އަޞްހާ އީދުގެ މުނާސަބަތުގައި އަތޮޅުތަކާއި މާލޭގައި ކުލަގަދަ ގޮތެއްގައި ހިންގި ހަރަކާތްތައް ނިންމާލައިފިއެވެ.
ރާއްޖޭގެ ގިނަ ރަށް ރށުގައި ކުލަ ގަދަގޮތެއްގައި އީދު ފާހަގަ ކޮއްފައިވާއިރު ޢީދުގެ ހަރަކާތައް މިހާރުވަނީ ގިނަ ރަށްރަށުގައި ނިންމާލާފައެވެ. އީދު ނަމާދުން ފެށިގެން އީދުގެ އެންމެފަހު ދުވަހާ ޖެހެންދެން ބައެއް ރަށް ރަށުގައި ހުއްޓުމުއްނެތި، އީދު ކުޅިވަރުތައް ކުރިއަށް ގެންގޮސްފައިވެއެވެ.
އެގޮތުން މިފަހަރު ޢީދު ކުލަ ގަދަކޮށް ފާހަގަކުރި ރަށްރަށުގެ ތެރޭގައި ހއ. ބާރަށާ، ނައިފަރުގައި ކުރިއަށް ގެންދިޔަ ހަރަކާތްތަށް ފާހަގަކޮށްލެވެއެވެ. ކުލަ ޖެހުމާ މާލި ނެށުމާ ސަގާފީ ގިނަ ކުޅިވަރު ތަކުން ރަށްތަށް ހަލަބޮލި ކުރިއިރު ރަށްރަށުގެ އިތުރުން މާލޭގައިވެސް އީދާ ދިމާކޮށް ރައްޔިތުންނާ ޖަމިއްޔާތަކުން ގިނަ ހަރަކާތްތައް ކުރިއަށްގެންދިޔައެވެ.
މާލޭގައި ހިންގި ބައެއް ހަރަކާތްތަކަށް ބަލާލާއިރު، މާލޭގައި ކުޑަކުދިންނަށް ހާއްސަކޮއްގެން ޖަމިއްޔަތުއް ސަލަފުން ވަނީ ވޭތުވެދިޔަ ދެ ދުވަހަށް ބަހާލައިގެން މަޖާ އަދި ތަފާތު ކުޅިވަރުތަކެއް ރަސްފަންނު ސަރަހައްދުގައި ކުރިއަށް ގެންގޮސްފައެވެ.
މީގެ އިތުރުން ގަލޮޅު ރައްޔިތުން އިސްނަގައިގެންވެސް ވަނީ މާލޭގައި ހަރަކާތްތަކެއް ކުރިއަށް ގެންގޮސްފައެވެ. މި ހަރަކާތްތައް ކުޑަ ކުދިންނަށާއި ބޮޑެތި މީހުންނަށް އަމާޒުކުރިއިރު އީދު ސަޔި ބުއިމާއި ޘަގާފީ ހަރަކާތްތަކާއި ލަވަޔާއި، މުނިފޫހިފިލުވުމުގެ ތަފާތު ގިނަ ހަރަކާތްތައްކެއް ކުރިއަށް ގެންދިޔައެވެ.
މީގެ އިތުރުން ހުޅުމާލޭގައި ދިރިއުޅޭ ރައްޔިތުންނަށް ޙާއްސަކޮއްގެން އެޗް.ޑީ.ސީއިންވެސް ވަނީ ހުޅުމާލޭގައި ކުޅިވަރުތައް ކުރިއަށް ގެންގޮސްފައެވެ. އެގޮތުން ހުޅުމާލޭގައި ކުރިއަށް ގެންދިޔަ ހަރަކާތްތަކުގެ ތެރޭގައި ސަޤާފީ ހަރަކާތް ތަކުގެ އިތުރުން ސްޓޭޖް ޝޯވް އަކާ ކުޑަކުދިންގެ ހަވީރު ހިމެނެއެވެ.