ބައިނަލް އަޤުވާމީ ލޭ ހަދިޔާ ކުރުމުގެ ދުވަސް ފާހަގަ ކުރުމަށް އެލިއާ އިންވެސްޓްމަންޓުން މޯލްޑިވްސް ބްލަޑް ސާވިސް ގުޅިގެން ލޭ ހަދިޔާ ކުރާ ކޭމްޕެއް ފަށައިފިއެވެ.
ދުނިޔޭގެ ލޭ ހަދިޔާ ކުރުމުގެ ދުވަހާއި ގުޅުވައިގެން ނެޝަނަލް އާރޓްގެލެރީގައި ބޭއްވި ރަސްމިއްޔާތެއްގައި މި ބްލަޑް ކޭމްޕް ފައްޓަވައިދެއްވީ ހެލްތް މިނިސްޓްރީގެ ސްޓޭޓް މިނިސްޓަރ ޑރ. މުހައްމަދު ހަބީބުއެވެ. މި ރަސްމިއްޔާތުގައި ވާހަކަފުޅު ދައްކަވަމުން ޑރ. ހަބީބު ވިދާޅުވީ މިހާރު ލޭ ހަދިޔާ ކުރާ މީހުންގެ 33 އިންސައްތަ އަކީ އަމިއްލައަށް އެދިގެން ލޭ ހަދިޔާ ކުރާ މީހުންކަމަށާއި، ޑަބްލިއުއެޗްއޯގެ އަމާޒަކީ މިއަދަދު 2020 ހަމަޔަށް ދާއިރު ސައްތައިން ސައްތައަށް ހެދުންކަމަށެވެ. މި އަމާޒަށް ރާއްޖެ ވާސިލުވުމަކީ އުދަގޫކަމެއް ނޫންކަމަށާއި، މިކަމަށް ބޭނުންވަނީ ޒިންމާ ނަގަން ތިބި މީހުންގެ ހިތްވަރުކަމަށް ވިދާޅުވިއެވެ.
އެލިއާ އިންވެސްޓްމަންޓް ޖެނެރަލް މޭނޭޖަރ އަހުމަދު ސައީދު ވިދާޅުވީ އެކުންފުނިން ކުރިއަށްގެންދާ ބްލަޑް ޑޮނޭޝަން ކޭމްޕަކީ އެލިއާގެ މުވައްޒަފުންގެ އިސްނެގުންކަމަށާއި، މި ހަރަކާތަކީ ބޭނުންތެރި ހަރަކާތެއްކަމަށް ހެދުމަށް އެލިއާގެ މުވައްޒަފުންނާއި އެމުވައްޒަފުންގެ އާއިލާތަކުގެ އިތުރުން ރައްޓެހިންގެ ފަރާތުން ވަރަށްބޮޑު އެއްބާރުލުމެއް ލިބެމުންދާކަމަށްވެސް ސައީދު ވިދާޅުވިއެވެ.
އެލިއާއިން ކުރިއަށްގެންދާ 5 ވަނަ ލޭހަދިޔާ ކުރާ ކޭމްޕްގައި ހުޅުވުމުގެ ރަސްމިއްޔާތުގައި ރާއްޖޭގައި ހުންނަވާ ޑަބްލިއުއެޗްއޯގެ ރެޕްރެޒެންޓޭޓިވް އަރުވިންދް މާތުރުވެސް ބައިވެރިވެވަޑައިގެންނެވިއެވެ. މާތުރު ވިދާޅުވީ މިފަދަ ކޭމްޕްތައް ބޭއްވުމަކީ ލޭ ހަދިޔާ ކުރާ ނިސްބަތް އިތުރުވެގެންދާނެކަމެށްކަމަށާއި، ޑަބްލިއުއެޗްއޯއިން ކަޑައަޅާފައިވާ ލަނޑުދަނޑިހާސިލްކުރުމަށް އާންމުން ހޭލުންތެރިކުރަން ޖެހޭކަން މާތުރު ފާހަގަކުރެއްވިއެވެ.
މިރަސްމިއްޔާތުގައި ލޭހަދިޔާ ކުރުމުގެ ކޭމްޕުތައް ބާއްވާފައިވާ އޮފީސް ކުންފުނިތަކަށާއި، މިހާތަނަށް އެންމެ ގިނައިން ލޭ ހަދިޔާ ކުރި ވަކިވަކި ފަރުދުންނަށް ވަނީ ހަނދާނީ ލިޔުމާއި ހަނދާނީ ފިލާދީފައެވެ. އެންމެ ގިނައިން ލޭ ހަދިޔާ ކުރި ވަކިވަކި ފަރުދުން ވަނީ ލޭ ހަދިޔާކުރުމުގެ މުހިއްމުކަމާއި ފަސްނުޖެހި ނުކުމެ ބޭނުންވާ ފަރާތަކަށް ލޭ ހަދިޔާކުރުމަށް އިލްތިމާސްކޮށްފައެވެ.
އެއް ދުވަހުގެ މުއްދަތަށް ކުރިއަށް ގެންދާ މި ކޭމްޕަކީ އާއްމުންނަށް ހުޅުވާލައިގެން ކުރިއަށް ގެންދާ ކޭމްޕެކެވެ.
ދުނިޔޭގެ ލޭ ހަދިޔާކުރުމުގެ ދުވަސް ފާހަގަކުރުމަށް މިއަދު ހެނދުނު 10:00 ން ހަވީރު 6:00 އަށް އާޓް ގެލަރީގައި ކުރިއަށް ގެންދާ މިހަރަކާތުގައި ކޮންމެ މީހަކަށް ވެސް ބައިވެރިވެ ލޭ ހަދިޔާ ކުރެވިދާނެއެވެ.
މިއީ އެލިއާ އިން އިންތިޒާމް ކުރާ މިފަދަ ފަސް ވަނަ ކޭމްޕްއެވެ. މިއަހަރުގެ ލޭ ހަދިޔާ ކުރާ ދުވަހުގެ ޝިއާރަކީ، "އެހެން މީހަކަށް އެހީތެރިވެދެއްވުމަށް ހުންނަވާށެވެ. ލޭ ހަދިޔާ ކުރައްވާށެވެ. ދިރިއުޅުން ޙިއްސާކުރައްވާށެވެ." ދުނިޔޭގެ ލޭ ހަދިޔާ ކުރުމުގެ ދުވަހަކީ ކޮންމެ އަހަރެއްގެ ވެސް ޖޫން 14 ވަނަ ދުވަހެވެ.