މިމަހުގެ ތެރޭގައި ސަޢޫދީ ރަސްގެފާނު ރާއްޖެ ވަޑައިގަންނަވަން އުޅުއްވާތީއާއި ފ. އަތޮޅު ސަޢޫދީ ސަރުކާރަށް ވިއްކާލާކަން އުޅޭކަމަށް ބުނެ، ޝޯޝަލް މީޑީއާގައި އެކި ވާހަކަތައް ގެންދަނީ ފަތުރަމުންނެވެ. ސަޢޫދީ ޢަރަބިއްޔާގެ ތަޞައްވުރާއި އަދި ސަޢޫދީ ޢަރަބިއްޔާއާއި ރާއްޖެއިން ބާއްވާ ގުޅުމާއި އެ ގުޅުމުގެ ތެރެއިން ޤައުމީ ތަރައްޤީއަށް ކުރެވޭ މަސައްކަތާމެދު ޢާންމުންގެ ހިތުގައި ބިރުވެރިކަން އުފެއްދުމަށް މަސައްކަތްކުރުންކަމަށް ބެލޭ ފަދަ ވާހަކަތައް ގެންދަނީ ފަތުރަމުންނެވެ. މިގޮތުން ސަޢޫދި އަރަބިއްޔާއަކީ ޓެރަރިސްޓުން އުފައްދާ ޤައުމެއްކަމަށް ބުނެ އެއްބަޔަކު ފާޑުކިޔަމުންދެއެވެ.
އެމްޑީޕީ ސަރުކާރުގެ ފޮރިން މިނިސްޓަރުކަން ކުރެއްވި އަޙްމަދު ނަސީމް ސަޢޫދީ ޢަރަބިއްޔާއަށް ފާޑު ވިދާޅުވެ ޓައިމްސް އޮފް އިންޑިއާއަށް ދެއްވި އިންޓަވިއުއެއްގައި ވަނީ އެކި ގޮތްގޮތުން ރާއްޖެއަށް ސަޢޫދީން އެހީވަނީ ހަރުކަށި ފިކުރު ރާއްޖޭގައި ފެތުރުމަށް ކަމަށް ތުހުމަތުކުރައްވާފައެވެ.
img:http://s4.psmnews.mv/images/660x400/4118.jpg|ކުރީގެ ފޮރިންގ މިނިސްޓަރ އަޙްމަދު ނަސީމް
ސަޢޫދީ ޢަރަބިއްޔާއަކީ ޓެރަރިސްޓް ޤައުމެއް ކަމަށް ބުނެ، ބައެއް ފަރާތްތަކުން ދައްކާ ވާހަކަތަކަށް ރައްދު ދެއްވަމުން ކުރީގެ އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ޓެރަރިޒަމާ ދެކޮޅަށް ސަޢޫދީން ޤާއިމްކޮށްފައިވާ ފަދަ ހަރުދަނާ ނިޒާމެއް ދުނިޔޭގެ އެހެން އެއްވެސް ޤައުމެއްގައި ޤާއިމްކޮށްފައިނުވާ ކަމަށެވެ. އަދި ހަރުކަށި ފިކުރުގެ މީހުން އިޞްލާޙުކޮށް، ރަނގަޅު މީހުންނަށް ހެދުމަށް ސަޢޫދީގެ ދާޚިލީ ވުޒާރާގެ ދަށުގައި ޚާއްޞަ މަރުކަޒެއް ޤާއިމުކޮށް އެ މަރުކަޒުން ކުރާ މަސައްކަތްތަކުގެ ނަތީޖާއެއްގޮތުން ގިނަ ބަޔަކު އެނބުރި ހެޔޮމަގަށް އައިސްފައިވާކަންވެސް ޝަހީމް ފާހަގަކުރެއްވިއެވެ.
img:http://s1.psmnews.mv/images/660x400/14716792523464.jpg|އިސްލާމިކް ޔުނިވަރސިޓީގެ ޗާންސެލަރ ޑރ މުހައްމަދު ޝަހީމް އަލީ ސަޢީދު - fފައިލް ފޮޓޯ: ޕީއެސްއެމް
ސަޢޫދީ ޢަރަބިއްޔާއަށް އަމާޒުކުރާ ފާޑުކިޔުންތަކަށް، ޑރ. ޢަބްދުލްމަޖީދު ޢަބްދުލްބާރީވެސް ވަނީ ރައްދުދެއްވާފައެވެ. ކުރީގެ ރައީސް މުޙައްމަދު ނަޝީދުގެ ސަރުކާރުގައި އިސްލާމިކް މިނިސްޓަރކަން ކުރެއްވި ޑރ. ޢަބްދުލްމަޖީދު ޢަބްދުލްބާރީ ވިދާޅުވީ ސަޢޫދީ ޢަރަބިއްޔާއިން ތަޢުލީމް ޙާޞިލްކުރައްވައިގެން ތިއްބެވި ބޭފުޅުންނަކީ ޤައުމަށް ގިނަގުނަ ޚިދުމަތްތަކެއް މިހާރުވެސް ކޮށްދެއްވަމުން ގެންދަވާ ބޭފުޅުން ކަމަށެވެ. އަދި އެބޭފުޅުންގެ ފަރާތްޕުޅުން ދުވަހަކުވެސް ދީނީ ހަރުކަށި ޚިޔާލުތައް މުޖުތަމަޢުގައި ފެތުރުއްވުމަށް މަސައްކަތް ކުރައްވިތަން ފެނިވަޑައިގެންފައި ނުވާކަމަށްވެސް ކަމަށް ޑރ. މަޖީދު ވިދާޅުވިއެވެ.
img:http://s4.psmnews.mv/images/660x400/14888113744886.jpg|ކުރީގެ އިސްލާމިކް މިނިސްޓަރ އަބްދުލްމަޖީދު އަބްދުލްބާރީ
ފ އަތޮޅު ވިއްކާލަން އުޅޭކަމަށް ބުނެ އިދިކޮޅު ފަރާތްތަކުން ދައްކަމުން ގެންދާ ވާހަކަތަކަށް ރައްދުދެއްވަމުން ރައީސް ޔާމީން ވިދާޅުވީ ފ. އަތޮޅު ވިއްކަވާލައްވަން ވާހަކައަކީ އުފެދިގެންވާނެ ސުވާލެއް ނޫންކަމަށާއި އެ އަތޮޅު ވިއްކަވާލައްވަން ސަރުކާރުން މަސައްކަތް ނުކުރައްވާކަމަށެވެ. އަދި ފ. އަތޮޅަށް ގެންނަވަނީ ދިހަ ބިލިއަން ޑޮލަރުގެ ބިޔަ މަޝްރޫއެއްކަމަށާއި އެ މަޝްރޫޢުގެ ސަބަބުން މުޅި އެ އަތޮޅު ބަދަލުކޮށްލައި ފަތުރުވެރިކަމަށް ރާއްޖެ ބަރޯސާވެގެން އޮންނަ އޮތުން ނިމުމަކަށް އަންނާނެކަމަށް ޤަބޫލުފުޅުކުރައްވާކަމަށެވެ.