ފ. އަތޮޅުގައި ސަޢޫދީ ސަރުކާރުން ކުރިއަށް ގެންދަން އުޅޭ މަޝްރޫޢަކީ ކުރީގެ ރައީސް ޑރ. މުޙައްމަދު ވަޙީދުގެ ވެރިކަމުގައި ފެށްޓެވި މަސައްކަތެއް ކަމަށާއި އެ މަޝްރޫޢާ ގުޅޭގޮތުން ރާއްޖޭގެ ގިނަ އަދަދެއްގެ ސިޔާސީ ލީޑަރުންނާއި ރައީސް ވަޙީދު މަޝްވަރާކުރެއްވި ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޕީޕީއެމްއާ އަލަށް ގުޅުނު މެމްބަރުންގެ ފޯމުތައް ޙަވާލުކުރުމަށް ބުދަދުވަހު ސްޓެލްކޯގައި ބޭއްވި ރަސްމިއްޔާތެއްގައި ވާހަކަދައްކަވަމުންނެވެ.
ސަޢޫދީ ސަރުކާރުން ފ. އަތޮޅުގައި ފަށަން މަޝްވަރާކުރަމުން އަންނަ މަޝްރޫއާ ގުޅޭގޮތުން އިދިކޮޅު ފަރާތްތަކުން ޝޯޝަލް މީޑިއާގައި އައީ ތަފާތު އެކި ވާހަކަތައް ދައްކަމުންނެވެ. އެގޮތުން ފ. އަތޮޅު ވިއްކާލަން އުޅޭ ކަމަށް ބުނެ އިދިކޮޅު ފަރާތްތަކުން މީޑިއާގައިވެސް އައީ ތަފާތު ގޮތްގޮތަށް ވާހަކަދައްކަމުންނެވެ.
ފ. އަތޮޅުގެ މަޝްރޫޢަށް އިޝާރާތްކުރައްވައި ރައީސް ޔާމީން ވިދާޅުވީ، ފ. އަތޮޅުގައި ފަށަން އުޅޭ ބިޔަ މަޝްރޫޢުގެ މަޝްވަރާތަކަކީ އެމަނިކުފާނުގެ ސަރުކާރުގައި ފެއްޓެވި މަޝްވަރާތަކެއް ނޫން ކަމަށެވެ. އެ މަޝްރޫޢުގެ ވާހަކަތައް ކުރީގެ ރައީސް ޑރ. މުޙައްމަދު ވަޙީދުގެ ވެރިކަމުގައި ދެކެވިގެން އައިސްފައިވާކަމަށް ރައީސް ޔާމީން ވިދާޅުވިއެވެ. ރައީސް ވިދާޅުވީ އެ މަޝްރޫޢާ ގުޅޭގޮތުން އޭރު ރާއްޖޭގައި އެންމެ އިސްކޮށް ސިޔާސީ ދާއިރާގައި ޙަރަކާތްތެރިވި ގިނަ ފަރާތްތަކަކާ އެ މަޝްރޫޢުގެ ވާހަކަ ރައީސް ވަޙީދު ޙިއްޞާކުރެއްވި ކަމަށެވެ. އަދި އޭގެތެރޭގައި ކުރީގެ ރައީސުންވެސް ހިމެނިވަޑައިގަންނަވާ ކަމަށް ރައީސް ވަޙީދާ ޙަވާލާދެއްވާ ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އެފަދަ ބިޔަ މަޝްރޫޢުއެއް ރާއްޖޭގައި ކުރިއަށް ގެންދިއުމަށް ޤާނޫނުތައް ބޭނުންވާ ކަމަށެވެ. އަދި އެފަދަ އިންވެސްޓްމަންޓްތައް ރާއްޖެ ގެނައުމަށް ބޭނުންވާ ޤާނޫނުތައް މިއަދުގެ ސަރުކާރުން ހަދާނެ ކަމަށް ރައީސް ޔާމީންގެ ވާހަކަފުޅުގައި ވިދާޅުވިއެވެ. ރައީސް ވިދާޅުވީ އެފަދަ އިންވެސްޓްމަންޓުތައް ޙިމާޔަތްކުރުމަށް ކޮށްދޭންޖެހޭ ކަންތައްތައްވެސް ހުންނާނެ ކަމަށާއި އެކަންކަމަކީވެސް ކުރަންޖެހޭނެ ކަންތައްތައް ކަމަށެވެ.
"ސަރުކާރުން މިއުޅެނީ އެއްވެސް ހާލެއްގައި އެއްވެސް ތަނެއް އަމިއްލަ ކުރާކަށްނޫން. އަދި އެއްވެސް ބަޔަކަށް އެއްވެސް ތަނެއް އަމިއްލަ ކުރުމަށް ދޭކަށްވެސް ނޫން،" ރައީސް ވިދާޅުވިއެވެ.
ސަޢޫދީ ރަސްގެފާނު ސަލްމާން ބިން ޢަބްދުލްޢަޒީޒު ރާއްޖެއަށް ކުރައްވަން ހަމަޖެއްސެވި ދަތުރުފުޅު، ފަސްކުރެއްވީ ރާއްޖޭގައި ހަލުވިކަމާއެކު ފެތުރެމުންދިޔަ އެޗްވަންއެންވަންގެ ސަބަބުންނެވެ.
މި ޖަލްސާގައި ރައީސް ޔާމީން ވިދާޅުވީ ކުރިއަށް އޮތީ ޙައްޖު މޫސުމުގައި ސަޢޫދީ ރަސްގެފާނާ ބައްދަލުވާނެ ކަމަށެވެ. އަދި ރައީސް ޔާމީނަށް އެޤައުމަށް ވަޑައިގެން ރަސްގެފާނާއި ސަޢޫދީ އެހެން މަސްއޫލްވެރިންނާ ބައްދަލުކުރެއްވުމަށް ދަޢުވަތު ދެއްވާފައިވާ ކަމަށްވެސް ރައީސް ޔާމީންގެ ވާހަކަފުޅުގައި ވިދާޅުވިއެވެ.
"ސަޢޫދީ ރަސްގެފާނާ ވަރަށް އަވަހަށް ބައްދަލުވާނެ. އަދި ކުރަން ބޭނުންވާ ކަންކަން ކުރުމުގެ ފުރުޞަތުވެސް ލިބިގެންދާނެ. ސަޢޫދީއާއެކު މިހާރު ކުރަންހުރި އެގްރީމަންޓްތަކާ ލިބެންހުރި އެހީގެ ކަންކަމުގައި ސަރުކާރުގެ ވަޒީރުން ސަޢޫދީއަށް ވަރަށް އަވަހަށް ދަތުރުކުރައްވާނެ،"
ރައީސް ޔާމީން ވަނީ ރާއްޖޭގެ އެއްވެސް ތަނެއް ވިއްކާނުލައްވާނެ ކަމަށް ވިދާޅުވެ އެމަނިކުފާނު ދައްކަވާ ވާހަކަފުޅު ތަކުރާރުކުރައްވާފައެވެ. އެގޮތުން ރާއްޖެއަށް އަންނަ އެއްވެސް އިންވެސްޓްމަންޓަކުން ރާއްޖޭގެ އިސްތިގްލާލާއި ސިޔާދަތާއި މިނިވަންކަމަށް އެއްވެސް ބުރުލެއް ނާރާނެކަމަށް ރައީސް ޔާމީން ވަނީ ވިދާޅުވެފައެވެ.