ފ. އަތޮޅުގައި ކުރިއަށްގެންދަވަން އުޅުއްވަނީ، މަދުވެގެން 150 ބިލިއަން ރުފިޔާގެ ބިޔަ މަޝްރޫޢެއްކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ. މިއީ 5 އަހަރު ދުވަހުގެ ދިވެހި ދައުލަތުގެ ބަޖެޓާ އެއްވަރު ޢަދަދެކެވެ.
ސްޓެލްކޯގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ ފ އަތޮޅުގައި ކުރިއަށްގެންދަވަން އުޅުއްވަނީ މީގެ ކުރިން ދިވެހިރާއްޖެ ނުދެކޭފަދަ، އެތައްހާސް މިލިއަން ޑޮލަރުގެ ބިޔަ މަސްރޫއެއްކަމަށެވެ. އެގޮތުން ފ. އަތޮޅުގައި ހިންގަވާ މަސްރޫޢުގެ އިންވެސްޓްމެންޓްގެ ޖުލްމަ އަގު 10 ބިލިއަން ޑޮލަރަށް އަރާނެކަމަށް އަންދާޒާކުރެވޭކަމަށް ރައީސުލްޖުމްހޫރިއްޔާވިދާޅުވިއެވެ. އެއީ ދިވެހިރުފިޔާއިން ބަލާނަމަ 154 ބިލިއަން ރުފިޔާއެވެ. މިއީ 5 އަހަރު ދުވަހުގެ ދިވެހި ދައުލަތުގެ ބަޖެޓާ އެއްވަރު އަދަދެއްގެ ފައިސާއެވެ.
ފ. އަތޮޅު ވިއްކާލަން އުޅޭ ކަމަށްބުނެ ދައްކާ ވާހަކަތަކަށް ރައްދުދެއްވައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވީ ދިވެހިރާއްޖޭގެ އެއްވެސް ބިމެއް އެއްވެސް ފަރާތަކަށް ވިއްކާލަން ނޫޅުއްވާކަމަށެވެ. ފ. އަތޮޅުގައި ހިންގަވަން އުޅުއްވަނީ މުޅި ރާއްޖޭގެ އިޤްތިޞާދީ ތަޞައްވަރު އެކޮށް ބަދަލުކޮށްލާފަދަ މަސްރޫޢެއްކަމަށާއި، އެއީ ދިވެހި ދައުލަތަށް ބޮޑު މުއްސަންދިކަމެއް ލިބިގެންދާނެ މަސްރޫއެއްކަމަށް ރައީސުލްޖުމްހޫރިއްޔާވިދާޅުވިއެވެ.
"ފ. އަތޮޅުގައި ވާން މިއުޅެނީކީ އެއްގޮތަކަށްކަވެސް އަޅުގަނޑުމެންނަށް ޤަބޫލުކުރަން ދަތިކަމެއްނޫން. ފ. އަތޮޅުގައި ވާން މިއުޅޭ ކަމަކީ އޭގެ ނަތީޖާ ރަނގަޅުވެއްޖެ ކަމަށް ވަންޏާ ދިވެހިރާއްޖެ މުޅި ދުނިޔޭގެ ޗާޓުގައި އެއަށްވުރެއް ވަރުގަދައަށް ފަވާލެވޭނެ އެހެން ކަމެއް ނާންނާނެ. ފ. އަތޮޅަށް އަންނަން އެއޮތީ އެތައްހާސް މިލިއަން ޑޮލަރެއްގެ ޕްރޮޖެކްޓެއް. އަޅުގަނޑުމެންގެ ނެގޯސިއޭޝަންތަކުގެ ތެރޭގައި ދިޔައިރު އެއް އެސްޓިމޭޓެއްގައި 10 ހާސް މިލިއަން ޑޮލަރުގެ މަސްރޫޢެއް މި މަސްރޫއަކީ. އޭގެތެރޭގައި ބައިނަލްއަޤްވާމީ ކަނޑުގެ ކުޅިވަރުތަކުގެ އެތައްކަމެއް، މިކްސްޑް ޑިވަލޮޕްމެންޓް، ރެސިޑެންޝަލް ހައިކްލާސް ޑިވަލޮޕްމެންޓް، ޓޫރިސްޓް އެތައް ރިސޯޓެއް، އެތައް އެއަޕޯޓެއް، އެތައް ބައިވަރު މަސައްކަތްތަކެއް ހިމެނޭ މަޝްރޫއެއް މި މަޝްރޫއަކީ." ރައީސް ޔާމީން ވިދާޅުވިއެވެ.
