ކުންޏާއި ގުޅޭ ކަންކަން މޮނިޓަރކޮށް، އެކަމާއިގުޅޭ ޤަވާއިދުތައް ތަންފީޒުކުރުމުގައި ފުލުހުންގެ އެހީތެރިކަން ހޯދުމަށް އެންވަޔަރަންމަންޓް މިނިސްޓްރީއާއި ވެމްކޯއާއި ފުލުހުންނާއި ދެމެދު އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގެ ދަށުން އެންވަޔަރަންމަންޓް މިނިސްޓްރީން ކުރިއަށްގެންދާ "ސާފުރާއްޖެ" ޕްރޮގްރާމުގެ ތެރެއިން ރާއްޖޭގެ ރަށްރަށް ސާފު ރަށްތަކުގެ ގޮތުގައި ބޭއްވުމަށް ކުރަމުންދާ މަސައްކަތްތަކުގައި އެއްބާރުލުންދީ، ކުނި މެނޭޖުކުރުމުގެ ޤަވައިދުގެ ދަށުން ފިޔަވަޅު އަޅައި، އެ ޤަވަޢިދުތައް ތަންފިޒުކުރުމަށް މަސައްކަތް ކުރާނެއެވެ.
ތިން މުއައްސަސާގެ ދެމެދުގަ މިވެވުނު އެއްބަސްވުމުގައި ސޮއިކުރައްވުމަށްފަހު ވާހަކަފުޅުދައްކަވަމުން އެންވަޔަރަންމަންޓް މިނިސްޓަރ ތާރިޤް އިބްރާޙިމް ވިދާޅުވީ ކުންޏާއި ގުޅޭގޮތުން އެކުލަވާލާފައިވާ ޤަވާއިދާ ޚިލާފުވާ ފަރާތްތަކާއިމެދު ފިޔަވަޅު އަޅާނެކަމަށެވެ. އަދި ޤަވާއިދާ ޚިލާފަށް ތަންތަނުގައި ކުނި ބަހައްޓާ މައްސަލަތައް އިތުރުވާތީ އެކަންކަން ކުރާ މީހުން، ފުލުހުންގެ އެހީތެރިކަމާއިއެކު ދެނެގަނެ ޤަވާއިދާއި އެއްގޮތަށް ފިޔަވަޅު އަޅާނެކަމަށެވެ. މިނިސްޓަރ ވިދާޅުވީ މިނިސްޓްރީން އިސްކަންދޭނީ އެފަދަ ފަރާތްތަކާއިމެދު ހަރުކަށި ފިޔަވަޅު އެޅުމަށް ނޫންކަމަށާއި، އެފަދަ ފަރާތްތަކަށް ނަސޭހަތް ދީގެން ހުއްޓުވުމަށްކަމަށެވެ.
ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ފުލުހުންގެ އިދާރާ ހިންގެވުމާ ޙަވާލުވެ ހުންނެވި ޑެޕިއުޓީ ކޮމިޝަނަރ އޮފް ޕޮލިސް އަބްދުﷲ ނަވާޒު ވިދާޅުވީ މި މަސައްކަތް މާލޭގައި އެކަނި ފެށިނަމަވެސް ވަރަށް އަވަހަށް އަތޮޅުތަކުގައިވެސް ފަށާނެކަމަށެވެ. މި މަސައްކަތުގެދަށުން ޤަވާއިދާއި ޚިލާފު ކުނި ޖަމާކުރުން ހުއްޓުވުމަށްޓަކައި ރަށުތެރެ ޕެޓްރޯލްކޮށް ބަލަހައްޓާނެއެވެ. އަދި ވެމްކޯއަށް ޚާއްޞަކޮށްފައިވާ ޒޯންތަކުގައި ރައްކާތެރިކަމުގެ ފިޔަވަޅު އެޅުމާއި، އެފަދަ ޒޯންތަކުގައި ޤަވާއިދާ ޚިލާފަށް ޕާކުރުމާއި، އަދި މީގެ އިތުރުން ޤަވާއިދާ ޚިލާފު ބައިސްކަލާއި ގާޑިޔާތަކުގައި ކުނި އުފުލާ ފަރާތްތައް ހުއްޓުވުވައި، ޤަވައިދުގައި ވާގޮތުން ފިޔަވަޅުއަޅާނެކަމަށެވެ.
ނަވާޒް ވިދާޅުވީ ކުރިއަށްއޮތްތާންގައި "އެންވާޔަރަމަންޓް ޕޮލިސް"ގެ ނަމުގައި ޚާއްސަ ޔުނިޓެއް އެކުލަވާލާނެކަމަށާއި، މި ޔުނިޓުގައި މަސައްކަތްކުރާ ޕުލުހުން ފާހަގަވާގޮތަށް ޚާއްސަ ވެސްޓެއްވެސް ބޭނުންކުރުމަށް ހަމަޖެހިފައިވާކަމަށެވެ.