ދޯންޏެއް ދިޔަވާތީ ދޯނި ފުންކުރުމުގެ މަސައްކަތް އެމްއެންޑީއެފުން ކުރަމުން އެބަދެއެވެ. މިހާދިސާގައި އެއްވެސް މީހަކަށް ގެއްލުމެއް ނުވެއެވެ.
މާލެއިން ފުރައިގެން ފ.ނިލަންދޫއަށް ދަތުރުކުރި "އެއިމް ކާރގޯ 1" ނަމަކަށް ކިޔާ ދޯންޏެއް އަޑިއަށް ދާކަމުގެ މަޢުލޫމާތު އެމްއެންޑީއެފަށް ލިބުނީ ރޭ ފަތިހު ހަތަރުގަޑި ފަންސާހުގައިކަމަށް އެމްއެންޑީއެފުން ބުނެއެވެ. އެގޮތުން މިހާރު ކޯސްޓްގާރޑްގެ ޓީމުންދަނީ ދޯނި އޮތް ސަރަޙައްދަށް ގޮސް ޕަމްޕް ބަހައްޓައިގެން ދޯނި ފުންކުރުމުގެ ދިޔަގަނޑު މަސައްކަތް ކުރަމުންކަމަށް އެމްއެންޑީއެފުން ބުނެއެވެ.
މި ދޯންޏަކީ ހިލައާއި ހިލަވެލި ބަރުކޮށްގެންދިޔަ ދޯންޏެކެވެ. ދޯނި ދިޔަވާންފެށީ ހަތަރުހާސް ބަސްތާ ގެ ހިލައާއި ހިލަވެލި ބަރުކޮށްގެންދަނިކޮށް ދޯނި އެއްފަރާތަކަށް އަރިވެގެންކަމަށާއި މިހާދިސާގައި ބައެއް ބަސްތާތައް މޫދަށް ވެއްޓިފައިވާކަމަށް ދޯނީގެ ކެޕްޓަނާއި ޙަވާލާދީ އެމްއެންޑީއެފުން ބުނެއެވެ. މިޙާދިސާ ހިނގިވަގުތު ދޯނީގައި ތިބީ ދިވެއްސަކާއި ދެ ބިދޭސީންނެވެ. ދޯނީގެ ކެޕްޓަން އެމްއެންޑީއެފަށް މަޢުލޫމާތު ދީފައިވަނީ ދޯނި ދިޔަވާން މެދުވެރިވީ ބަރުބޮޑުވެގެންކަމަށެވެ.
ކަނޑުމަތީގައި ހިންގާ މިފަދަ ހާދިސާތައް މަދުކުރުމަށް ދަތުރުފަތުރުކުރުމުގައި ހެދިފައިވާ މިންގަނޑުތަކަށް ހުރިހާ ފަރާތްތަކުންވެސް ޢަމަލުކުރުމަށް އެމްއެންޑީއެފުން އިލްތިމާސްކުރެއެވެ.