ސަރުކާރުގެ ހިޔާ މަޝްރޫޢުގެ ތެރެއިން ސިފައިންނަށް ތިންސަތޭކަ ފްލެޓް ދެއްވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ނިންމަވައިފިއެވެ. ރައީސުލްޖުމްހޫރިއްޔާ މިގޮތަށް ނިންމެވިކަން ހާމަކުރެއްވީ ޑިފެންސް މިނިސްޓަރ އާދަމް ޝަރީފް ޢުމަރު އެމްއެންޑީއެފް މީޑިޔާއަށް ދެއްވި ބަސްދީގަތުމެއްގައެވެ. ޑިފެންސް މިނިސްޓަރ ވިދާޅުވީ، ސިފައިންނާއި ފުލުހުންނަށް ރައީސުލްޖުމްހޫރއިްޔާ ދެއްވާ ޚާއްޞަ އިނާޔަތުގެ ދަށުން، ސަރުކާރުން މިހާރު ފަށްޓަވާފައިވާ ހިޔާ މަޝްރޫޢުގެ ތެރެއިން ތިންސަތޭކަ ފްލެޓް ސިފައިންނަށް ދިނުމަށް ނިންމަވާފައިވާކަމަށެވެ. މީގެ އިތުރުން މިނިސްޓަރ ވިދާޅުވީ، އަންނަ ހަފްތާގައި މިކަން އިޢުލާންކޮށް ސިފައިންގެ ތެރެއިން ފްލެޓް ހައްޤުވާ ފަރާތްތަކަށް ކުރިމަތިލުމަށް ހުޅުވާލާނެކަން މިނިސްޓަރ ފާހަގަކުރެއްވިއެވެ.
"މިހާރު ސަރުކާރުން ހިންގާ ހިޔާ މަޝްރޫޢުތަކުގެ ތެރެއިން 300 ފްލެޓް ސިފައިންނަށް ދިނުމަށް ސަރުކާރުން ކަނޑައަޅުއްވާފައިވޭ. އެކަން އަޅުގަނޑުމެން އަންނަ ހަފްތާގައި އެ ފްލެޓްތަކަށް ކުރިމަތިލުމަށް ސިފައިންގެ ތެރެއިން އިޢުލާން ކުރާނަން" މިނިސްޓަރ އާދަމް ޝަރީފް ވިދާޅުވިއެވެ.
ޑިފެންސް މިނިސްޓަރ ވިދާޅުވީ، ސިފައިނަށް ޚާއްޞަކޮށްގެން ސިފްކޯއާއި ހަވާލުކޮށްގެން ކުރިއަށްގެންދާ ސިފައިންގެ ފްލެޓްތަކުގެ މަސައްކަތަކީ މިއަހަރު ނިންމުމަށް ކަނޑައަޅައިގެން ވަރަށް ކުރިންސުރެ ސަރުކާރުން ފަށްޓާފައިވާ މަޝްރޫޢެއް ކަމަށެވެ. އެ މަޝްރޫޢު މިއަހަރުގެ އޭޕްރީލް މަހުގެ ނިޔަލަށް ނިންމުމަށް ކުރިން އަމާޒު ކަނޑައެޅި ނަމަވެސް، އެ މަޝްރޫޢު ރާވާފައިވާ ގޮތުން ނުނިމި ލަސްވެފައިވާކަން މިނިސްޓަރ ފާހަގަކުރެއްވިއެވެ. ނަމަވެސް ޑިފެންސް މިނިސްޓަރުކަމާ ހަވާލުވެވަޑައިގަތުމަށްފަހު ކުރެއްވި މަސައްކަތުންނާއި ސަރުކާރުން މި މަޝްރޫޢަށް ދެއްވާ އަހައްމިއްޔަތުންގެ ސަބަބުން އެ މަސައްކަތް ކުރިއަށް ގެންދިއުމަށް ހުރި ހުރަސްތައް ނައްތާލާ މަސައްކަތް ކުރިއަށްދާކަމަށް ޑިފެންސް މިނިސްޓަރ ވިދާޅުވިއެވެ. އަދި އެ ފްލެޓްތަކުގެ މަސައްކަތް މިއަހަރުގެ ޑިސެމްބަރު މަހުގެ ނިޔަލަށް ނިންމާ ހައްޤުވެރިންނަށް ހަވާލުކުރެވޭނެކަމަށް ޑިފެންސް މިނިސްޓަރ ވިދާޅުވިއެވެ.
"އެހެންކަމުން ހިޔާ މަޝްރޫޢުގެ ދަށުން 300 ފްލެޓް ސިފައިންނަށް ލިބޭއިރު، ސިފްކޯއާ ހަވާލުކޮށްގެން ކުރިއަށްދާ ފްލެޓްތަކުގެ ތެރެއިން 300 ފްލެޓް އަދި އިތުރު ވިހި ފްލެޓް ހިމެނޭގޮތަށް ނިންމާ ސިފައިނަށް ފްލެޓް ދިނުމަށް ސަރުކާރުން ނިންމަފައިވަނީ. އެ މަސައްކަތް މިހާރު ކުރިއަށް އެބަދޭ" އާދަމް ޝަރީފް ވިދާޅުވިއެވެ.
ޑިފެންސް މިނިސްޓަރ ވިދާޅުވީ، ހިޔާ މަޝްރޫގެ ދަށުން ކުރިއަށްދާ މަޝްރޫޢުތަކުން ސިފައިންނަށް ލިބޭ ފްލެޓްތަކަށް ކުރިމަތިލުމަށް އަންނަ ހަފްތާގައި ހުޅުވާލާއިރު އެ ފްލެޓްތައް ލިބޭ ފަރާތްތައް ކަނޑައަޅާނީ ސިފައިންގެއިން ކަމަށެވެ. ނަމަވެސް ފްލެޓްތައް އެފަރާތްތަކާ ހަވާލުކުރާނީ ހައުސިންގ މިނިސްޓްރީންކަން މިނިސްޓަރ ފާހަގަކުރެއްވިއެވެ. މީގެ އިތުރުން ޑިފެންސް މިނިސްޓަރ ވަނީ ސިފައިންގެ ވެލްފެއަރ ހަރުދަނާކުރުމަށް ސަރުކާރުން ވަރަށް ބޮޑު އިސްކަމެއް ދެއްވާކަން ފާހަގަކުރައްވާފައެވެ.