނާއީ ޢަދުލުގެ ނިޒާމާއި، ޕްރޮސިކިއުޝަން ސަރވިސްގެ މެންޑޭޓާ ގުޅޭގޮތުން މަޝްވަރާކޮށް، މަޢުލޫމާތު ބަދަލުކޮށްފައެވެ. އަދި ތުރުކީގެ ސުޕްރީމް ކޯޓް އޮފް އެޕީލްގެ މެންބަރުންގެ ގޮތުގައި ތުރުކީގެ ޕްރޮސިކިއުޝަން ސަރވިސްގެ މުވައްޒަފުންތަކެއް އިންތިޚާބުވުމާއި ގުޅިގެން ޕްރޮސިކިއުޓަރ ޖެނެރަލް ޢާއިޝަތު ބިޝާމް އެބޭފުޅުންނަށް ތަހުނިޔާ ވިދާޅުވިއެވެ.
ޕްރޮސިކއުޓަރ ޖެނަރަލް ތުރުކީވިލާތަށް މިހާރު ކުރައްވަމުން ގެންދާވާ ދަތުރުފުޅުގައި ތުރުކީގެ ޖަސްޓިސް މިނިސްޓަރާއި، ސުޕްރީމް ކޯޓުގެ ރައީސާއި ބައްދަލުކުރެއްވާނެކަމަށް ޕީޖީ އޮފީހުން ބުނެއެވެ.