އިނގިރޭސިވިލާތުގައި ލުއި ބުއިންތައް ގަންނަ ފަރާތްތައް ޑިޕޮސިޓެއް ބަހައްޓާގޮތަށް ޤާނޫނެއް ފާސްކުރުމުގެ މަސައްކަތް ފަށައިފިއެވެ.
ޕްލާސްޓިކާއި ބިއްލޫރި ފުޅިއާއި ދަނގަޑާއި އެލުމިނިއަމް ތަކެތީގައި ބަންދުކޮށްފައިވާ ލުއި ބުއިންތައް ގަންނައިރު ޑިޕޮސިޓްގެ ގޮތުގައި ފައިސާ ނަގަނީ، ކުނި މަދުކުރުމަށާއި ރީސައިކަލްކުރުމަށް ބާރު އެޅުމުގެ ގޮތުންނެވެ. މިފިޔަވަޅު ސަބަބުން މިފަދަ ލުއި ބުއިންތަކުގެ އަގު ބޮޑުވިނަމަވެސް، ފުޅި ނުވަތަ ދަޅު އަނބުރާ ރައްދުކުރުމުން ޑިޕޮސިޓް ފައިސާ ލިބޭނެއެވެ.
އިނގިރޭސިވިލާތުގެ ތިމާވެއްޓާއި ބެހޭ ވަޒީރު މައިކަލް ގޯވް ވިދާޅުވީ ލުއި ބުއިންތައް ބަންދުކޮށްފައި ހުންނަ ފުޅިއާއި ދަޅު ބޭނުންކުރުމަށްފަހު އެއްލާލުމުން އެތަކެތި މަގުމަތީގައި ކުނީގެ ގޮތުގައި ގިނަވަމުންދާކަމަށެވެ. އަދި ބައެއް ފަހަރު މިތަކެތި ކޯރުތަކާއި ކަނޑުތަކަށް އަޅާކަންވެސް އޭނާ ފާހަގަކުރެއްވިއެވެ. އެހެންކަމުން ސަރުކާރުން އަޅާ ފިޔަވަޅުގެ ސަބަބުން ކަނޑަށާއި ވަށައިގެންވާ މާހައުލަށް އެޅޭ ކުނީގެ އަދަދު މަދުވެގެންދާނޭކަން ގޯވް ފާހަގަކުރެއްވިއެވެ.
ތަފާސް ހިސާބުތައް ދައްކާގޮތުން އިނގިރޭސިވިލާތުގައި އަހަރަކު 13 ބިލިއަން ޕްލާސްޓިކް ފުޅި ބޭނުންކުރެއެވެ. މީގެ ތެރެއިން 3 ބިލިއަނަށްވުރެ ގިނަ ޕްލާސްޓިކް ފުޅި ކުނީގެ ގޮތުގައި އެއްލާލައެވެ.
ޕްލާސްޓިކް ފުޅި ބޭނުންކޮށްފައި ރައްދުކުރުމުން ފައިސާދޭ އުސޫލުތަކާއި ޕްލާސްޓިކް ފުޅި ގަންނައިރު ޑިޕޮސިޓް ބެހެއްޓުމަކީ ޔޫރަޕްގެ ބައެއް ޤައުމުތަކުގައި ގެންގުޅޭ އުޞޫލުތަކެކެވެ.