ފ. އަތޮޅުގެ ވަކި ސަރަހައްދެއް ތަރައްޤީކުރައްވަނީ ޚާއްޞަ އިޤްތިޞާދީ ސަރަޙައްދެއްގެ ގޮތުގައިކަން ފާހަގަކުރައްވަމުން އެމަނިކުފާނު ވިދާޅުވީ ދިވެހިރާއްޖޭގެ އެއްވެސް ބިމެއް ދިވެހިރާއްޖޭގެ ސިޔާދަތަށް ގެންލުން ލިބޭގޮތަށް ދޫކޮށްނުލައްވާކަމަށެވެ. މި މަޝްރޫއަކީ ދިވެހިރާއްޖޭގެ މުޅި ޓޫރިޒަމް ސިނާޢަތަށްވުރެވެސް އަގުބޮޑު މަސްރޫއެއްކަމަށާއި، މުޅި އިޤްތިޞާދު ޓޫރިޒަމަށް ބަރޯސާވެފައި އޮތް އޮތުން މި މަޝްރޫޢުގެ ސަބަބުން އެއްކޮށް ބަދަލުވެގެންދާނެކަމަށް ވިދާޅުވިއެވެ.
"ޒަމާނާއެކު ޙާލަތު ބަދަލުވާނެ، އަޅުގަނޑުގެ ވިސްނުމުން އެއަށް ޖާގަދޭންވާނެ. އެހެން ނޫންކަމަށްވަންޏާ އަޅުގަނޑުމެންނަކީ ހަމަ އިންޑިއާ ކަނޑުގަ ހަމަ ޖަހާފަތިބި ކަޑަތަކެއް ކަހަލަ ބަޔަކަށްވާނީ. މިކަހަލަ ބޮޑު މަސްރޫއެއް ފ. އަތޮޅުގައި ނިމިގެންދާއިރު މިއީ ހަމައެކަނި ފ. އަތޮޅުގެ ރައްޔިތުންނަށް ފައިދާވާނެ މަސްރޫއެއްނޫން. ފ. އަތޮޅު ތަރައްޤީވެގެންދާނީ އަޅުގަނޑުމެން ހީވެސް ނުކުރާ މިންވަރަށް." ރައީސް ޔާމީން ވިދާޅުވިއެވެ.
މި މަސްރޫޢުގެ ތަފްސީލް ނުލިބިގެން ކަންބޮޑުވާންޖެހޭ ސަބަބެއް ނެތްކަމަށާއި، މަސްރޫޢުގެ ހުރިހާކަމެއް ނިމުމުން އެކަން ހާމަކުރައްވާނެކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ސްޕެޝަލް އިކޮނޮމިކް ޒޯނާބެހޭ ޤާނޫނެއް ފާސްކުރެއްވީ މިފަދަ ބިޔަ އިންވެސްޓްމެންޓްތަކަށް މަގުފަހިކުރެއްވުމަށްކަމަށެވެ. ދިވެހިރާއްޖެއަށް ބިމުގެ މުއްސަނދިކަން ލިބިފައިވާކަމަށާއި، ބޭނުންވަނީ ބިމުގެ ބޭނުން ހެޔޮގޮތުގައި ހިފުމަށްކަމަށް އެމަނިކުފާނު ވިދާޅުވިއެވެ.
"މިޑްލް އިންކަމް ޤައުމަކަށް ދިވެހިރާއްޖެދާން މަސައްކަތައްކުރާއިރު، އަޅުގަނޑުމެންނަކަށް މިތަރައްޤީއެއް ނުގެނެވޭނެ ހަމަ މަޑުމަޑުން ކަންކަން ކޮށްލަކޮށްލަ ތިބެގެނެއް. މިކަލަ ބިޔަ ބޮޑެތި މަސްރޫޢުތައް ދިވެހިރާއްޖެއަށް އެބަ ގެންނަންޖެހޭ. އަޅުގަނޑުމެންގެ މުޅި ތަޞައްވުރު ހިއްލާލުމަށް ޓަކައި." ރައީސް ވިދާޅުވިއެވެ.
ފ. އަތޮޅުގައި ކުރިއަށްގެންދެވުމަށް ތައްޔާރުވެވަޑައިގަންނަވަމުންގެންދަވާ މަސްރޫޢުގެ ސަބަބުން ދިވެހިރާއްޖެއާމެދު ދުނިޔެ ދެކޭގޮތް އެއްކޮށް ބަދަލުވެގެންދާނެކަމަށް އެމަނިކުފާނުވިދާޅުވިއެވެ. އަދި މިފަދަ ބިޔަ މަސްރޫއަކަށް ބުރޫއަރާފަދަ ގޮތަކަށް ވާހަކަދެއްކުމުގެ ޙައްޤު އެއްވެސް މީހަކަށް ނޯންނާނެކަމަށާއި، ރައްޔިތުންނަށް ލާބަހުރި މަސައްކަތްތަކުގައި ހުރިހާ ފަރާތްތަކުން ބައިވެރިވުމަށް ރައީސުލްޖުމްހޫރިއްޔާ އިލްތިމާސް ކުރެއްވިއެވެ.