ރާއްޖޭގައި މިހާރު ފެތެރެމުންދާ ރޯގާއާ ގުޅިގެން، ސިވިލް ސަރވިސްގައި މަސައްކަތްކުރާ މާބަނޑު މުވައްޒަފުންނަށް މުސާރައާއި ޢިނާޔަތްތަކައެކު، މިއަދުން ފެށިގެން, ޗުއްޓީދީފިއެވެ.
ސިވިލް ސަރވިސް ކޮމިޝަނުން ނެރުނު ސަރކިއުލާއެއްގައި ވިދާޅުވެފައިވަނީ، މިހާރު ފެތުރެމުންދާ އިންފުލުއެންޒާ ރޯގާގައި އެންމެ ނުރައްކާތެރި ޙާލަތު މެދުވިރިވާ ކެޓަގަރީގައި މާބަނޑު މީހުން ހިމެނޭތީ، ސިވިލް ސަރވިސްގައި މަސައްކަތް ކުރާ މާބަނޑު މުވައްޒަފުން ވަކި ގޮތެއް އަންގަވަންދެން މުސާރައާއި، ޢިނާޔަތްތައް ލިބޭނޭހެން، މަސައްކަތް ނުނިކުންނަށް ގޮތަށް ހަމަޖައްސަވާފައިވާ ކަމަށެވެ. ރަޖިސްޓްރީކޮށްފައިވާ ސިއްޙީ މަސައްކަތްތެރިއަކު ދޫކޮށްފައިވާ މާބަނޑުކަން އަންގައިދޭ ލިޔުން، މާބަނޑު މުވައްޒަފުން މަސައްކަތްކުރާ އިދާރާއަށް ހުށަހެޅުމުން މިއަދުން ފެށިގެން މަސައްކަތަށް ނުނިކުންނަ ގޮތަށް ހަމަޖައްސަވާފައިވާ ކަމަށް ސިވިލް ސަރވިސް ކޮމިޝަންގެ ސާރކިއުލާގައިވެއެެވެ.
އަދި މަސައްކަތަށް ނުނިކުމެ ހުންނަ މުއްދަތުގައި ގޭގައި ހުރެގެން ކުރެވެން ހުރި މަސައްކަތްތައް ކުރުމަށާއި، އޮފީހަށް ކޮންމެހެން ބޭނުންވެއްޖެ ޙާލަތެއްގައި އޮފީހުގެ މަސައްކަތުގައި އެހީތެރިވެދިނުމަށް ސިވިލް ސަރވިސް ކޮމިޝަނުން އެދިވަޑައިގަންނަވައެވެ.
ސިވިލް ސަރވިސްގެ އިތުރުން ސަރުކާރުގެ ބައެއް ކުންފުނިތަކުންވެސް ވަނީ މިއުސޫލުން މީގެކުރިން ޢަމަލުކުރަން ފަށާފައެވެ. އެގޮތުން ޕީއެސްއެމްއިން ވެސްވަނީ އެކުންފީގެ މުވައްޒަފުންގެތެރެއިން މާބަނޑު އަންހެނުންނަށް މުސާރައާއި ޢިނާޔަތްތައް ލިބޭގޮތަށް ޗުއްޓީ ދީފައެވެ.