ނިއުރޭޑިއަންޓް އަތުން ރޭ ބަލިވުމުން، ބަލި ޤަބޫލުކުރާކަމަށާއި، އެކަމަކު ނަތީޖާ ޤަބޫލުނުކުރެވޭކަމަށް ޔުނައިޓެޑް ވިކްޓްރީގެ ކޯޗު މުޙައްމަދު ނަޒީހު ބުނެފިއެވެ.
އެއް ކުޅުންތެރިއަކު މަދުކޮށް ކުޅެވެސް، މެޗުގެ 84 ވަނަ މިނިޓްގައި ނިއުއަށް ލިބުނު ޕެނަލްޓީއާ ހަމައަށް ނިއު ހިފަހައްޓާ ލަނޑު ޖަހަންވެސް ފުރުޞަތު ހޯދި މެޗަށްފަހު ނަޒީހު ބުނީ އޭނާގެ ކުޅުންތެރިން މަސައްކަތްކޮށް، ވަރަށް ރަނގަޅަށް ކުޅެފި ކަމަށާއި ބަލިވުން ހައްޤުނޫންކަމަށެވެ. އޭނާގެ ޓީމް ބަލިވީ އެޓީމަށް ވަރަށް ރަނގަޅު ދުވަހެއްގައިކަންވެސް ނަޒީހު ފާހަގަކުރިއެވެ.
ރެފްރީގެ ނިންމުންތައްވެސް އެންމެ ރަނގަޅު ނޫންކަން ފާހަގަކުރަމުން އޭނާ ބުނީ އެއީ ދައްކަން އެހާ ބޭނުންވާ ވާހަކައެއް ނޫންކަމަށާއި، އިންސާނުން ވުމުން އެހެން ވެދާނެކަމަށެވެ. އަދި ރެފްރީންވެސް ސަޕޯރޓްކުރާ ޓީމްތައް ހުންނާނެކަމަށާއި، އެޓީމްތަކާ ދެކޮޅަށް ނިންމުންތައް ނިންމަން އުނދަގޫވެސް ވެދާނެކަމަށެވެ.
މެޗުގައި އޭނާގެ ޓީމުން ދެއްކި ކުޅުމާއި ނަތީޖާގެ ސަބަބުން ގަދަ ހައެއްގެ ތެރެއަށް ވަންނަން ހިތްވަރެއް ލިބިއްޖެކަމަށާއި، ކުރިއަށް އޮތް ހަތަރު މެޗުގެ ތެރެއިން ދެތިން މެޗު ކާމިޔާބުކޮށްގެން އެކަން ވާނެކަމަށް ނަޒީހު ބުންޏެވެ.
" ޔަޤީނުންވެސް ދެ މެޗު ކާމިޔާބުކުރަން ޖެހޭނެ. ތިން މެޗު ކާމިޔާބުކޮށްގެން ގަދަ ހަޔަކަށް ވަދެވޭނެ. ދެން އެހެން ޓީމްތަކަށްވެސް ޕޮއިންޓްތައް ދީގެނެއްނޫން އަޅުގަނޑުމެން ތިބޭނީކީ. މިރޭގެ މެޗުން ބަލިވީމަ އެކަން ޤަބޫލުކުރަން. އެކަމަކު މިއީ ހައްޤު ނަތީޖާކަމަށް ޤަބޫލެއް ނުކުރެވޭ " ނަޒީހު ބުންޏެވެ.
ނިއުރޭޑިއަންޓްގެ ކޯޗު އޮސްކާ ބުރޫޒަން ބުނީ ނިއުއާއި ދެކޮޅަށް ބައެއް ޓީމްތަކުން މިހާރު ޑިފެންސްކުރަން ފަށައިފިކަމަށާއި، އެކަމަށް ނިއު ތައްޔާރުވަމުން އަންނަކަމަށެވެ.
" ނިއުއާ ދެކޮޅަށް ބައެއް ޓީމްތަކުން މިހާރު ނުވަ ކުޅުންތެރިން ފަހަތަށް ފައިބައިގެން ޑިފެންސްކުރަނީ. އެކަމަށް ނިއު މިހާރު ދަނީ ތައްޔާރުވަމުން " އޮސްކާ ބުންޏެވެ.
ފަހަތައް 11 ކުޅުން ތެރިން ތިބެގެން އޯކޭ... ނަޒީހު ހިތައް އަރާނެ ތިމަންނަ މީ ފަސްޓް ޑިވިޝަން ކޯޗެކޭ
ޢަހްމަދު