މޯލްޑިވްސް ބްލަޑް ސަރވިސްއާއި ސިވިލް ސަރވިސް ޓްރެއިނިން އިންސްޓިޓިއުޓާއި ގުޅިގެން ލޭހަދިޔާ ކުރުމުގެ ޙަރަކާތެއް މިއަދު ހިންގައިފިއެވެ.
މިއަދު ހެނދުނު 9:00 ން މެންދުރު 1 އަށް ކުރިއަށްގެންދިޔަ މި ޙަރަކާތަކީ، ދުނިޔޭގެ ސިއްޙަތުދުވަހާއި ގުޅިގެން ކުރިއަށްގެންދިޔަ ޙަރަކާތެކެވެ. ސިވިލް ސަރވިސް ޓްރެއިނިންގ އިންސްޓިޓްގައި ކުރިއަށްގެންދިޔަ ލޭހަދިޔާކުރުމުގެ މިޙަރަކާތަކީ، ސިވިލް ސަރވިސް ޓްރެއިނިންގ އިންސްޓިޓިއުޓްގެ އިޖްތިމާޢީ ޒިންމާގެ ދަށުން އެ އިނިސްޓިޓިއުޓްގެ ދަރިވަރުން އިސްނަގައިގެން މޯލްޑިވްސް ބްލަޑް ސާރވިސްއާއި ގުޅިގެން ކުރިއަށްގެންދިޔަ ޙަރަކާތެކެވެ.
މިޙަރަކާތް ޝަރަފްވެރިކޮށްދެއްވާފައިވަނީ، އޭޑީކޭ ހޮސްޕިޓަލްގެ މެނޭޖިން ޑިރެކްޓަރ އަޙްމަދު ޢައްފާލްއެވެ. ލޭހަދިޔާކުރުމުގެ މުޙިއްމުކަމާއި ގުޅޭގޮތުން ވާހަކަ ދައްކަވަމުން ޢައްފާލް ވިދާޅުވީ، ރާއްޖޭގައި މިހާރު އަހަރެއްގެ މައްޗަށް ނުވަހާހަށްވުރެ ގިނަ ޕެކެޓްގެ ލޭ ބޭނުންވާ ކަމަށާއި މި ލޭއަކީ ހަމައެކަނި ތެލެސީމިއާ ބަލި ހުންނަ ފަރާތްތަކަށް ހޯދާ އެއްޗެއްނޫންކަމަށެވެ. އެގޮތުން ހޮސްޕިޓަލްތަކުގައި ހަދާ ބޮޑެތި ސާރޖަރީތަކަށްވެސް ލޭ ބޭނުންވާ މިންވަރު އިތުރުވެފައިވާކަމަށާއި އެހެންކަމުން ލޭ ރައްކާކުރެވިފައި ހުރުން މުޙިއްމު ކަމަށް އައްފާލް ވިދާޅުވިއެވެ.
"ވަކި މުއްދަތަކަށް ބޭންކުގައި ލޭ ބެހެއޓެނީ އެހެންވީމާ މުއްދަތު ހަމަވުމުގެ ފުރުސަތު ވަރަށް އެބައޮވޭ. އެހެންކަމުން ލޭހަދިޔާ ކުރާ ކަމަށް ވާނަމަ ބެންކުގައި ލޭ ބެހެއްޓޭ މުއްދަތުގެ ތެރޭގައި އެހެންމީހަކަށް ދެވޭނެ ފުރުސަތު ބޮޑުވާނެ" އައްފާލު ވިދާޅުވިއެވެ.
ދުނިޔޭގެ ސިއްޙަތް ދުވަހާއި ގުޅިގެން ކުރިއަށްގެންދިޔަ ލޭހަދިޔާ ކުރުމުގެ މި ޙަރަކާތުގައި ހެލްތު މިނިސްޓްރީގެ އިސްވެރިންނާއި ސިވިލް ސަރވިސް ކޮމިޝަންގެ އިސްވެރިންގެ އިތުރުން މުވައްޒަފުންވެސް ވަނީ ބައިވެރިވެފައެވެ. 100 އަށްވުރެ ގިނަ ފަރާތުން ލޭހަދިޔާކުރުމަށް ހަމަޖެހިފައިވާ މިޙަރަކާތުގައި، ސިވިލް ސާރވިސްގެ އިދާރާތަކާއި، މިނިވަން މުޢައްސަސާތަކުގެ އިތުރުން ޢާއްމު ފަރާތަކުންވެސް ބައިވެރިވެފައިވެއެވެ.