ސަޢޫދީ ސަރުކާރުން، އެޤައުމުގައި ދިވެހިރާއްޖޭގެ އެމްބަސީއެއް ޢިމާރާތްކުރާނެ ބިމެއް ހަމަޖައްސައިދީފިއެވެ. ޕީއެސްއައިޕީގެ މަޝްރޫޢުގެ ދަށުން އަންނަ އަހަރު މި ބިމުގައި ޢިމާރަތްކުރަން ފެށޭނެކަމަށް ރާއްޖޭގެ ފޮރިން މިނިސްޓްރީން ވިދާޅުވެއެވެ.
ސަޢޫދީ ޢަރަބިއްޔާގައި ރާއްޖޭގެ އެމްބަސީއެއް ހުޅުވާފައިވަނީ 2008 ވަނަ އަހަރުއެވެ. މިހާތަނަށް އެމްބަސީ ހިންގަމުން އަންނަނީ ދިވެހި ސަރުކާރުގެ އަމިއްލަ ޢިމާރާތެއްގައެއް ނޫނެވެ. ސަޢޫދީ ޢަރަބިއްޔާއަކީ ޙައްޖާއި ޢުމްރާއަށާއި، އަދި ކިޔެވުމަށް ގިނަ ޢަދަދަކަށް ދިވެހިން ޒިޔާރަތްކުރާ ޤައުމެކެވެ. އެހެންކަމުން ދިވެހިންނަށް ފަސޭހައިން ޚިދުމަތް ލިބޭނެ ގޮތް ހަމަޖައްސަވައިދެއްވުމަށް ދިވެހި ސަރުކާރުން ގިނަ މަސައްކަތްތަކެއް ގެންދަވަނީ ކުރައްވަމުންނެވެ. ސަޢޫދީޢަރަބިޔާގައި ހުންނަވާ ދިވެހި ސަފީރު ޢަބްދު ﷲ ޙަމީދު ވިދާޅުވީ، ސަޢޫދީ ޢަރަބިއްޔާގައި ރާއްޖޭގެ އެމްބަސީއެއް ޢިމާރާތް ކުރެއްވުމަށާއި، ސަފީރު ހުންނަވާ ތަނަކާއި މުވައްޒަފުން ތިބުމަށް ޢިމާރާތެއް އެޅުއްވުމަށް ސަޢޫދީ ސަރުކާރުން އެޤައުމުން ބިމެއް ހަމަޖައްސަވާދެއްވާފައިވާ ކަމަށެވެ. އަދި ޢިމާރާތް ބިނާކުރުމަށް ޚަރަދުވާނެކަމަށް ލަފާކުރާ ފައިސާގެ ޢަދަދު ކަނޑއަޅާފައިވާ ކަމަށާއި، އަންނަ އަހަރުގެ ޕީއެސްއައިޕީގެ ފަށުން ޢިމާރާތުގެ ކޮންސްޓްރަކްޝަން މަސައްކަތް ފެށޭނެކަމަށް އުއްމީދުކުރެވޭކަމަށް ސަފީރު ވިދާޅުވިއެވެ. img:http://s3.psmnews.mv/images/660x400/14956217185080.jpg|ސަޢޫދީ އަރަބިއްޔާގައި ހުންނަ ދިވެހިރާއްޖޭގެ އެމްބަސީ - ފޮޓޯ: ޕީއެސްއެމް
ފޮރިން މިނިސްޓަރ ޑރ. މުޙައްމަދު ޢާޞިމް ވިދާޅުވީ، ބޭރު ޤައުމުތަކުގައި ހުންނަ ރާއްޖޭގެ މިޝަންތަކުގެ ދައުރު ފުޅާވަމުން އަންނަކަމަށެވެ. އަދި ކުރެވޭ މަސައްކަތްތައް އިތުރުވެފައިވާ ކަމަށެވެ. ޚާރިޖީ ސިޔާސަތުގެ އެންމެ ބޮޑު އެއް ދާއިރާއަކީ ދެޤައުމުގެ ގުޅުން ބަދަހިކުރުންކަމަށާއި، ވިޔަފާރިއާއި އިންވެސްޓްމަންޓްގެ ދާއިރާ ޕްރޮމޯޓްކުރުން ކަމަށް މިނިސްޓަރ ވިދާޅުވިއެވެ. ރާއްޖެއާއި ސަޢޫދީ އަރަބިއްޔާއާއި އޮތް ގުޅުން ވަރަށް ބަދަހިކަން މިނިސްޓަރ ފާހަގަކުރައްވާފައިވެއެވެ.
ސަޢޫދީ އަރަބިއްޔާއަކީ ޙައްޖާއި ޢުމްރާއަށާއި، ޢިލްމު އުގެނުމަށް ގިނަ ޢަދަދަކަށް ދިވެހިން ގޮސްއުޅޭ ޤައުމެކެވެ. އެޤައުމުގައި މިހާރުވެސް ރާއްޖޭގެ ދުއިސައްތައެއްހާ ދަރިވަރުން ތަޢުލީމް ޙާޞިލްކުރަމުން ގެންދެއެވެ. ސަޢޫދީ ސަރުކާރާއި ދިވެހި ސަރުކާރާ ދެމެދު އޮތް ގުޅުން ވަރަށް ބޮޑަށް ބަދަހިވެ ގުޅުން ވަރަށް ރަނގަޅުކަމަށް ސަރުކާރުން ވިދާޅުވެއެވެ. img:http://s2.psmnews.mv/images/660x400/14956217345501.jpg|ސަޢޫދީ އަރަބިއްޔާގައި ހުންނަ ދިވެހިރާއްޖޭގެ އެމްބަސީ - ފޮޓޯ: ޕީއެސްއެމް