ރާއްޖޭގެ ސިއްޙީ ދައިރާއިން ހޯދާފައިވާ ކުރިއެރުންތައް ފާހަގަކުރައްވާ ދުނިޔޭގެ ސިއްޚަތު ޖަމިއްޔާ، ޑަބްލިއުއެޗްއޯއިން ރާއްޖެއަށް ތަޢުރީފްކޮށްފިއެވެ.
ރާއްޖޭގެ ސިއްޚީ ދާއިރާއިން ކުރައްވާފައިވާ މުހިއްމު މަސައްކަތްތައް ފާހަގަކޮށް އެކަމަށް ޑަބްލިއުއެޗްއޯއިން ތަޢުރީފްކުރީ މިއަދު ރާއްޖޭގައި ފެށި ޑަބްލިއުއެޗްއޯގެ އިރުމަތީއޭޝިޔާގެ 70 ވަނަ ބައްދަލުވުމުގައެވެ. ސެވެންޓިއަތު ސެޝަން އޮފް ދަ ޑަބްލިއުއެޗްއޯ ރީޖަނަލް ކޮމެޓީ ފޮރ ސައުތު އީސްޓް އޭޝިޔާގެ ނަމުގައި ރާއްޖޭގައި ފެށި މިބައްދުވުމުގައި ދެކުނު އިރުމަތީ އޭޝިޔާގެ ޤައުމުތަކުގެ ސިއްޚީ ދާއިރާ ތަމްސީލް ކުރައްވާ ބޭފުޅުންނާއި ޑަބްލިއުއެޗްއޯގެ އިސްވެރިން ބައިވެރިވަޑައިގަންނަވައެވެ.
މިއަދު ހެނދު ޕެރަޑައިސް އައިލޭންޑް ރިސޯޓުގައި ބައްދަލުވުން ފައްޓަވާ ދެއްވީ ރައީސުލްޖުމްހޫރިއްޔާގެ ޚާއްސާ މަންދޫބެއްގެ ހައިސިއްޔަތުން މިނިސްޓަރ އޮފް ފިޝަރީޒް އެންޑް އެގްރިކަލްޗަރ ޑރ. މުހައްމަދު ޝައިނީއެވެ. މި ބައްދަލުވުމުގައި މިނިސްޓަރ ޝައިނީ ދެއްކެވި ވާހަކަފުޅުގައި ސަރުކާރުން ފަށްޓަވާފައިވާ ސިއްޚީ ދައިރާގެ މަޝްރޫޢުތަކަށް އަލިއަޅުއްވާލައްވާ ސަރުކާރުން ސިއްޚީ ދާއިރާއަށް ދެއްވާ މުހިއްމުކަން ފަހަގަކުރެއްވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ހެލްތް އަބްދުﷲ ނާޒިމް އިބްރާހިމް ވަނީ ދުނިޔޭގެ ސިއްހަތު ޖަމިއްޔާއިން ރާއްޖޭގެ ސިއްޚީ ދާއިރާކުރިއެރުވުމަށް ދެއްވާ އެހީތެރިކަން ފާހަގަކުރައްވާފައެވެ. އަދި ދިވެހި ސަރުކާރުން ރާއްޖޭގެ ސީއްޚީ ދާއިރާއަށް ކުރައްވާ ޚަރަދު އިންތިހާއަށް އިތުރުވެފައިވާކަމަށާއި އޭގެ ރަނގަޅު ނަތީޖާ ފެންނަމުންދާކަމަށް މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުގައި ރާއްޖޭގެ ސިއްޚީ ދާއިރާ ހޯދާފައިވާ ކުރިއެރުންތައް ފާހަގަކުރެއްވިއެވެ. އެގޮތުން ލައިފް އެކްސްޕެކްޓެންސީ ނުވަތަ އާއްމުކޮށް މީހުން މަރުވާ އުމުރު ތަރައްޤީވެފައިވާ ޤައުމުތަކާއި އެއްވަރަކަށް މަތިވެފައިވާކަން ފާހަގަކުރެއްވިއެވެ. މީގެ އިތުރުން މިނިސްޓަރ ވަނީ މިފަހަރުގެ ބައްދަލުވުމުގައި ފާސްކުރަން ހަމަޖެހިފައިވާ ގަރާރު، މާލޭ ޑިކްލަރޭޝަންގައި ފާހަގަކުރާ ޝިޔާރާއި ގުޅުވައިގެން ރާއްޖެއަކީ ކުޑަ ޤައުމަކަށްވިޔަސް މޫސުމަށް އަންނަ ބަދަލުތަކާއި ދެކޮޅަށް ބައިނަލްއަޤުވާމީ މައިދާނުގައި އަޑުހަރު ޤައުމެއްކަން ފާހަގަކުރައްވާފައެވެ.
މިބައްދަލުވުމުގައި އިރުމަތީ އޭޝިޔާގެ ޤައުމުތަކަށް ކަނޑައަޅާފައިހުންނަވާ ޑަބްލިއުއެޗްއޯގެ ރީޖަނަލް ޑައިރެކްޓަރ ޕޫނަމް ކަތްރިޕާލް ސިއްޙީ ދާއިރާއިން ރާއްޖެހޯދާފައިވާ ކުރިއެރުން ފާހަގަކުރައްވާ އެކަމަށް ތަޢުރީފްކުރެއްވިއެވެ. އެގޮތުން ރާއްޖެއިން ނައްތާލާފައިވާ ބައެއް ބަލިތައް އޭނާ ފަހަގަކުރެއްވިއެވެ.
ސެވެންޓިއަތު ސެޝަން އޮފް ދަ ޑަބްލިއުއެޗްއޯ ރީޖަނަލް ކޮމެޓީ ފޮރ ސައުތު އީސްޓް އޭޝިޔާގެ ނަމުގައި ރާއްޖޭގައި ކުރިއަށްދާ މިބައްދަލުވުން މިމަހުގެ 10 ނިޔަލަށް ކުރިއަށްދާނެއެވެ. މިބައްދަލުވުމުގައި ޤައުމުތަކުގެ ސިއްޚީދާއިރާ ހަރުދަނާ ކުރުމާއި ގުޅޭގޮތުން މަޝްވަރާކޮށް މާލޭ ޑިކްލަރޭޝަންގެ ނަމުގައި ޤަރާރެއް ފާސްކުރާނެއެވެ.