އެމެރިކާގެ ރައީސް ޑޮނަލްށް ޓްރަމްޕް ކެމްޕެއިން ދުވަސްވަރު ގެންގުޅުއްވި އުކުޅުތަކާއި އިޢުލާނުކުރެއްވި ސިޔާސަތުތަކުގެ ސަބަބުން ގިނަ ބައެއްގެ ފާޑު ކިއުންތައް އަމާޒުވިއިރު އެންމެ ގިނަ ބައެއްގެ ނުރުހުންވުން އަމާޒުވި އެއް ސިޔާސަތަކީ، މުސްލިމު ޤައުމުތަކުން އެމެރިކާއަށް މީހުން އެތެރެވުން ހުއްޓުވުމުގެ ސިޔާސަތެވެ. ޓްރަމްޕްގެ ވެރިކަމަށް ސަތޭކަ ދުވަސް ވުމަށް ކައިރިވެފައިވާއިރު، މުސްލިމު ޤައުމުތަކާ ދެކޮޅަށް ޓްރަމްޕްގެ ސަރުކާރުން ނެރުނު ޤަރާރުތަކަކީ، ކުރިއަށް އޮތް ފަސްއަހަރު އެ ސަރުކާރުން މުސްލިމުންނާމެދު ގެންގުޅޭނެ ސިޔާސަތުތައް ބައްޓަންކުރާނެ ގޮތްކަމަށް މުރާސިލުން ދެކެއެވެ.
މުސްލިމު ޤައުމުތަކުން އެމެރިކާއަށް މީހުން ވަނުން މަނާކުރާ ރިޔާސީ ޤަރާރެއް ޓްރަމްޕް އެންމެ ފުރަތަމަ ނެރުއްވީ ރައީސްކަމާ ޙަވާލުވެވަޑައިގެންނެވިތާ 7 ވަނައަށްވީ ދުވަހުއެވެ. އެއީ މިއަހަރުގެ ޖެނުއަރީ މަހުގެ 27 ވަނަ ދުވަހައެވެ. މިޤަރާރުގައި ބުނެފައިވަނީ ގިނަ ޢަދަދެއްގެ މުސްލިމުން ދިރިއުޅޭ 7 ގައުމެއްގެ ރައްޔިތުން އެ ތާރީޚުން ފެށިގެން ތިންމަސް ދުވަސްވަންދެން އެމެރިކާއަށް ވަނުން މަނާކަމަށެވެ. މި ޤަރާރު ރައްދުވާ ޤައުމުތަކުގެ ތެރޭގައި އިރާޤް، އީރާން، ސޫރިޔާ، ޔަމަނު، ސޫދާން، ސޯމާލިއާ އަދި ލީބިޔާ ހިމެނެއެވެ. އެމެރިކާއަށް ވަނުމަށް ވިސާ ލިބިފައިވާ ފަރާތްތަކުގެ ވިސާތައް މި ޤަރާރާއެކު ބާޠިލްވެ ގިނަ ޢަދަދެއްގެ ބަޔަކު އެމެރިކާގެ ވައިގެބަނދަރުތަކުން ހިފަހައްޓުމަށްފަހު، އަނބުރާ ޤައުމަށް ފޮނުވާލިއެވެ.
މުސްލިމް ޤައުމުތަކާ ދެކޮޅަށް ނެރުނު މިޤަރާރު ތަންފީޒުކުރުވުން ހުއްޓުވުމަށް އެމެރިކާގެ ކޯޓުތަކުން ފެށި މަސައްކަތުގެ ނަތީޖާއެއްގެ ގޮތުން، ފެބްރުއަރީ މަހުގެ 3 ވަނަ ދުވަހު އެމެރިކާގެ ބޮސްޓަންގެ ފެޑެރަލް ކޯޓަކުން ވަނީ މި ޤަރާރަށް ޢަމަލުކުރުން މަނާކުރާ ޢަމުރެއް ނެރެފައެވެ. ޓްރަމްޕް ސަރުކާރުން މުސްލިމް ޤައުމުތަކާ ދެކޮޅަށް ކުރަމުންދިޔަ މަސައްކަތްތައް މި ހިސާބުންވެސް މަޑުޖައްސާލާފައެއް ނުވެއެވެ. ޓްރަމްޕް ވަނީ ޖެނުއަރީމަހު ނެރުއްވި ޤަރާރު މުރާޖަޢާކުރައްވައި، މާރޗް މަހުގެ 6 ވަނަ ދުވަހު އަލުން ޤަރާރެއް ނެރުއްވާފައެވެ. މި ޤަރާރުގައި އިރާޤު ހިމަނާފައި ނުވާއިރު އަނެއް 6 ޤައުމުގެ ރައްޔިތުން ކުރިއަށް އޮތް ތިންމަސް ދުވަހަށް އެމެރިކާއަށް ވަނުން މަނާކޮށް މި ޤައުމުތަކުގެ ރެފިއުޖީން 4 މަސް ދުވަހަށް އެމެރިކާން ވަނުން މަނާކުރިއެވެ. އެމެރިކާގެ ރައީސްގެ ހަރުކަށި މި އާ ޤަރާރުވެސް ހުއްޓުވާފައިވަނީ އެޤައުމުގެ ކޯޓުތަކުންނެވެ. އެގޮތުން، މާރޗް މަހުގެ 15 ވަނަ ދުވަހު ހަވާއީގެ ކޯޓަކުން ކުރި ޙުކުމެއްގައި ވަނީ މި ޤަރާރު އެމެރިކާގެ އެއްވެސް ސްޓޭޓެއްގައި ތަންފީޒުކުރުން މަނާކޮށްފައެވެ.
އެމެރިކާގެ ކޯޓުތަކަށް ޓްރަމްޕް ވަނީ ވަރުގަދަ ފާޑުކިއުންތައް އަމާޒުކުރައްވާފައެވެ. އަދި މި ޤަރާރު ތަންފިޒުކުރުމުގެ ބާރު ހޯދުމަށް ކޯޓުތަކާ ޤާނޫނީ ހަނގުރާމަ ކުރުމަށް ތައްޔާރަށް އޮތްކަމަށް އެމެރިކާ ސަރުކާރުން ވަނީ ބުނެފައެވެ. މުސްލިމް ޤައުމުތަކުން އެމެރިކާއަށް ރައްޔިތުން ވަނުން ހުއްޓުވުމަށް ޓްރަމްޕްގެ ސަރުކާރުން ކުރަމުންދާ މަސައްކަތްތަކާއެކުވެސް ޓްރަމްޕްގެ ސަރުކާރާ މެދު އެމެރިކާގެ މުސްލިމުން އަދި އުއްމީދު ކަނޑައެއް ނުލައެވެ. އެމެރިކާގެ ބައެއް މުސްލިމުން ދެކޭގޮތުގައި، ޓްރަމްޕަކީ އަސްލު ކޮންކަހަލަ މީހެއްކަން ދެނެގަތުމަށް ޓްރަމްޕަށް އަދި ވަގުތު ދޭންޖެހެއެވެ.