ހައްޖު ކޯޕަރޭޝަންގެ ހަވާލުގައި ހައްޖަށް ދިޔަ ހައްޖުވެރިންގެ ތެރެއިން 210 މީހުން މިއަދު މާލެ އަތުވެއްޖެއެވެ.
210 ހައްޖާޖީން ރާއްޖެއައީ ސައުދީއެއަރ ލައިނުންނެވެ. ހައްޖު ކޯޕަރޭޝަންގެ ދުއިސައްތަ ދިހަ މީހަކު މިއަދު އައިރު އިއްޔެ ވަނީ ޒަޢީ ގުރޫޕްގެ ޙަވާލުގައި ދިޔަ ޙައްޖާޖީން މާލެ އައިސްފައެވެ. މީގެ އިތުރުން ސިސިލްފަރު ހައްޖު ގްރޫޕްގެ ހަވާލުގައި ހައްޖަށް ދިޔަމީހުން މިމަހުގެ ދިހަވަނަ ދުވަހު އަންނަން ހަމަޖެހިފައިވާއިރު ޙަރަމައިން ގްރޫޕްގެ ހައްޖުވެރިން މާލެއައުމަށް ހަމަޖެހިފައިވަނީ މިމަހުގެ އެގާރަވަނަ ދުވަހުއެވެ.
ޙައްޖު ކޯޕަރޭޝަންގެ ޙަވާލުގައި ދިޔަ އިތުރު ޙައްޖުވެރިން މިމަހުގެ 10 ވަނަ ދުވަހާއި، 11 ވަނަ ދުވަހާއި 22 ވަނަ ދުވަހާއި 26 ވަނަ ދުވަހުގެ އިތުރުން 29 ގައި އަންނާނެއެވެ. މި އެންމެންވެސް ރާއްޖެ އައުމަށް ހަމަޖެހިފައިވަނީ ސަޢޫދީ އެއަރލައިންއިންނެވެ.
މިއަހަރު ރާއްޖެއިން ޖުމްލަ 1300 މީހުން ޙައްޖަށް ދިޔައެވެ. އަދި މިއަހަރު ސަޢޫދީ އަރަބިއްޔާއިން ވަނީ ރާއްޖޭގެ ޙައްޖާޖީންނަށް ލުއިފަސޭހަ ކޮށްދިނުމަށްޓަކައި ޖިއްދާގެ އެއަރޕޯޓުގައި ދިވެހީންނަށް ޚާއްސަ އިމިގްރޭޝަން ކައުންޓަރެއް ޤާއިމްކޮށްފައެވެ.