އެކަކު މަދުކޮށް ކުޅެމުންދިޔަ ޔުނައިޓެޑް ވިކްޓްރީގެ މައްޗަށް ހޯދި އުނދަގޫ މޮޅަކާއެކު އެސްޓީއޯ މާލޭ ލީގު ތާވަލްގެ އެއްވަނާގައި ނިއުރޭޑިއަންޓް 7 ޕޮއިންޓްގެ ލީޑެއް ނަގައިފިއެވެ.
ނިއު އެއްވަނާގައި ލީޑް ފުޅާކުރީ ލީގުގައި ރޭ ޕެނަލްޓީއަކުން ޔުނައިޓެޑް ވިކްޓްރީގެ މައްޗަށް ކުރި ހޯދައިގެންނެވެ. 1-0 ން ނިއު ކާމިޔާބުކުރި މެޗުގައި ލަނޑު ޖެހީ މެޗު ނިމެން 6 މިނިޓަށް ވެފައިވަނިކޮށެވެ. އެއީ ދެވަނަ ހާފްގައި ކުޅެން ނިކުއިން ކެޕްޓަން އަލީ އަޝްފާޤަށް އޭރިޔާ ތެރެއިން ކުރި ފައަލަކަށް ލިބުނު ޕެނަލްޓީއެކެވެ. ޕެނަލްޓީ ކާމިޔާބުކުރީ މެޗުގެ މޮޅު ކުޅުންތެރިޔާ އަލީ ފާސިރެވެ. މުޅި މެޗަށް ބަލާއިރުވެސް ނިއުއިން ގޯލަށް ބޯޅަތަކެއް ފޮނުވާލި ނަމަވެސް ހުސް ފުރުޞަތުތަކެއް ނުލިބެއެވެ.
މެޗުގައި ޔުނައިޓެޑްވިކްޓްރީން ވަނީ ރަނގަޅަށް ޑިފެންސްކޮށް ލަނޑުޖަހަން ފުރުޞަތުވެސް ހޯދާފައެވެ. ޚާއްޞަކޮށް ދެވަނަ ހާފްގައި ސެމިއުލް ބޯޅައާއެކު ކުރިއަށް އަރާ ފޮނުވާލި ބާރު ބޯޅަ ފާހަގަކުރެވެއެވެ. ނަމަވެސް އެބޯޅަ ދިޔައީ ގޯލާ އަމާޒުނުވެއެވެ.
މެޗުގެ ފުރަތަމަ ހާފްގެ 24 ވަނަ މިނިޓްގައި ޔުނައިޓެޑް ވިކްޓްރީގެ އިސްމާއީލް ޝަފީއަށް ރަތްކާޑް ދެއްކުމުން އެޓީމުން ބޮޑުބައި އެކަކު މަދުކޮށް ފުރިހަމަ ކުރި ނަމަވެސް ނިއުއަށް އޭގެ ފައިދާއެއް ނުނެގުނެވެ. ޝަފީއުއަށް ސީދާ ރަތްކާޑް ދެއްކީ ނިއުގެ ޑިފެންޑަރ ޖޯޖް ގޮޓޯއަށް ކުރި ފައުލަކާ ގުޅިގެންނެވެ. އެފައުލާ ގުޅިގެން އޭނާ ވަނީ ބަދަލުކޮށް، ހޮސްޕިޓަލަށް ގެންގޮސްފައެވެ.
މިމޮޅާއެކު ނިއު މިހާރު އޮތީ 25 ޕޮއިންޓާއެކުއެވެ. އެންމެ ގާތުން ވާދަކުރަމުން އަންނަ އީގަލްސްއާއި، ޓީސީއަށްވެސް ލިބިފައިވަނީ 18 ޕޮއިންޓެވެ.