ރައްޔިތުންގެ މަޖިލީހުގެ ހަތަރު ދާއިރާއެއްގެ ބައި-އިލެކްޝަން ބޭއްވުމަށް އިލެކްޝަންސް ކޮމިޝަނުން ނިންމުމާ ގުޅިގެން އެ ދާއިރާތަކުގައި ޕީޕީއެމުން ކެންޕެއިން ހަރަކާތްތައް ފަށައިފިއެވެ.
އިލެކްޝަނސް ކޮމިޝަނުން ބައި-އިލެކްޝަން ބޭއްވުމަށް އިޢުލާންކޮށްފައިވާ ހަތަރު ދާއިރާއަކީ، ދިއްދޫ ދާއިރާ، މަޑުއްވަރީ ދާއިރާ، ތުލުސްދޫ ދާއިރާ އަދި ގއ.ވިލިނގިލި ދާއިރާއެވެ.
ޕީޕީއެމްގެ ކެންޕެއިން ހަރަކާތްތަކުގައި ވަޒީރުންނާއި ރައްޔިތުންގެ މަޖިލީހުގެ ބައެއް މެންބަރުންގެ އިތުރުން ޕީޕީއެމްގެ ބައެއް އިސް ބޭފުޅުން ބައިވެރިވެވަޑައިގަންނަވައެވެ. އެގޮތުން ހއ.ދިއްދޫއަށް ވަޑައިގެންނެވި ވަފްދުގައި އެންމެ އިސްކޮށް ހިމެނިވަޑައިގަންނަވަނީ ހައުސިންގ މިނިސްޓަރ ޑރ.މުޙައްމަދު މުޢިއްޒުއާއި، ދާދި ފަހުން ޕީޕީއެމާއި ގުޅިވަޑައިގެންނެވި ރައްޔިތުންގެ މަޖިލީހުގެ ނާއިބު ރައީސް މޫސާ މަނިކެވެ. މިއީ މަޖިލީހުގެ ނާއިބު ރައީސް ޕީޕީއެމާއި ގުޅިވަޑައިގަތުމަށްފަހު ޕީޕީއެމްގެ ސިޔާސީ ހަރަކާތެއްގައި ބައިވެރިވެވަޑައިގަންނަވާ ފުރަތަމަ ފަހަރެވެ. މޫސާ މަނިކު ވިދާޅުވީ، ޕީޕީއެމްގެ ސިޔާސީ ހަރަކަތްތަކުގައި އޭނާގެ އެޕާޓީގެ ފުރަތަމަ ދުވަސް ވަރަށް ކާމިޔާބުކަމާ އެކު ކުރިއަށްދާކަމަށެވެ. ޕީޕީއެމްގެ މި ވަފްދުންވަނީ ދިއްދޫގެ ރައްޔިތުންނާއި ބައްދަލުކުރައްވާ ދިއްދޫގައި ކުރިއަށްދާ ތަރައްޤީގެ މަޝްރޫޢުތަކުގެ މަޢުލާމާތު ޙިއްސާކޮށްފައެވެ. ދިއްދޫއަކީ ތަރައްޤީގެ ގިނަ މަޝްރޫޢުތަކެއް ކުރިއަށްދާ ރަށެކެވެ.
ދިއްދޫގެ އިތުރުން ރ.މަޑުއްވަރީގައި ޕީޕީއެމްގެ ހަރަކާތްތަކުގައި އިސްކޮށް ބައިވެރިވެ ވަޑައިގަންނަވަނީ ޑިފެންސް މިނިސްޓަރ އާދަމް ޝަރީފް ޢުމަރާއި، ޑީއާރުޕީގެ ލީޑަރު މުޙައްމަދު ނަޝީދާއި، ޕީޕީއެމް ޕީޖީ ގްރޫޕްގެ ޑެޕިއުޓީ ލީޑަރު އިބްރާހީމް ފަލާހެވެ. އަދި މަޖިލީހުގެ ބައެއް މެންބަރުންވެސް ހިމެނިވަޑައިގަންނަވައެވެ. މީގެ އިތުރުން ތުލުސްދޫއަށް ވަޑައިގެންފައިވަނީ އެންވަޔަރަމަންޓް މިނިސްޓަރ ޠާރިޤް އިބްރާހީމާއި، ޕީޕީއެމް ޕީޖީ ގްރޫޕްގެ ޑެޕިޓީ ލީޑަރު ރިޔާޒް ރަޝީދާއި، ރައްޔިތުންގެ މަޖިލީހުގެ ބައެއް މެންބަރުންނެވެ.