ރާއްޖެއިން ރަޝިޔާއަށް ކަނޑައަޅާފައި ހުންނަވާ ނޮން ރެޒިޑެންޓް ސަފީރުކަމުގެ މަޤާމަށް ލަންކާގައި ހުންނަވާ ދިވެހި ސަފީރު މުޙައްމަދު ހުސައިން ޝަރީފު ޢައްޔަން ކުރުމަށް، އޭނާގެ ނަންފުޅު ރައްޔިތުންގެ މަޖިލީހަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ފޮނުއްވައިފިއެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ރަޝިއަން ފެޑަރޭޝަން އަށް ރާއްޖެއިން ކަނޑައަޅާ ނޮން ރެޒިޑެންޓް ސަފީރުގެ މަޤާމަށް ޢައްޔަނު ކުރުމަށް ރައީސުލްޖުމްހޫރިއްޔާ ފޮނުއްވި މުޙައްމަދު ހުސައިން ޝަރީފުގެ ނަންފުޅު ދިރާސާކުރުމަށް ޤައުމީ ސަލާމަތު ކޮމެޓީއަށް މަޖިލީހުގެ ރިޔާސަތުން ވަނީ ފޮނުވާފައެވެ.
ރަޝިއަން ފެޑަރޭޝަނަށް ރާއްޖެއިން ކަނޑައަޅާ ނޮން ރެޒިޑެންޓް ސަފީރުގެ މަޤާމަށް މުޙައްމަދު ހުސައިން ޝަރީފުގެ ނަންފުޅު ހުށަހެޅުއްވިއިރު އެމަނިކުފާނު މިހާރު ހުންނެވީ ލަންކާގަައި ހުންނަވާ ދިވެހި ސަފީރުގެ މަޤާމުގައެވެ. މިސަރުކާރުގައި މުޙައްމަދު ހުސައިން ޝަރީފު އެންމެ ފުރަތަމަ އަދާކުރެއްވީ ރައީސް އޮފީހުގެ މިނިސްޓަރުގެ މަޤާމެވެ. އެއަށްފަހު އެމަނިކުފާނު ވަނީ ޖަޕާނުގައި ހުންނަވާ ދިވެހި ސަފީރުގެ މަޤާމުވެސް އަދާކުރައްވާފައެވެ.