ދުންފަތުގެ އިސްތިޢުމާލުކުރާ މީހުން ބޭނުންކުރާ ބާވަތްތަކުގެ ތެރެއިން އެންމެ ޢާއްމުކޮށް ބޭނުންކުރާ ސިނގިރޭޓް ފޮށީގެ ބޭރުގައި އިންޒާރުގެ ތަސްވީރު ހިމެނުމަށް އެޗްޕީއޭއިން ނިންމައިފިއެވެ.
އިންޒާރުގެ ތަސްވީރަކީ، ސިނގިރޭޓް ފޮށީގެ ބޭރުގައި، ދުންފަތުގެ ނުރައްކާތެރިކަމާއި، އޭގެ ގެއްލުން ފެންނަ ފޮޓޯއާއި ކުރެހުން ހިމެނުމެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން އެޗްޕީއޭގެ ޑެޕިއުޓީ ޑިރެކްޓަރ އަދި ދުންފަތް ކޮންޓްރޯލް ކުރުމާ ބެހޭ ބޯޑުގެ ތަރުޖަމާން ޙަސަން މުޙައްމަދު ވިދާޅުވީ ސިނގިރޭޓާއި، ބިޑި ސުއްޓާފަދަ ތަކެތި ވަކިވަކިން ވިއްކުން މަނާކޮށް އެތަކެތީގެ ފޮށީގެ ބޭރުގައި އިންޒާރުގެ ތަސްވީރު ހިމެނުމަށް ނިންމާފައިވަނީ ދުންފަތުގެ ވަބާއިން ޒުވާނުން ސަލާމަތް ކުރުމަށްޓަކައި ހެލްތުޕްރޮޓްކްޝަން އެޖެންސީ، އެޗް.ޕީ.އޭ އިން އެކުލަވާލި، ދުންފަދާ ގުޅޭ ޚާއްސަ ޤަވާޢިދުގައިކަމަށެވެ.
މިފަދަ ޤާނޫނެއް އެކުލަވާލުމުގެ މައިގަނޑު މަޤުޞަދަކީ ކުޑަކުދިންނާއި ޒުވާނުންގެ ތެރެއިން ދުންފަތުގެ އިސްތިއުމާލު ކުރާ މީހުން އެވަބާއިން ސަލާމަތް ކުރުން ކަމަށް ޙަސަން މުހައްމަދު ވިދާޅުވިއެވެ.
ދުންފަތުގެ އިސްތިޢުމާލުކުރުމުގެ ތެރެއަށް އަލަށް ވަންނަމުންދާ ޒުވާނުންނަށް އަމާޒުކޮށް ހަދާ މިޤަވާޢިދަކީ އެފަދަ ޒުވާނުން މަދުކޮށް ދުންފަތުގެ އިސްތިޢުމާލުކުރުމުން އެމީހުން ސަލާމަތްކުރުމަށް ބާރުއަޅާ ޤަވާޢިދަކަށް ވާނޭކަމަށް އެޗްޕީއޭއިން ބުނެއެވެ. މި ޤަވާޢިދުގެ ސަބަބުން ދުންފަތުގެ ބާވަތްތަކުގެ ތެރެއިން އެންމެ ޢާއްމު އެއްބާވަތްކަމަށްވާ ސިނގިރޭޓާއި، ބިޑި، ސުއްޓާފަދަ ބާވަތްތައް ވަކިވަކިން ވިއްކުން މަނާކުރުމާއި، އެފަދަ ތަކެރީގެ ފޮށީގެ ބޭރުގައި އިންޒާރުގެ ތަސްވީރު ހިމެނުން ފަދަ މުހިންމު ކަންކަން ކުރުމަށް ލާޒިމްކުރާނެކަމަށްވެސް އެޗްޕީއޭއިން ބުނެއެވެ.
އެޗްޕީއޭގެ ޑެޕިއުޓީ ޑިރެކްޓަރ އަދި ދުންފަތް ކޮންޓްރޯލް ކުރުމާ ބެހޭ ބޯޑުގެ ތަރުޖަމާން ޙަސަން މުޙައްމަދު ވިދާޅުވީ މިފަދަ ޤާނޫނެއް އެކުލަވާލުމުގެ މައިގަނޑު މަޤުޞަދަކީ ކުޑަކުދިންނާއި ޒުވާނުންގެ ތެރެއިން ދުނަފަތުގެ އިސްތިއުމާލު ކުރާ މީހުން އެވަބާއިން ސަލާމަތް ކުރުން ކަމަށެވެ. އަދި މިޤަވާޢިދު އެކުލަވާލުމަށްޓަކައި ގިނަ ބަޔަކާ މަޝްވަރާކޮށްފައިވާނެކަމަށާ، މި ޤަވާއިދު އެޕްރޫވް ކުރުމަށް، މިހާރު ރައިސުލްޖުމްހޫރިއްޔާގެ އޮފީހަށް ހުށަހަޅާފައިވާކަމަށްވެސް ޙަސަން މުޙައްމަދު ވިދާޅުވިއެވެ.