މިއަހަރުގެ މިނިވަންދުވަހުގެ މުނާސަބަތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ދިވެހި ޤައުމާއި މުޚާޠަބު ކުރައްވާގޮތަށް ހަމަޖައްސަވައިފިއެވެ. ރައީސުލްޖުމްހޫރިއްޔާ ޤައުމާއި މުޚާޠަބު ކުރައްވާނީ، މި ޖުލައި މަހުގެ 26 ވާ ބުދަ ދުވަހުގެ ހެނދުނު 10:00 ގައި ޚަބަރުފަތުރާ ވަސީލަތްތައް މެދުވެރިކުރައްވައެވެ.
މިނިވަންދުވަހުގެ މުނާސަބަތުގައި ބާއްވަވާ ހެވިކަމާއި ކުޅިވަރުގެ ރަސްމިއްޔާތު މިނިވަން ދުވަހުގެ ރޭ 21:00 ގައި ގަލޮޅު ރަސްމީދަނޑުގައި ބާއްވަވާ ގޮތައް ވަނީ ނިންމަވާފައެވެ. މީގެއިތުރުން، ދިވެހިރާއްޖޭގެ ޤައުމީ ކެޑޭޓް ކޯގެ ފަރާތުން މިނިވަންދުވަހާއި ގުޅުވައިގެން ބާއްވަވާ ޕެރޭޑާއި ރޫޓްމާޗް މި ޖުލައި މަހުގެ 27 ވާ ބުރާސްފަތި ދުވަހު ހަވީރު 16:30 ގައި މާލޭގެ ބޮޑެތި މަގުތަކުގައި ކުރިޔަށް ގެންދާގޮތަށް ވަނީ ހަމަޖައްސަވާފައެވެ.
މިނިވަންދުވަހުގެ މުނާސަބަތުގައި، ރައީސުލްޖުމްހޫރިއްޔާގެ ދެކަނބަލުން ބާއްވަވާ ރަސްމީ ބައްދަލުކޮށްލެއްވުން އޮންނާނީ، މި ޖުލައި މަހުގެ 27 ވާ ބުރާސްފަތި ދުވަހުގެރޭގެ 21:00 ގައި ދަރުބާރުގޭގައެވެ.