ކުޑަކުދިންނަކީ މައިންބަފައިންގެ ދިރިއުޅުން އުފާކޮށްދިނުމުގައި ކިހާ މުހިންމު ދައުރެއް އަދާކުރާ ބައެއްކަން، މައިންބަފައިން އެކުދިންނަށް އިހްސާސްކޮށްދިނުމަކީ މުހިންމު ކަމެކެވެ. ވަގުތު ހުސްކޮށް، އެކުދިންގެ ހިތުގައި އުފެދެމުންދާ ޝަކުވާތަކާއި ޝުއޫރުތައް އަޑުއަހާ ދެނެގަތުމަކީ މުހިންމުކަމެކެވެ. ދަރިންގެ މުސްތަޤްބަލް އުޖާލާކޮށްދިނުމަށް މަސައްކަތްކޮށްދިނުމަކީ މައިންބަފައިންގެ މައްޗަށް ވާޖިބެކެވެ.
އެމީހުންގެ އުންމީދު ގުޅިފައިވަނީ ދަރިފުޅަށް ހޯދައިދޭން ބޭނުންވާ ތަޢުލީމަށާއި ތަރުބިއްޔަތަށްކަމަށް ވާއިރު، ޒަމާނަށް އަންނަމުންދާ ބަދަލާއެކީ މައިން ބަފައިންގެ މިއުއްމީދުތައް ހާސިލްކުރުމަށްޓަކައި އެތައް ޚަރަދުތަކެއް ކުރަންޖެހެއެވެ. ދަރިންގެ މުސްތަގްބަލް އުޖާލާ ކޮށްދިނުމަށްޓަކައި، މިއަދު އެކުދިންގެ މަންމަ އާއި ބައްޕަ މަސައްކަތުގެ މައިދާނަށް ނުކުމެފައިވާއިރު، ދަރިންނާއެކު ހޭދަކުރެވެނީ މަދު ވަގުތުކޮޅެކެވެ.
މަސައްކަތުގެ މާހައުލަށް މައިންބަފައިން ނުކުންނަނީ އެމީހުންގެ ތުއްތު ދަރިން ކޮންމެވެސް އެހެން މީހަކާއި ހަވާލުކޮށްލާފައެވެ. އާއިލާގެ މީހަކާއި ނުވަތަ ކުދިން ބެލުމަށްޓަކައި ގެއަށް ގެނެސްފައި ހުންނަ ބިދޭސީ މީހާއި ހަވާލުކޮށްފައެވެ.
ބޭރުތެރޭގައި އުޅެމުން ދަރިފުޅުގެ ހާލު ބެލިކަމުގައި ވިޔަސް އެކުދިންގެ ހިތުގައި އުފެދޭ އިހްސާސްތައް ދެނެގަނެވޭތޯ؟ މިއީ އުފެދޭ ސުވާލެކެވެ. ގިނަ ފަހަރު މައިންބަފައިން މަސައްކަތުން އެނބުރި ގެއަށް އަންނައިރު ހުންނަނީ އިރުއޮއްސި، ކުދިން ނިދާ ގަޑި ކުޑަތަންވެފައެވެ.
ވަރުބަލި ވެފައިހުންނަ މަންމަޔާއި ބައްޕަޔަށް ގިނަ ފަހަރު ދަރިފުޅާ ސަމާސާކޮށްލާނެ ވަގުތެއް ނުލިބެއެވެ. މިކަމުގެ ސަބަބުން ކުދިންނާއި އެކުދިންގެ މައިންބަފައިންނާއި ދެމެދު ނުފެންނަ ވަރުގަދަ ފާރެއް ރޭނި، ގުޅުން ހީނަރުވާގޮތް ދިމާވެ ދަރިންގެ ތަރުބިއްޔަތަށް ބުރޫއަރައެވެ. އެހެންނަމަވެސް އެކުދިން އެންމެ ރަނގަޅަށް ތަރުބިއްޔަތު ކުރެވޭނެ ބަޔަކީ ބުރަކޮށް އުޅެމުންވެސް ދަރިފުޅާއެކު ވަގުތު ހޭދަކޮށް އުފާވެރި އާއިލާއެއް ބިނާކުރުމަށް މަސައްކަތް ކުރާ ހިއްވަރުގަދަ މައިންބަފައިންނެވެ.
ޓެކްނޮލަޖީގެ ގޮތުން ކުރިއަރަމުން އަންނަ މިފަދަ ޒަމާނެއްގައި ކޮންމެ ގެއެއްގައި އިންޓަރނެޓް ފަދަ އެހެނިހެން ވަޞީލަތްތައް ލިބެން ހުރެއެވެ. ވީއިރު އެކުދިން އިންޓަނެޓާއި އެހެނިހެން ވަޞީލަތްތައް ބޭނުންކުރަނީ އެންމެ ހެޔޮގޮތުގައިތޯ ބެލުމަކީވެސް މުހިންމުކަމެކެވެ. ބަވަނަ ވެފައިވާ ދުނިޔެއެއްގައި، އެކި މާޙައުލުތައް ގުޅިލާމެހިފައިވާއިރު މިފަދަ ވަޞީލަތްތަކުގެ ސަބަބުން ކުދިންނަށް ނޭދެވޭ އަސަރުތައްކުރެއެވެ. އަދި މިފަދަ ކަންކަމުގެ ސަބަބުން ކުދިންގެ މުސްތަޤްބަލް އުޖާލާ ކުރުމަށް ބެލެނިވެރިން ކުރާ ބުރަ މަސައްކަތުން ކޮށައިދޭ މަގު ބަންދުވެ އެހެން މަގަކުން ދާތަން ފެންނަނީ މަދު ފަހަރަކު ނޫނެވެ.
ކުދިން ތަރުބިއްޔަތު ކުރުމުގައި މައިންބަފައިންގެ ވަރަށް ބޮޑު ޒިންމާއެއްވެއެވެ. ކުދިންނަށް ވަގުތުދީ، އިންޓަނެޓް ފަދަ ވަޞީލަތްތައް ބޭނުންކޮށްގެން އެއިން ހިފާ ބޭނުން ބެލެނިވެރިން ގާތުން ބަލައިފިނަމަ ކުދިން ރަނގަޅު ތަރުބިއްޔަތެއްގައި ބޮޑު ކުރެވިދާނެއެވެ.