ފީފާ ވަރލްޑްކަޕް ޓްރޮފީ ރަޝިޔާގެ ޕީޓަރސްބާގްގައި ދައްކާލާ، ޓްރޮފީ ޓުއަރ ނިންމާލައިފިއެވެ.
ޓްރޮފީ ޓުއަރގެ އެންމެ ފަހު މަންޒިލް އަދި މުބާރާތް އޮންނަ ރަޝިޔާގައި ދައްކާލީ ބްރެޒިލްގެ ވަރލްޑްކަޕް ތަރި ޖިލްބާރޓޯ ސިލްވާއެވެ. ޓްރޮފީ ދައްކާލުން ކުރިއަށް ގެންދިޔައީ މިޔުޒިކާއި، ޑާންސްގެ ތަފާތު ހަރަކާތްތަކާއެކުއެވެ. ދެން ޝަރަފްވެރި ޓްރޮފީ ބަލާލުމުގެ ފުރުޞަތު ލިބޭނީ ރަޝިޔާގެ އެކި ސިޓީތަކުގެ ރައްޔިތުންނަށެވެ. ޖޫން 2 ވަނަ ދުވަހާ ހަމައަށް ޓްރޮފީ ހުންނާނީ ޕީޓާރސްބާގްގައެވެ. ޖޫން 3-7 އަށް ޓްރޮފީ ހުންނާނީ މޮސްކޯގައެވެ. އެއާއެކު ރަޝިޔާގެ 9 ސިޓީއަށް ވަރލްޑްކަޕް ޓްރޮފީ ގެންދެވުނީއެވެ.
ފީފާ ވަރލްޑްކަޕް ޓްރޮފީ އެންމެ ފުރަތަމަ ގެނައި ޤައުމުތަކުގެ ތެރޭގައި ރާއްޖެ ހިމެނެއެވެ. ލަންޑަނުން، ސްރީލަންކާއަށް އަދި ސްރީލަންކާއިން ޓްރޮފީ ގެނައީ ދިވެހިރާއްޖެއަށެވެ. އެތައްސަތޭކަ ދިވެހިންނެއްވެސް ވަނީ ޝަރަފްވެރި ތަށްޓާއެކު ފޮޓޯ ނަގާފައެވެ.
ވަރލްޑްކަޕް ފުޓްބޯޅަ މުބާރާތް ރަޝިޔާގައި ފަށާނީ އަންނަ މަހުގެ 14 ވަނަ ދުވަހުއެވެ. މިމުބާރާތުގެ އެންމެ ފަހުގެ ޗެމްޕިއަން ޓީމަކީ ޖަރުމަނެވެ. އަދި އެންމެ ގިނަ ފަހަރު މުބާރާތް ކާމިޔާބުކޮށްފައިވަނީ ބްރެޒިލެވެ. އެއީ 5 ފަހަރެވެ. ނަމަވެސް ކުރިއަށް އޮތް މުބާރާތް ޖަރުމަން ކާމިޔާބުކޮށްފިނަމަ ބްރެޒިލްގެ އަދަދާ އަރާ ހަމަވާނެއެވެ.