ތިމާވެށި ޙިމާޔަތް ކުރުމުގެ ގޮތުންނާއި ދުޅަހެޔޮ ޞިއްހަތެއްގައި ހުރުމަށްޓަކައި ބައިސްކަލު ދުއްވުމަކީ މުހިންމު ކަމެއްކަން އަންގައިދިނުމުގެ ގޮތުން މޯލްޑިވްސް ބައިކް އެސޯސިއޭޝަންގެ ފަރާތުން ކުޑަކުދިންނަށް އަމާޒުކޮށްގެން ދަ އެނުއަލް ބައިކް ޓުއަރގެ ނަމުގައި ހަރަކާތެއް ކުރިއަށް ގެންގޮސްފިއެވެ.
އެދުވަހުގެ މުއްދަތަކަށް ރާވާލައިގެން ކުރިއަށް ގެންދިޔަ މި ހަރަކާތުގައި ބައިވެރިވުމުގެ ފުރުސަތު މިފަހަރު ލިބިފައި ވަނީ 20 ކުދިންނަށެވެ. ނަމަވެސް ކުރިއަށް ރޭވިގެން ބޭވޭ މިފަދަ އެހެން ޙަރަކާތް ތަކުގައި މިއަށް ވުރެ ގިނަ ކުދިން ބައިވެރިކުރުވާނެ ކަމަށް މޯލްޑިވްސް ބައިކް އެސޯސިއޭޝަން އިން މައުލޫމާތުދެއެވެ.
މިއަދު ކުރިއަށްދިޔަ މި ހަރަކާތުގައި ބައިވެރިވި ދަރިވަރުން ވަނީ މާލެ، ވިލިމާލޭގެ އިތުރުން ހުޅުމާލޭގައިވެސް ބައިސްކަލު ދުއްވާފައެވެ. މީގެ އިތުރުން ތަފާތު އެހެން ހަރަކާތްތަކުގައިވެސް މި ކުދިން ވަނީ ބައިވެރިވެފައެވެ. އެގޮތުން މާލޭގައި ހުންނަ ޝުގަރ ފެކްޓްރީގެ މަސައްކަތް ކުރިއަށްދާ ގޮތާ، ވިލިމާލެ މެރިން ވިލެޖްގެ މަސައްކަތް ކުރާގޮތާ، ހުޅުމާލޭގައި ހުންނަ ރެޖިފޯމް ފެކްޓްރީގެ މަސައްކަތްތައްވެސް ބަލާލާފައެވެ. މީގެ އިތުރުން ވިލިމާލޭގައި ކުރިއަށް ގެންދިޔަ ވިލިމާލެ ސާފު ކުރުމުގެ ހަރަކާތުގައިވެސް މި ކުދިންވަނީ ބައިވެރިވެފައެވެ.
އެއް ދުވަހުގެ މުއްދަތަ ކުރިއަށް ގެންދިޔަ މި ހަރަކާތާމެދު ބައިވެރިވި ކުދިން ބުނީ މިފަދަ ހަރަކާތެއް އެކުދިންނަށް އަމާޒު ކޮށްގެން ބޭއްވީތީ ވަރަށް އުފާވާކަމަށެވެ.
މޯލްޑިވްސް ބައިކް އެސޯސިއޭޝަނުން މަޢުލޫމާތުދޭ ގޮތުގައި މިއަހަރުގެ ނޮވެމްބަރުމަހު ބައިސްކަލު ދުއްވުމުގެ މުބާރާތެއް ބާއްވަން ހަމަޖެހިފައިވާ ކަމަށާއި މި މުބަރާތުގައިވެސް ކުޑަކުދިންނަށް ޚާއްސަކޮށްގެން ހަރަކާތްތަކެއް ކުރިއަށް ގެންދާނެކަމަށެވެ.