ތުލުސްދޫ ދާއިރާގެ ކުރީގެ މެންބަރު މުހައްމަދު ވަހީދު އިބްރާހީމް، ޕީޕީއެމުން ވަކިކޮށްފައި ވަނީ ސުޕްރީމް ކޯޓުގެ ހުކުމުގެ ފަހުން ކަމަށް ދައުލަތުގެ ވަކީލް ބުނެފިއެވެ.
ވަހީދުގެ ގޮނޑި ގެއްލިފައިވާކަމަށް އިލެކްޝަންސް ކޮމިޝަނުން ނިންމުމާއި ގުޅިގެން އެމައްސަލަ ވަހީދުގެ ފަރާތުން ސުޕްރީމް ކޯޓަށް ހުށައެޅުއްވި މައްސަލާގައި މިއަދު ބޭއްވި ފުރަތަ އަޑުއެހުމުގައި އޭނާ ވަނީ ޕީޕީއެމުން ވަކިވީ ސުޕްރީމް ކޯޓުގެ ޙުކުމުގެ ކުރިންކަމަށް ވިދާޅުވެ، ޕީޕީއެމްގެ މެންބަރެއް ނޫންކަން ކަނޑައަޅައި ދިނުމަށް އެދިވަޑައިގެންފައެވެ. ނަމަވެސް ދައުލަތުގެ ވަކީލް ވިދާޅުވީ، ވަހީދު ޕީޕީއެމުން ވަކިވިކަމަށް ކަނޑައެޅޭނީ އިލެކްޝަންސް ކޮމިޝަނުން އޭނާ ޕީޕީއެމްގެ ދަފްތަރުން ވަކި ކުރި ތާރީޚުންކަމަށެވެ. ވަހީދު ޕީޕީއެމްގެ ދަފްތަރުން އުނިކޮށްފައިވާކަމަށް އިލެކްޝަންސް ކޮމިޝަނުން ޕީޕީޢެމަށް އަންގާފައިވަނީ ސަތާރަ ޖުލައިގައިކަމަށް ދައުލަތުގެ ވަކީލް ވިދާޅުވިއެވެ.
ރައްޔިތުންގެ މަޖިލީހުގެ މެންބަރަކު މަޖިލީހަށް އިންތިޚާބުވި އިރު ހުންނެވި ޕާޓީ ނޫން އެހެން ޕާޓީއަކަށް ބަދަލުވުމުން، ވަކިވުމުން ނުވަތަ ޕާޓީން ވަކި ކުރުމުން މަޖިލީހުގެ މެންބަރުކަން ގެއްލޭނެ ކަމަށް ސުޕްރީމް ކޯޓުން ހުކުމް ކުރީ މިދިޔަ ޖުލައި 13 ގައެވެ.
ދައުލަތުގެ ވަކީލް ވިދާޅުވީ، ވަހީދު ޕީޕީއެމްގެ ދަފްތަރުން އުނިކޮށްފައިވަނީ ސުޕްރީމް ކޯޓުގެ ހުކުމުގެ ފަހުންކަމުން އޭނާގެ މެންބަރު ކަމުގެ ހައިސިއްޔަތު ގެއްލިފައިވާކަމަށެވެ. ޤާނޫނު އަސާސީ 74 ވަނަ މާއްދާގައި ބުނެފައިވަނީ ރައްޔިތުންގެ މަޖިލީހުގެ މެންބަރެއްގެ ގޮނޑި ގެއްލުނުކަމާމެދު ޚިލާފް އުފެދިއްޖެނަމަ އެ މައްސަލަކާމެދު އެންމެ ފަހުގެ ނިންމުން ނިންމާނީ ސުޕްރީމް ކޯޓުންކަމަށެވެ.
ރައްޔިތުންގެ މަޖިލީހުގެ ވިލިނގިލި ދާއިރާގެ މެންބަރު ސަޢުދު ޙުސައިންގެ ގޮނޑި ގެއްލިފައިވާކަމަށް އިލެކްޝަންސް ކޮމިޝަނުން ކަނޑައަޅާ އެދާއިރާގައި ބައި-އެލެކްޝަން ބޭއްވުމަށް ނިންމާފައިވާތީ، ސައުދުގެ ފަރާތުންވެސް އެ މައްސަލަ ސުޕްރީމް ކޯޓަށް ހުށައަޅާފައިވެއެވެ. ސުޕްރީމް ކޯޓުގައި މިހާރު އެމައްސަލައިގެ ޝަރީޢަތް ފެށިގެން ކުރިއަށް އެބަދެއެވެ.